შენ, შენ, ჩემო საქართველო - როგორ გახდა ლუხუმ ჩხვიმიანი მსოფლიოს ჩემპიონი [ანალიზი]

უჩვეულოდ წარმატებით დავიწყეთ ძიუდოისტთა მსოფლიოს ჩემპიონატი ტოკიოში - მაშინ, როცა ძიუდოს სამშობლო და მასპინძელი იაპონია ოქროს გარეშე დარჩა, ოქროს მედალი საქართველომ მოიპოვა: ლუხუმ ჩხვიმიანმა (60) შეუძლებელი შეძლო და პლანეტის ჩემპიონი გახდა.

ის საკუთარ თავს გადაახტა; განსაკუთრებით კი ნახევარფინალში, სადაც დამატებით დროში დაამარცხა მასპინძელთა ბოლო იმედი, მსოფლიოს შარშანდელი ბრინჯაოს მედალოსანი რიუჯუ ნაგაიამა და იაპონია ოქროს გარეშე დატოვა. შეიძლება ითქვას, ნაგაიამას ჭიდაობით კი არა, ომით, ბრძოლით მოუგო, იმდენად თავდადებით ეჭიდავა.

ეს შეხვედრა კერპთა მსხვრევის ნამდვილი მაგალითი იყო და დამატებით დროში ნაგაიამაც `დაიმსხვრა~ იაპონიის ოცნებებთან ერთად. თანაც - თავისივე ილეთზე: კისრულზე წამოღება მოუნდომა, მაგრამ ჩხვიმიანმა კარგად დაუხურა გდება და იქით გაუგრძელა ილეთი, გადაგორებით ზურგით დაახეთქა ტატამს. მსაჯებმა თავიდან იპონი, თუმცა ვიდეოგამეორების შემდეგ ვაზარად გადააკეთეს და სამართლიანადაც, რადგან იაპონელი ცალ ბეჭზე გადაგორდა და ამოტრიალდა, ოღონდ ეს დამატებით დროში მოხდა, იქ კი ვაზარიც და იპონიც ერთნაირად ფასობდა: ოქროს ქულით კი გაიმარჯვა და...

ჩხვიმიანი პირველივე წამებიდან მედგრად ეკვეთა ნაგაიამას და გაფრთხილებაც მიაღებინა. თან თავგამოდებით უტევდა და ერთ ეპიზოდში ხელიც კი მოუხვდა ცხვირში, მაგრამ ეს აზარტი იყო და არა განზრახ უხეშობა. სამაგიეროდ, უკვე მაშინვე გამოავლინა საჩემპიონო ხასიათი - აშკარად ჩანდა, რომ ის გამარჯვებისთვის იყო მომართული. და არა მხოლოდ იმ შეხვედრაში - ყველაფრიდან ჩანდა, რომ ფინალშიც ასე იომებდა.

მართალია, ნაგაიამამ ბოლოსკენ შეხვედრა კი გაათანაბრა და ინიციატივაც აიღო ხელში, მაგრამ ჩხვიმიანმა კარგ ფსიქოლოგიურ მომზადებასთან ერთად მშვენიერი ფიზიკური მომზადებაც გამოავლინა: ვინც კი დაღმავალი ამპლიტუდით წამოიღო და თავი დაბლა დაახრევინა, ყველას მწარედ ანანა კონტრილეთით: ნაგაიამას კისრული დაუხურა და იქით გადააგდო, ფინალში კი უზბეკ შარაფუდინ ლუტფილაევს ამოსმულზე დაუდგა ასე მაგრად და ისიც იმგვარად ჩააბრუნა.

მსაჯებმა ის ეპიზოდიც თავიდან იპონად შეაფასეს, მაგრამ გამეორების შემდეგ ვახარი მისცეს, რადგან კარგად გამოჩნდა, რომ ცალ მხარზე შეტრიალება უზბეკმაც მოასწრო, თუმცა ამან ვერ უშველა. ჩხვიმიანი უკვე მოვლენათა ბატონ-პატრონი იყო და სულ მალე მოგვერდით მორიგ ვაზარზე დააგდო. ამით ჩხვიმიანი ქართული ძიუდოს ისტორიაში მსოფლიოს მეშვიდე ჩემპიონი გახდა ამირან ტოტიკაშვილის, კობა კურტანიძის, თემურ ხუბულურის, ირაკლი ცირეკიძის, ავთანდილ ჭრიკიშვილის და გურამ თუშიშვილის შემდეგ.

მან წლეულს საოცრად დიდი პროგრესი გვაჩვენა - ტაქტიკურადაც სწორად ჭიდაობს, სუნთქვა-გამძლეობას და ფიზიკურ კონდიციებსაც მოუმატა და ილეთებსაც, რასაც დგომიდანაც ხშირად აკეთებს. მან წლეულს დუბლიც შეასრულა - ევროპული თამაშებიც მოიგო, რაც ძიუდოში ევრიოპის ჩემპიონატთანაა გათანაბრებული.

`შენ, შენ, ჩემო საქართველოვ~ - ეს სიტყვები მან ნახევარფინალის შემდეგ ჩასძახა კამერებს, როცა მართლაც ფინალის ტოლფასი შეხვედრა მოიგო. არსებითად, ის მაშინ გახდა მსოფლიოს ჩემპიონი, თუმცა არც დაუწერელი კანონი დაარღვია და ფინალშიც ბოლომდე იბრძოლა.

თუმცა ჩხვიმიანმა ტოკიოში მთელი ტურნირი იომა და მარათონული გზა გაიარა ჩემპიონობამდე: საკმარისია აღინიშნოს, რომ 7 შეხვედრა გამართა! აქედან 4 პაექრობა დამატებით დროში მოიგო, 3-ში კი წმინდად იმარჯვა. მეტოქებიც ძლიერები ჰყავდნენ: ნაგაიამაზე და ლუტფილაევზე გითხარით, ესპანელი ფრანსისკო გარიგოსი ევროპის წლევანდელი თამაშების ფინალისტია, ბრაზილიელი ერიკ ტაკაბატაკეც სოლიდური ფალავანია, ხოლო ტაივანელმა იუნგ ვეი იანგმა მანამდე რუსთა ქართველი ევროპის ჩემპიონი, მსოფლიოს შარშანდელი ფინალისტი რობერტ მშვიდობაძე და უზბეკთა მსოფლიოს პრიზიორი დიორბეკ უროზბოევი გამოაგდო.

ჩანს, ჩხვიმიანმა მისთვის უხერხულ გარიგოსსაც საბოლოოდ მოუძებნა გასაღები: აქამდე თუ მასთან ზედიზედ ხუთი პაექრობა ჰქონდა წაგებული, ახლა ბოლო ორივე შეხვედრა მოუგო!

დასანანია, რომ ამჯერად უმედლოდ დაგვირჩა ამირან პაპინაშვილი - მერვედფინალში ყაზახ გუსტამ კირგიზბაევთან დამარცხდა. ამ შეხვედრაში მსაჯმა ჯერ ყაზახს მისცა ცოტა საკამათო იპონი, შემდეგ კი ჩვენებურს გაუუქმა, როცა ეს მიაწვა და უკან გადააგდო. ოღონდ ეს კია, ყაზახმა იდაყვის დადება მოასწრო, პაპინაშვილს კი ვერაფერში წაადგა ვერც ეკვადორელ ლენინ პრიციადოსთან შესრულებული უმაგრესი ბრუნი და ვერც ბელგიელ ჟორჟე ვერსტრაეტენთან შესრულებულმა კისრულ-მოგვერდმა.

ჩემპიონატის მნიშვნელოვანი ამბები

თავად ჩემპიონატის ყველაზე მნიშვნელოვანი ამბავი, უდავოდ, იაპონელთა ოქროს გარეშე დარჩენაა: ნაგაიამა ხომ ჩხვიმიანმა დაამარცხა, მსოფლიოს სამგზის ჩემპიონი ნაოჰისა ტაკატო ლუტფილაევმა გააბითურა, ქალებში კი იაპონია 18 წლის უკრაინელმა ლამაზმანმა დარია ბილოდიდმა მოცელა, ვინც ფინალში ფუნა ტონაკი დაამარცხა. სხვათა შორის, ქალებში შარშანდელი ფინალი განმეორდა, თუმცა იმავე შედეგით დასრულდა, უკრაინელი კი ზედიზედ მეორედ გახდა მმსოფოიოს ჩემპიონი. ის ჯერ კიდევ შარშანვე გახდა ძიუდოს ისტორიაში ყველაზე ახალგაზრდა მსოფლიოს ჩემპიონი.

დღეს იჭიდავებენ 

დღეს ტოკიოში ვაჟებში 66, ქალებში კი 52 წონითი კატეგორიების წარმომადგენლები იჭიდავებენ, მათ შორის კი სამი ჩვენებური იქნება: ევროპის ჩემპიონი, მსოფლიოს პრიზიორი ვაჟა მარგველაშვილი, მეორე ევროპული თამაშების ბრინჯაოს მედალოსანი ბაგრატ ნინიაშვილი და ტატიანა ლევიცკა-შუკვანი. 
მარგველაშვილი მსოფლიოს რეიტინგის ლიდერია და ამიტომ პირველ წრეში თავისუფალია. მას წილისყრამაც გაუმართლა და შედარებით სახიფათო მეტოქე მესამე წრეში ელოდება - გერმანელი სებასტიან საიდლი, ვისთანაც შარშან მსოფლიოს პირველობაზე დამარცხდა და ისეც მარგველაშვილს მასთან ხუთი პაექრობიდან სამი აქვს მონაგები. 

მარგველაშვილი პირველ შეხვედრას არგენტინელი ტალ ალმოგისა და ეგვიპტელი აჰმედ აბელრაჰმანის პაექრობაში მოგებულთან გამართავს, ხოლო იქაც თუ წარმატებით იჭიდავებს, მერე მისი და საიდლის გზებიც შეიძლება გადაიკვეთოს. ამავე ჯგუფში არიან თურქი სინან სანდალი, ყაზახი იელდოშ ჟუმაკანოვი და ბრაზილიელი დანიელ კარგნინი, თუმცა მარგველაშვილი მათ მეოთხედფინალამდე არ ხვდება.

ამ ჯგუფის მოგებული ნახევარფინალში ებრაელი ბარუხ შმაილოვის ჯგუფზე გადის, თუმცა იქ რუსთა სამგზის მსოფლიოს ფინალისტ მიხაილ პულიაევსაც გამოვარჩევთ. 

ჩვენი გუნდიდან ნინიაშვილს ყველაზე მეტად არ გაუმართლა, რადგან ჯგუფში კორეელთა მსოფლიოს ჩემპიონ ბაულ ანთან და იაპონელთა ერთ-ერთ ყველაზე ნიჭიერ ტალანტთან, მსოფლიოს ორგზის ჩემპიონ ჰიფუმი აბესთან მოხვდა. ნინიაშვილი პირველ პაექრობას გვინეელ მუსა კაბასთან გამართავს, ამათში მოგებული კი ავსტრიელ ნათან კეტზს შეხვდება. აი, მესამე წრის სავარაუდო მეტოქეთა შორის კი უკვე ანიცაა, 

ლევიცკა-შუკვანი ჯგუფში ფრანგთა მსოფლიოს ჩემპიონ ამანდინე ბუშართან მოხვდა, ოღონდ მათი გზები მერვედფინალში იკვეთება. ჩვენებური პირველ წრეში პოლონელ ალექსანდრა კალეტას ხვდება, ამათში მოგებული კი ვიეტნამელი ტჰიუ ნგუენისა და ყაზახი ანა კაზულინას წყვილიდან უძლიერესს დაეჭიდება.

ყოველდღიური სპორტული გაზეთი "ლელო"
8217
მკითხველის კომენტარები / 0 /
მსგავსი ამბები
რუბრიკის სხვა სიახლეები
;