[ექსკლუზვი] ნოდარ ახალკაცი: პირდაპირ ვუთხარი ექტორ კუპერს...

საქართველოს ფეხბურთის ფედერაციის ყოფილი პრეზიდენტი, ნოდარ ახალკაცი ფიფაში უაღრესად საპასუხისმგებლო თანამდებობაზე მუშაობს.

ის ამ ორგანიზაციის წევრი ეროვნული ასოციაციების მმართველობის დეპარტამენტის თავმჯდომარეა. თამამად შეიძლება ითქვას, რომ ეს ერთ-ერთი ყველაზე საპასუხისმგებლო თანამდებობაა მსოფლიო ფეხბურთის ოჯახში...

ზოგადად, ახალკაცების დამსახურება ქართული ფეხბურთის წინაშე განუზომელია. ცოტა ხნის წინ უფროსი ნოდარ ახალკაცის 80 წლის იუბილე აღინიშნა.

ორიოდ დღის წინ კი საქართველოს პრეზიდენტის, გიორგი მარგველაშვილის გადაწყვეტილებით, ლეგენდარული მწვრთნელი სიკვდილის შემდეგ ღირსების ორდენით დაჯილდოვდა...

ნოდარ ახალკაცი-უმცროსთან ექსკლუზიურ ინტერვიუში საინტერესო თემებზე ვისაუბრეთ...

- ბატონო ნოდარ, თავდაპირველად ახალი წელი და სახელოვანი მამის იუბილე უნდა მოგილოცოთ. ზუსტად გვითხარით თქვენი თანამდებობის შესახებ. რა საქმიანობას ეწევით ფიფაში?

- დიდი მადლობა მოლოცვისთვის! რაც შეეხება ჩემს საქმიანობას, ფიფას წევრი ასოციაციების მმართველობის განყოფილებას ვხელმძღვანელობ. მისი ამოცანაა, ფიფას წევრი ასოციაციების წესდებები და მათი მმართველობის მოდელი სრულ თანხვედრაში იყოს ფიფას წესდებასთან.

ეს ემსახურება ფიფას წევრი ქვეყნების ასოციაციების შიდა საქმიანობაში სახელმწიფოს ჩარევის პრევენციას. აქვე არის ეგრეთ წოდებული "კრიზისმენეჯმენტის" მიმართულება. ფიფას ამის რეგულაციისთვის ძალიან მკაცრი მექანიზმები აქვს.

არაერთი ქვეყანა დამდგარა ამ პრობლემის წინაშე. მათ შორის იყო საქართველოც. ყველას ახსოვს, რა მოხდა 1997 წელს. მაშინ ფიფამ ჩათვალა, რომ მოხდა ჩარევა საქართველოს ფეხბურთის ფედერაციის საქმიანობაში.

იუსტიციის სამინისტროს გადაწყვეტილება შეჩერდა და ქართული ფეხბურთი საერთაშორისო ასპარეზიდან მოკვეთას გადაურჩა. ეს მექანიზმი დღესაც მოქმედებს.

ზოგ შემთხვევაში, ფიფა ქმნის კომიტეტს, რომელიც კრიზისულ სიტუაციებში თავის თავზე იღებს მართვის სადავეებს, ანუ იღებს აღმასკომის ფუნქციას. მისი მოვალეობაა ისიც, რომ მაქსიმალურად იყოს თავიდან აცილებული კონფლიქტური სიტუაციები, რომ სპორტის კანონი შესაბამისობაში იყოს ფიფას კანონმდებლობასთან და ასე შემდეგ.

- რა თქმა უნდა, ყოფილა სახელმწიფოს ჩარევის შემთხვევები თუ მცდელობა ზოგიერთი წევრი ასოციაციის მუშაობაში...

- დავიწყებ საბერძნეთის მაგალითით. ძალიან პრობლემატური იყო მდგომარეობა ამ ქვეყანაში. დღის წესრიგში იდგა სახელმწიფოს ჩარევის პრობლემა, არჩევნების ჩატარების საკითხი, სპორტის კანონმდებლობა არ იყო თანხვედრაში ფიფას კანონმდებლობასთან...

ჩვენ ძალიან ინტენსიურად დავიწყეთ მუშაობა და მივაღწიეთ იმას, რომ ბერძნულ ფეხბურთს ჰყავს ახალი ხელმძღვანელობა. მიუხედავად იმისა, რომ საბერძნეთი, მოგეხსენებათ, დიდი საფეხბურთო ტრადიციების მქონე ქვეყანაა, ჩვენთვის ფიფას წევრი ყველა 211 ასოციაცია თანასწორუფლებიანია.

სხვანაირად რომ ვთქვათ, ეს იყო ჩვენი მკაფიო მესიჯი სხვა ასოციაციების მიმართ... ამას გარდა, საბერძნეთში დიდი პრობლემა იყო მსაჯობასთან დაკავშირებით. ესეც მოგვარდა. ახლად ჩამოყალიბებულ მსაჯთა კომიტეტს სათავეში ჩაუდგა ცნობილი პორტუგალიელი არბიტრი ვიტორ მელო პერეირა.

ასევე ძალიან რთულად იყო საქმე ქუვეითშიც. ორი წლის განმავლობაში, ამ ქვეყნის ასოციაციას შეჩერებული ჰქონდა ფიფაში წევრობის უფლება. პრობლემა იყო სპორტული კანონმდებლობა.

მთავრობის წარმომადგენლებს სარჩელი ჰქონდათ შეტანილი სასამართლოში. დღეს შეიძლება ითქვას, რომ ყველაფერი მოგვარებულია და ქუვეითის ასოციაციას წევრის სტატუსი დაუბრუნდა.

- ბოლო ევროპის ჩემპიონატზე ძალიან გადატვირთული გრაფიკით იმუშავეთ. ვიცით, თქვენი ძალიან დიდი წვლილია იმაში, რომ ერთ-ერთი მატჩი ჩაშლას გადაურჩა...

...მივიღეთ ინფორმაცია, რომ დიდი არეულობა იგეგმებოდა ზუსტად 87-ე წუთზე. შესაბამისად, გადავწყვიტეთ იმ ტრიბუნის გაკონტროლება, სადაც ულტრასები ისხდნენ...

- ევროპის ჩემპიონატზე, უეფას დელეგატის სტატუსით, ამ ტურნირზე უმაღლესი წარმომადგენელი ვიყავი სენტ-ეტიენში გამართულ მატჩებზე. ბევრი რამ შედიოდა ჩემს მოვალეობაში, მათ შორის - უსაფრთხოების უზრუნველყოფა.

მადლობა ასეთი შეფასებისთვის. მე მოგიყვებით, რა მოხდა ხორვატიისა და ჩეხეთის ნაკრებთა შეხვედრაში. მოგეხსენებათ, ასეთი მნიშვნელოვანი მატჩის წინ მიდის ინფორმაციების გაცვლა.

ჩვენ შევიტყვეთ სახელმწიფო სტრუქტურების მხრიდან იმის თაობაზე, რომ ამ მატჩის განმავლობაში ხორვატი გულშემატკივრების ერთი ნაწილი... მოდი, მე მათ ვუწოდებ ხულიგნებს, გეგმავდა სტადიონზე მასობრივი არეულობის გამოწვევას. ასევე, ვიცოდით, რომ ისინი სტადიონზე გეგმავდნენ დიდი რაოდენობით პიროტექნიკის შეტანას.

ამის გაკონტროლება ძალიან რთულია, რადგან პიროტექნიკა შეიძლება დაშალო და ისე შეიტანო სტადიონზე. ამას ემატებოდა ისიც, რომ ხორვატი "ულტრასები" მეგობრობენ "სენტ-ეტიენის" რადიკალ ფანებთან.

შეიძლებოდა, სულაც გადაემალათ პიროტექნიკა სტადიონზე წინასწარ მონიშნულ ადგილებში... ერთი სიტყვით, მათი მიზანი იყო შეხვედრის ჩაშლა, მინდორზე გადასვლა და ფეხბურთელების ჯანმრთელობის ხელყოფაც კი, თუნდაც ამით თავიანთი ნაკრების დისკრედიტაცია მოეხდინათ თუნდაც.

ჩვენ მივიღეთ ინფორმაცია, რომ დიდი არეულობა იგეგმებოდა ზუსტად 87-ე წუთზე. შესაბამისად, გადავწყვიტეთ იმ ტრიბუნის გაკონტროლება, სადაც ეს "ულტრასები" ისხდნენ. კი, მოხდა არეულობა, ამის სრულად პრევენცია შეუძლებელი იყო, მაგრამ არ მოხდა ის, რაც ამ არეულობის გამომწვევებს სურდათ.

საქმე ის იყო, რომ ხორვატი გულშემატკივრები თავად დაუპირისპირდნენ ამ "ულტრასებს", რომელთაც თავიანთი ნაკრების ევროპის ჩემპიონატზე ასპარეზობა დააყენეს კითხვის ნიშნის ქვეშ.

თუ გახსოვთ, ამ ექსცესის გამო, ხორვატიის ნაკრებმა ვეღარ იპოვა საკუთარი თამაში და ჩეხებმა ანგარიში გაათანაბრეს. არადა, ყველას გვახსოვს, რა კარგად დაიწყო ხორვატიამ ევროპის ჩემპიონატი. გაგრძელება ვეღარ იყო ისეთი კარგი და, ჩემი აზრით, ამაში წვლილი იმანაც შეიტანა, რაზეც გიამბეთ.

- ახლა ის გვითხარით, როგორი ურთიერთობა გაქვთ საქართველოს ფეხბურთის ფედერაციის მოქმედ ხელმძღვანელობასთან?

- იცით, რომ ცოტა ხნის წინ მამაჩემის ბიუსტი გაიხსნა მისი სახელობის მე-9 სკოლაში და ეს მოხდა საქართველოს ფეხბურთის ფედერაციის აქტიური მხარდაჭერით.

ბიუსტი შექმნა ცნობილმა მოქანდაკე გოგი შხვაცაბაიამ და საქართველოს ფეხბურთის ფედერაციამ ამის დაფინანსება მთლიანად თავის თავზე აიღო. როცა მე ვიყავი საქართველოს ფეხბურთის ფედერაციის პრეზიდენტი, მაშინ ეს ბიჭები საქართველოს ნაკრების ფეხბურთელები იყვნენ.

მაგრამ ჩვენ მაინც ერთი თაობა ვართ. ჩვენში არ არის ასაკობრივი სხვაობა. მე, როგორც ერთი რიგითი ქართველი, ვარ საქართველოს და ქართული ფეხბურთის სამსახურში.

- არ შეიძლება, საქართველოს ეროვნულ ნაკრებზეც არ გკითხოთ...

- დიდი სჯა-ბაასი არ უნდა იმას, რომ საქართველოს ნაკრები თითოეული ჩვენგანისთვის არის უმთავრესი რამ. ჩვენ, ყველანი, დიდი ყურადღებითა და იმედით ვადევნებთ თვალს ეროვნული გუნდის თითოეულ თამაშს, გვეიმედება მისი წარმატების და ვხარობთ ამით.

პირადად მე, ძალიან მიხარია, რომ საქართველოს ნაკრებს დღეს აღარ აქვს მეკარის პრობლემა და ამაში ჩვენი წვლილიცაა. სწორედ ჩვენ დროს მიიღეს სანაკრებო შანსი გიორგი ლორიამ და გიორგი მაკარიძემ. გავიხსენებ ესპანეთთან თბილისურ შეხვედრას, რომელიც მინიმალური ანგარიშით, 0:1 წავაგეთ.

იმ შეხვედრის განაცხადში მყოფი 18 ფეხბურთელიდან 15-ს ჩვენ დროს ჰქონდა გავლილი სხვადასხვა ასაკობრივი ნაკრების სკოლა. მე ბედნიერი ვარ იმით, რომ დღეს ჯანო ანანიძე იცავს ქვეყნის ეროვნული გუნდის ღირსებას.

თავადაც კარგად გახსოვთ, როგორ იყო ყველაფერი. ჯანო, ამ სიტყვის სრული მნიშვნელობით, ცხვირწინ ავაცალეთ რუსებს. კარგად გახსოვთ ის პერიოდიც - მაშინ ზოგიერთი პოლიტიკური ძალა ამბობდა, ჯანოს რუსები წაგვართმევენ, ის დაკარგულია ჩვენთვის და ამის გამო პასუხისმგებლობა საქართველოს ფეხბურთის ფედერაციამ უნდა აიღოსო.

ფეხბურთელის ნებასთან ერთად, ჩვენმა აქტიურობამაც დიდი როლი შეასრულა. მაშინ პირდაპირ ვუთხარი საქართველოს ნაკრების მთავარ მწვრთნელ ექტორ კუპერს - ჯანომ ერთი წუთი მაინც რომ ითამაშოს საქართველოს ნაკრების შემადგენლობაში, მერე რუსები მას ვერანაირად ვეღარ წაგვართმევენ-მეთქი...

მე მჯეროდა, რომ კუპერი როგორც კი ნახავდა ჯანოს შეკრებაზე, საერთოდ აღარ იქნებოდა ამაზე ლაპარაკი... კუპერზე მან დიდი შთაბეჭდილება მოახდინა.

მანამდე, მას ისიც ვუთხარი - შეიძლება, ხვალ მე აღარ ვიყო საქართველოს ფეხბურთის ფედერაციის პრეზიდენტი, ან თქვენ საქართველოს ნაკრების მწვრთნელი, მაგრამ ჯანო საქართველოს დარჩება-მეთქი...

ყოველდღიური სპორტული გაზეთი "ლელო"
6655
მკითხველის კომენტარები / 4 /
sake
0
რაც შეეხება ჯანოს...და მერე რა?ხოლო რაც შეეხება არჩევნებს;ჩვენც გვახსოვს რაღაც-რაღაცეები
avimusaifi
1
..da federaciis shenobis 10 milioniani ipotekit datvirtvas ar vimchnevt?! ,,Gaiasnda"?!
მსგავსი ამბები
რუბრიკის სხვა სიახლეები
;