ვრცელი ინტერვიუ. ტარიელ ხეჩიკაშვილი: დიდი ნაწილი ფეხბურთიდან წასვლას აპირებდა

ტარიელ ხეჩიკაშვილმა სპორტისა და ახალგაზრდობის საქმეთა მინისტრის თანამდებობა დატოვა და ბიზნესს უბრუნდება. როგორ აფასებს განვლილ საქმიანობას, რა შეძლო და რა ვერ შეძლო? ამ და სხვა თემებზე ყოფილმა მინისტრმა "ლელოსთან" ინტერვიუში ილაპარაკა...

დაპირისპირებები შემცირდა

- თანამდებობაზე მუშაობის 32 თვეს როგორ შეაფასებდით?

-მიმაჩნია, რომ ამ პერიოდში ბევრი პროექტი განხორციელდა, რაც მომავალში ჩვენი სპორტის წინსვლაზე სასიკეთო გავლენას მოახდენს. ჩემთვის მნიშვნელოვანი იყო ბოლო შეხვედრა ფედერაციების წარმომადგენლებთან და სპორტსმენებთან, როდესაც ჩემი გუნდი ტაშით გააცილეს.

ქედმაღლობაში არ ჩამომართვათ და, სპორტული სამყაროს, გულშემატკივრებისა და სამთავრობო გუნდის ნდობა და აღიარება ყოველგვარ ჯილდოზე მნიშვნელოვანი შეფასება იყო. ეს მთელი ცხოვრება გამყვება.

- გაერთიანებული სამინისტროს ხელმძღვანელი მიხეილ გიორგაძე ხალხს "ისტერნ პრომოუშენიდან" ახსოვს. არადა, ბევრმა არ იცის, რომ ძალიან წარმატებული წყალბურთელი იყო...

- არათუ წარმატებული სპორტსმენი იყო, საბჭოთა კავშირის წყალბურთელთა ნაკრების წევრიც გახლდათ, რაც იმ პერიოდში პატარა ამბავი არ იყო. ჩვენს საქმიანობას მაღალი შეფასება მისცა და ბრძანა - სპორტში აღებული ტემპი უნდა შევინარჩუნოთო.

ისიც ძალიან მნიშვნელოვანია, გაერთიანებულ სამინისტროში რომ რჩება ორი მოადგილე, რომლებიც სპორტს მიხედავენ. ანუ აღებული კურსი და რეფორმები გაგრძელდება. მეამაყება, რომ რამდენიმე მნიშვნელოვანი რეფორმა განვახორციელეთ.

მაგრამ უპირველესად ის მახარებს, რომ სამინისტროში მისვლის დროს არსებული დაპირისპირებები ფედერაციებთან თუ ცალკეულ ჯგუფებთან საგრძნობლად შემცირდა.

მისვლისთანავე მიზნად დავისახე, ეს ენერგია საერთო გამარჯვებისკენ მიგვემართა და მიხარია, ეს რომ მოვახერხეთ. უპირველესად, ურთიერთობა საპარლამენტო კომიტეტთან დავალაგეთ, ვისთანაც აზრთა სხვადასხვაობა იყო.

დავარწმუნეთ კომიტეტი, რომ ეს რეფორმები სპორტს წაადგებოდა და მერე ბევრი გამარჯვების თანამონაწილენი გავხდით. საპარლამენტო კომიტეტის ახალ შემადგენლობასთან კი, რომელსაც მიხეილ ყაველაშვილი ხელმძღვანელობს, ბევრი საერთო პროექტი განვახორციელეთ და დარწმუნებული ვარ, ეს თანამშრომლობა მომავალშიც გაგრძელდება...

მეორე - შევეცადეთ, რომ დაფინანსების და აღიარების სისტემა უფრო დემოკრატიული გაგვეხადა, რაც წლების მანძილზე სერიოზულ პრობლემას ქმნიდა. ჩემი ინიციატივით ჩამოყალიბდა დაფინანსების და აღიარების საბჭო, სადაც სამინისტროსთან ერთად, წარმოდგენილი იყო ოლიმპიური და პარაოლიმპიური კომიტეტებისა და საპარლამენტო კომისიის წარმომადგენლები და გადაწყვეტილებებს დემოკრატიულად ვიღებდით.

შეფასებების კრიტერიუმები დავაწესეთ და ყველამ დაინახა, რომ მნიშვნელოვანი იყო შედეგები, სწორი მენეჯმენტი, მასობრივი სპორტის განვითარება და დემოკრატიული მართვის ფორმა.

ეს ყველაფერი მოწესრიგდა და ფედერაციები იყვნენ ორიენტირებულები შედეგებზე და უფრო კარგი სამუშაო გარემო ჩამოყალიბდა. ამავე დროს, ყველა ფედერაციის ფინანსური საქმიანობა ხელმისაწვდომი გახდა.

სპორტული ტურიზმის ეფექტი

- ინფრასტუქტურის მიმართულებით ჩატარებულ საქმიანობაზე რას იტყვით?

- ეს უმნიშვნელოვანესი თემაა: დავიწყეთ ინფრასტრუქტურის განვითარება და თანაც, ეს პროცესი სწორი მიმართულებით წავმართეთ. სპორტული ობიექტების ფედერაციებზე და სკოლებზე გადაცემის პრეცედენტიც შევქმენით.

მეამაყება, რომ საკალათბურთო დარბაზი ზაზა ფაჩულიას აკადემიას გადაეცა, ჩოგბურთის აკადემია - ამ სახეობის ფედერაციას, ხოლო ფეხბურთის ფედერაციას რამდენიმე სტადიონი.

ამავე დროს, რეგიონებში საერთაშორისო სტანდარტების სპორტის სასახლეები ავაშენით - ამჟამად შენდება გორში, თელავში, ბათუმში. სხვათა შორის, ჩვენი მმართველობის პერიოდში ყველა სპორტული ობიექტი აღირიცხა და ყველა მსურველს შეუძლია ნახოს, რომელ ქალაქსა და სოფელში რა ობიექტია და რა სახეობის ჯგუფები არსებობს.

ასევე დავიწყეთ მოედნებისა და სტადიონების მოწესრიგება მთელი ქვეყნის მასშტაბით. პლუს, ქვეყანაში სპორტული ტურიზმის განვითარებისთვის დიდი ნაბიჯები გადავდგით.

წლეულს ჩვენ 20-მდე სახეობის ევროპისა და მსოფლიოს ჩემპიონატს ვუმასპინძლეთ - ანუ უფრო მეტ საერთაშორისო მასშტაბურ ტურნირს, ვიდრე ბოლო რამდენიმე წელიწადში ერთად აღებული. ტურიზმის დეპარტამენტმა ეს სპორტული ღონისძიებები იმდენად მნიშვნელოვან პროექტებად მიიჩნია, რომ 13 მათგანი "ჩეკინ ჯორჯიას" ეგიდით გაიმართა.

პროექტები მნიშვნელოვანი მხოლოდ სპორტული კუთხით არ იყო: ტურნირების ორგანიზებაზე 10 მილიონი დაიხარჯა, როდესაც შემოსავლებმა 30 მილიონს გადააჭარბა. ჩვენ შევქმენით პრეცედენტი, რომ სპორტი ქვეყანას ტვირთად კი არ დააწვა, არამედ, საქართველოს შემოსავლები მოუტანა.

ცხადია, ეს ღონისძიებები სპორტის და ქვეყნის პოპულარიზაციას ემსახურებოდა და შედეგებიც მოგვიტანა. მაგალითად, ფარიკაობაში ჩატარებულ ევროპის ჩემპიონატის ორგანიზება ისე მოეწონათ, რომ თავად გამოხატეს სურვილი, ისევ ჩვენთან გამართულიყო.

შედეგად მივიღეთ ის, რომ საქართველოს ქალთა შორის ევროპის ჩემპიონი ჰყავს, მამაკაცებში კი - პრიზიორები. ამ შეჯიბრებების შემდეგ კი ბევრს უჩნდება სურვილი, რომ შეკრება საქართველოში გაიაროს. ეს რამდენიმე სახეობაში რომ მოხდება, ფედერაციებისთვის დამატებითი შემოსავლის წყარო გახდება. ანუ ესეც კომერციალიზაციისკენ გადადგმული ნაბიჯია.

პირველად, 35 წლის შემდეგ...

- დანიშვნის დროს, თბილისის და რუსთავის მერიამ თანხმობა განაცხადეს, რომ სპორტულ ობიექტებზე ქონების გადასახადი ერთი წლით შემცირდებოდა. ეს დადგენილება დღემდე მოქმედებს თუ გადასახადი ძველ ნიშნულს დაუბრუნდა?

- მერიამ გადასახადი ოთხწლიანი ვადით დააკანონა, რაც სპორტული ობიექტებისთვის მნიშვნელოვანი შვება იყო. ეს იყო მნიშვნელოვანი მესიჯი იმ ინვესტორებისთვის, რომლებიც სპორტული სკოლის, სტადიონის ან დარბაზის აშენებას აპირებდნენ, რომ სახელმწიფო სპორტულ ობიექტებს ისე არ უდგებოდა, როგორც - რესტორნებს.

მასობრივი სპორტის კუთხითაც ბევრი რამ გაკეთდა: სულ სპორტში 30 ათასი ბავშვი იყო ჩართული, ახლა კი ეს ციფრი 130 ათასამდე გაიზარდა - მიზანი კი ისაა, რომ საბოლოოდ 300 ათასამდე ავიდეთ.

- ისლანდიაში ფეხბურთის განვითარებას საინტერესო წინაპირობა ჰქონდა - ქვეყნის ხელისუფლებას სურდა, რომ სპორტში ჩართვით, ახალგაზრდები ალკოჰოლიზმის დამოკიდებულებისგან ეხსნათ...

- რა თქმა უნდა, სპორტი ძალიან ბევრი პრობლემის მოგვარების ეფექტური საშუალებაა. ახლა ქვეყანა ჯანდაცვაში დიდ სახსრებს ხარჯავს, ჯანსაღი თაობის პირობებში კი დროთა განმავლობაში ამაზე გაცილებით ნაკლები დაგვჭირდება.

- წმინდა სპორტული შედეგებით კმაყოფილი ხართ?

- მე ფაქტს გეტყვით: არათუ დამოუკიდებლობის, 1982 წლის შემდეგ პირველად 2017 წელს მოხდა, რომ ოლიმპიურ სახეობებში მსოფლიოს 4 ჩემპიონი გვყავს. ეს ყველაზე სასიხარულო შედეგი და ქვეყნისთვის ისეთი მოვლენა იყო, რომ საქართველოს პრემიერმა მათ საზეიმო მიღება გაუმართა.

ფეხბურთი,  როგორც დანაღმული ველი

- ჩვენი ფეხბურთი წლების განმავლობაში ნადგურდებოდა, რის შედეგებსაც ახლა ვიმკით - საერთაშორისო სარბიელზე კლუბების გამოსვლა კრიტიკას ვერ უძლებს, ნაკრები ოფიციალურ მატჩებს ვერ იგებს. ფეხბურთის ფედერაცია დანაღმულ ველზე დადის და არავინ უწყის, როდის და სად აფეთქდება. სანამ ფეხბურთში წარმატებას არ მივაღწევთ, გულშემატკივარს გულში მაინც ხინჯი დარჩება.

- ფეხბურთის განვითარების სახელმწიფო პროგრამის დამტკიცება სწორედ ამით იყო განპირობებული. ამ სფეროს წამოწევას დიდი შრომა და მრავალწლიანი პროგრამის განხორციელება სჭირდება.

ფეხბურთი საქართველოში პირველი სახეობაა და არაერთხელ გამოჩნდა, რომ ხალხს ძალიან უყვარს. პატარა ბიძგიც საკმარისია, ტრიბუნები რომ შეივსოს.

19-წლამდელთა ევროპის ჩემპიონატზე საქართველოსა და ჩეხეთის შეხვედრაზე 25 ათასი მაყურებელი მოვიდა, რამაც უეფას დელეგაცია გააოცა - ასეთი დასწრება ამ ასაკის ჩემპიონატზე არსად დაფიქსირებულა.

გულშემატკივარი მზადაა, რომ პირველივე შედეგზე სტადიონს დაუბრუნდეს. გრძელვადიანი პროექტები სწორედ ამას ემსახურება, რომ ვარდნა შეჩერდეს და ადრე თუ გვიან წინსვლა დავიწყოთ.

- ფეხბურთის განვითარების სახელმწიფო პროგრამამ დროთა განმავლობაში ხარვეზები გამოაჩინა.

- ეს ბუნებრივია. შეუძლებელია, რომ რაიმე პროგრამა იდეალური იყოს. კონსტიტუციაზე წლები მუშაობენ და ჩასწორება მასაც სჭირდება. ცხადია, იდეალური ვერც ფეხბურთის განვითარების სახელმწიფო პროგრამა იქნება. მაგრამ მისი კორექტირება პერიოდულად მოხდება და ამაში სამარცხვინო არაფერია.

- მაგალითად, გამოჩნდა, რომ ბევრი კერძო კლუბი სახელმწიფო სახსრებს იყენებს, საკუთარს კი უფრო ნაკლებად აბანდებს.

- საკითხს მეორე მხრიდან შევხედოთ - ამ პროგრამის ამუშავებამდე ფეხბურთი რჩებოდა კერძო კლუბების მეპატრონეთა გარეშე. ბევრნი არც არიან და დიდი ნაწილი ფეხბურთიდან წასვლას აპირებდა.

ნახეთ მაშინდელი განცხადებები - რამე თუ არ შეიცვლებოდა, ფეხბურთში აღარ დავრჩებითო. ამიტომ ეს დროული და საჭირო პროგრამა იყო, რადგან კერძო ინვესტორები უნდა შეგვენარჩუნებინა. მათ გარეშე სპორტს ვერ განვავითარებთ. სხვა საქმეა, რომ პროგრამას დახვეწა სჭირდება.

- თქვენ გჯერათ, რომ ასეთ მდგომარეობაში მყოფ ქართულ ფეხბურთს მომავალი გააჩნია?

- რომ არ მჯეროდეს, თავის დროზე "საბურთალოზე" უარს ვიტყოდი და ინვესტირებაზე ხელს ავიღებდი. ჩავარდნა არ ნიშნავს, რომ მას მომავალი არ გააჩნია. მაგრამ წინსვლას წინაპირობების შექმნა სჭირდება - მინისტრობის პერიოდში სწორედ ამას ვცდილობდი.

ახლა კი შევეცდები, სპორტს ისევ ბიზნესიდან დავეხმარო. სპორტსმენებს და გულშემატკივრებს დამდეგ ახალ წელს მივულოცავ. იმედია, ისეთი წელი გვექნება, ჩვენი სპორტსმენები ქართულ დროშას მაღლა ასწევენ და მსოფლიო ჩვენს წარმატებებზე ილაპარაკებს.

ყოველდღიური სპორტული გაზეთი "ლელო"
2262
მკითხველის კომენტარები / 0 /
მსგავსი ამბები
რუბრიკის სხვა სიახლეები
;