ვრცელი მიმოხილვა. თასიც, სლემიც, ანთიმოზიც

* საქართველოს ნაკრებმა რაგბი ევროპის ჩემპიონატი
(ერთა თასი) მეშვიდედ მოიგო "სლემით".
* საქართველო-რუმინეთი - 12 მოგება, 1 ფრე, 9 წაგება.
* "ბორჯღალოსნებმა" ერთი წლის წინ წაგებული
ანთიმოზ ივერიელის თასიც დაიბრუნეს.

საქართველო-რუმინეთი 25:16

საქართველო: (15-9) კვირიკაშვილი (თოდუა 64), სიჭინავა, კაჭარავა, კვესელაძე (მალაღურაძე 77), მათიაშვილი, ხმალაძე, ლობჟანიძე (აფრასიძე 72); (1-8) ნარიაშვილი (ასიეშვილი 52), მამუკაშვილი (ალხაზაშვილი 55), ჩილაჩავა (მელიქიძე 57), ნემსაძე, ჭეიშვილი (სუთიაშვილი 55), თხილაიშვილი, კოლელიშვილი (გაჩეჩილაძე 55), ლომიძე.

3ლ: ლომიძე, სიჭინავა, ასიეშვილი. 2გ, 2ს: მათიაშვილი
სინბინი: ნემსაძე.

რუმინეთი: (15-9) ფერკუ (სიმონესკუ 70), ფონოვაი, კინიკინილაუ (ფაკაოსილეა 41), ვლაიკუ, დუმიტრუ, უმანგა, სურუჯუ (კალაფეტეანუ 63); (1-8) ბადიუ (ლაზარი 71), კაპატანა (რადოი 59), ტარუსი (პრისტავიტა 60), ფან ჰირდენი, პოპირლანი, სიფოსეთუ (კირიკა 67), კუსელო, ბურეა (მოცოკი 77).
ლ: რადოი. 3ს, გ - ვლაიკუ.

სინბინი: ბადიუ, ფანჰირდენი

მსაჯი: ლუდოვიკ კეირი (საფრანგეთი)

საქართველოს ნაკრებმა ეროვნულ სტადიონზე რუმინეთის ნაკრები 25:16 დაამარცხა. "ბორჯღალოსნებმა" ვეროპა რაგბის ჩემპიონატის ახალ თასთან ერთად, ანთიმოზ ივერიელის თასიც თბილისში დატოვეს.

მატჩის დაწყებამდე, ჰიმნის შესრულების დროს, ქართველი მორაგბეები მოედანზე თეთრი მაისურებით გამოვიდნენ, რომელზეც ოკუპირებულ ცხინვალში მოკლული არჩილ ტატუნაშვილის გვარი ეწერა. ამ აქციით "ბორჯღალოსნებმა" მხარდაჭერა გამოუცხადეს მის ოჯახს.

ჩვენმა მორაგბეებმა წლევანდელ გათამაშებაში ხუთი თამაშიდან ხუთივე მოიგეს და ტურნირზე "დიდი სლემი" მეშვიდედ შეასრულეს და სატურნირო ცხრილში ამისთვის განკუთვნილი ერთი საპრემიო ქულაც მიითვალეს.

თამაში საქართველოს ნაკრებმა აქტიურად დაიწყო. "ბორჯღალოსნებმა" მეტოქეს საკმაოდ აგრესიულად შეუტიეს და საბოლოოდ საჯარიმოს დარტყმის უფლება მოიპოვეს. ანგარიში გარემარბად მოთამაშე სოსო მათიაშვილმა მე-8 წუთზე გახსნა - 3:0. "სტეჟარიმ" საპასუხო საჯარიმოთი სამ წუთში გვიპასუხა. გამოცდილმა დამრტყმელმა ფლორინ ვლაიკუმ საჯარიმო 48 მეტრიდან დაარტყა - 3:3.

ამის მერე თამაშს ისევ "ბორჯღალოსნები" აკონტროლებდნენ. აშკარა იყო ჩვენი გუნდის უპირატესობა შერკინებაში. რუმინელები რამდენჯერმე "შევაყენეთ ლიანდაგზე". 23-ე წუთზე მეტოქის ლელოდან ხუთ მეტრში დანიშნულ შერკინებაში რუმინელები რამდენჯერმე დაჯარიმდნენ.

ყველა ჯერზე ჩვენი მორაგბეები ისევ შერკინებას ითხოვდნენ. საბოლოოდ, "სტეჟარის" მორკინალები ლელოში "შევათრიეთ" და მესამეხაზელმა ლაშა ლომიძემ ბურთი დაამიწა. მათიაშვილმა ზუსტად გარდასახა - 10:3.

ამას რუმინელთა გააქტიურება მოჰყვა. ტაიმის ბოლოს 14-ნი დავრჩით, რადგან არბიტრმა გუნდის კაპიტანი გიორგი ნემსაძე გაასინბინა. ვლაიკუმ კი ისევ საჯარიმო გაიტანა და ანაგრიშში სხვაობა შეამცირა - 6:10. ასე დასრულდა პირველი ტაიმი.


შესვენების შემდეგ "ბორჯღალოსნები" უმალვე ეკვეთნენ მეტოქეს. 44-ე წუთზე მარცხენა ფრთაზე ჩვენმა გუნდმა მოლი ააგორა, მიაწვა, მეტოქე შეავიწროვა, მარჯვენა ფრთაზე ამ დროს საკმაოდ დიდი დერეფანი დარჩა დაუცველი. ეს დროულად შენიშნა მგეზავმა ლაშა ხმალაძემ და ბურთი ფეხით კიდესკენ გადაკიდა.

რუმინელმა მცველმა ბურთი ხელში ვერ შეიმაგრა და ის გარემარბის, ანზორ სიჭინავას ნადავლი შეიქნა. მისი შემჩერებელი რუმინელთაგან აღარავინ იყო. მათიაშვილმა ესეც გარდასახა - 17:6. ხუთ წუთში მანვე საჯარიმო ხელსაყრელი პოზიციიდან დაარტყა და ანგარიშში სხვაობა ათ ქულამდე გაზარდა - 20:6.

ცოტა ხანში ინიციატივას ისევ სტუმრები დაეუფლნენ, რაც ბურთის ფეხით მოგერიებისას დაშვებულმა რამდენიმე შეცდომამ გამოიწვია. შედეგად, 61-ე წუთზე ვლაიკუმ კიდევ ერთი საჯარიმოს დარტყმის უფლება მიიღო, რაც კარგად გამოიყენა - 9:20.

ათ წუთში "ბორჯღალოსნებმა" კიდევ უფრო მეტად დაწინაურება შეძლეს. მეტოქის ლელოდან ხუთ მეტრში შერკინებაში ისევ დავჩაგრეთ მეტოქე. თამაში რაკში გადავიდა. ცხრა ნომერმა ვასილ ლობჟანიძემ ბურთი იქვე შეცვლაზე შესულ შერკინების ბურჯ კარლენ ასიეშვილს გაუტანა, რომელმაც ორი მეტოქის წინააღმდეგობა დაძლია და ბურთი ლელოში გადადო. მათიაშვილს გარდასახვა გაუცუდდა - 25:9.

თამაში დასასრულს უახლოვდებოდა. რუმინელთა სათადარიგოები სიხარულისგან დახტოდნენ. ცხადია, უცნაური იყო, მაგრამ გაირკვა, რომ ესპანეთის ნაკრებმა, რომელიც პარალელურად ბრიუსელში ბელგიის ეროვნულ გუნდს ეთამაშებოდა, მარცხი განიცადა და შედეგად მსოფლიოს თასზე რუმინელები გავიდნენ.

თამაშის დასრულებამდე ერთი წუთით ადრე კი ფრთაშესხმულმა "სტეჟარიმ" მოლით შემოგვიტია და ლელო გაგვიტანა. ვლაიკუმ გარდასახა - 16:25.

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:
"წლევანდელი რაგბი ევროპის ჩემპიონატზე ჩვენი ასპარეზობა დადებითად უნდა შეფასდეს. ყველა მატჩი მოვიგეთ და ტურნირი პირველ ადგილზე დავასრულეთ.

მადლობა მორაგბეებს იმისთვის, რაც გასულ პერიოდში გააკეთეს, ახლა კი მთავარი 2019 წლის მსოფლიო თასისთვის მომზადებაა. ყველა თამაში, ვარჯიში, სწორედ ამ მიზანს მოემსახურება".

გიორგი ნემსაძე, საქართველოს ნაკრების კაპიტანი:
"მაისურზე ტატუნაშვილის გვარის დაწერა გუნდის გადაწყვეტილება იყო და ამით ოჯახის მიმართ თანაგრძნობა გამოვხატეთ. რუმინეთთან თამაში მნიშვნელოვანი იყო.

შეხვედრა ჩვენი კარნახით წარიმართა და შედეგიც შესაბამისი დადგა. რუმინეთი ძლიერი გუნდია და იოლი თამაში არ იყო. გვქონდა გარკვეული შეცდომები. მთლიანობაში კი მატჩის სადავეები ხელიდან არ გაგვიშვია. მადლობა ქომაგებს, რომლებიც დღეს სტადიონზე მოვიდნენ, ჰიმნი იმღერეს და ჩვენთან ერთად იზეიმეს ჩემპიონობა".

ლინ ჰოუელსი, რუმინეთის ნაკრების მთავარი მწვრთნელი:
"მიუხედავად იმისა, რომ მსოფლიოს თასზე გავედით, გადაწყვეტილებას არ ვცვლი და თანამდებობიდან მივდივარ. ძნელი იყო ამ გადაწყვეტილების მიღება, მაგრამ შარშან გერმანიასთან და წელს ესპანეთთან მარცხის შემდეგ, ვიღაცას პასუხისმგებლობა უნდა აეღო და ეს მე გავაკეთე. თუმცა, მიხარია, რომ რუმინეთი მსოფლიოს თასზე გავიდა და გუნდს ასეთ სიტუაციაში ვტოვებ.

საქართველომ მოიგო, თუმცა, მაინც ვთვლი, რომ მატჩი დაახლოებით თანაბარი დონის გუნდებს შორის წარიმართა. გადაწყვეტილებების მიღების დროს რამდენიმე შეცდომა დავუშვით, რამაც საბოლოო შედეგზე გავლენა იქონია.

მინდა საქართველოს მადლობა გადავუხადო. აქ ჩამოსვლამ მეორედ მომიწია და საუკეთესო მოგონებების გარდა სხვა არაფერი დამრჩენია".
სტელიან ბურეა, რუმინეთის ნაკრების კაპიტანი:

"მიმაჩნია, რომ ღირსეულად ვითამაშეთ და მინდორი თავაწეულებმა დავტოვეთ. ბიჭებმა მოედანზე ყველაფერი გაიღეს და ისეთ ძლიერ მეტოქეს, როგორიც საქართველოა, ბოლომდე ვეომეთ. თვალსაჩინო იყო, რომ შერკინებაში გაგვიჭირდა.

არადა, შარშანდელ მატჩში, ამ კომპონენტში მეტოქეზე უკეთ გამოვიყურებოდით და იმედი გვქონდა, რომ ეს წლეულსაც განმეორდებოდა. სამწუხაროდ, ასე არ მოხდა. დანარჩენ რგოლებში კი დაახლოებით თანაბრად ვითამაშეთ".

V ტური

ბელგია-ესპანეთი 18:10
გერმანია-რუსეთი 3:57

თ მ ფ წ ბ ქ(პ)
1. საქართველო 5 5 0 0 +153 24(4)
2. რუმინეთი 5 3 0 2 +118 14(2)
3. ესპანეთი 5 3 0 2 +72 13(1)
4. რუსეთი 5 2 0 3 +58 11(3)
5. ბელგია 5 2 0 3 -76 9(1)
6. გერმანია 5 0 0 5 -325 0(0)

ყოველდღიური სპორტული გაზეთი "ლელო"
1195
მკითხველის კომენტარები / 0 /
მსგავსი ამბები
რუბრიკის სხვა სიახლეები
;