ვულკანი ბოისა

ინტერნეტში, რომელიმე საძიებო საიტზე ლათინური ასოებით ჩავწეროთ ბოისა. შევხვდებით ვლადიმერ ბოისას, საქართველოს ნაკრების ყოფილ კალათბურთელს.

ვლადიმერ ბოისა

დაიბადა: 4.07.1981
სიმაღლე: 205 სმ
პოზიცია: ფორვარდი
თამაშობდა
1995, 96-98 რუსთავის "აზოტი"
1996 თბილისის "ვითა"
1998-99 სლოვენიის "პოსტოინა"
1999-01 სლოვენიის "სლოვანი"
2001-05 სლოვენიის "ოლიმპია"
2005-07 იტალიის "მონტეპასკი"
2007 რუსეთის "სპარტაკ-პრიმორიე"
2008 საბერძნეთის "არისი"
2008-09 ესპანეთის "მენორკა"
2009-10 ხორვატიის "ზადარი"
2010-11 სლოვენიის "ოლიმპია"
2012 საბერძნეთის "პანიონიოსი" 
2012 საქართველოს "არმია"
მიღწევები
საქართველოს ნაკრების წევრი 1998-2011
ადრიატიკის ლიგის ჩემპიონი (2002) და მეორე პრიზიორი (2011)
იტალიის ჩემპიონი (2007)
სლოვენიის სამგზის ჩემპიონი (2002, 2004, 2005), მეორე (2003, 2011) და მესამე პრიზიორი (2001)
სლოვენიის თასის ოთხგზის მფლობელი (2002, 2003, 2004, 2011)
სლოვენიის "ყველა ვარსკვლავის" მატჩების ოთხგზის მონაწილე (2002-05)

საქართველოს ნაკრებში
52 მატჩი
1264 წუთი (24.3)
505 ქულა (9.7)
217 მოხსნა (4.2)

ძიება განვაგრძოთ. საიტზე ბოისას ფოტოები გადავათვალიეროთ, გავიხსენოთ რომელ გუნდებში უთამაშია... მაგრამ ვულკანის სურათს აქ რა უნდა? წარწერაც აქვს: ვულკანი ბოისა, მდებარეობს პაპუა ახალ გვინეაში, დღესაც მოქმედია...

ერთი შენიშვნა: ვოვა ბოისა უკვე ჩამქრალი "ვულკანია", კარიერა 2012 წელს დაასრულა. მათ, ვისაც ასეთი შედარება გადამეტებულად მოეჩვენა, გავიხსენებ, რომ ვოვა ბოისას საუკეთესო წლებში ერთი თვისება ჰქონდა - გუნდურად თამაშობდა, საკუთარი მონაგარის შევსებაზე არ ზრუნავდა, მაგრამ თუ შეატყობდა, რომ მის გუნდს არაფერი გამოსდიოდა, უმალ ფეთქდებოდა.

აი, ორი მაგალითი:

2005 წელს, როცა თბილისურ მატჩში მაკედონიამ თამაში ააწყო და წაგების საფრთხის წინაშე აღმოვჩნდით, ვოვამ ზედიზედ ორჯერ ჩაჭრა ბურთი საკუთარ საჯარიმოსთან, ორივეჯერ სწრაფად გადალახა მთელი პერიმეტრი და ერთმანეთზე ეფექტური ჩატენვებით გუნდიც და სავსე ტრიბუნებიც აანთო. ის მატჩი საქართველოს ნაკრებმა 70:63 მოიგო. ვოვამ 20 ქულა ჩააგდო.

ახლა ევროლიგური მაგალითი. სლოვენიის "ოლიმპიას" ბოლო წლების ერთ-ერთი ყველაზე წარმატებული სეზონი 2003-04 იყო, როცა გუნდმა ითამაშა ევროლიგის ტოპ-16-ში, რომლის კარი სლოვენიელებს ბოისამ გაუღო: პირველი ჯგუფური ეტაპის ბოლო ტურში ლიუბლიანელები ხორვატიის "ციბონას" შეხვდნენ. ტოპ-16-ის საგზურს გამარჯვებული იღებდა. 85:81 "ოლიმპიას" სასარგებლოდ. კაპიტან ბოისას წვლილზე მისი სიზუსტე მოგვითხრობს: 27 ქულა, 8-დან 8 ორქულიანი, 4-დან 3 სამიანი, 4-დან 2 საჯარიმო.

2010 წელს ვოვა "ზადარს" ხორვატიის ჩემპიონობისკენ მარტო მიუძღოდა, უფრო სახელოვან "ციბონასთან" სერიაში 2:1 დააწინაურა კიდეც, მაგრამ... რა მოხდა შემდეგ, ამაზე ქვემოთ დავწერთ. აქ კი ყურადღებას გაგამახვილებინებთ ერთ დეტალზე: 2004-დან 2010 წლამდე ბოისა ევროპის ტოპ-ლიგებში თამაშობდა, მოიარა იტალია, საბერძნეთი, რუსეთი, ესპანეთი.

როგორ ახერხებდა ათწლეულის განმავლობაში ევროპელი სკაუტებისთვის საინტერესო კალათბურთელად დარჩენას? პასუხი მარტივია, კარიერის თითოეულ წელს საფეხურად იყენებდა. თითოზე ასვლა დიდი ოფლის ფასად უჯდებოდა...



აზოტიდან სლოვანამდე

პატარაობაში ვლადიმერ ბოისა ცურვაზე დადიოდა, თუმცა ცოტა რომ წამოიზარდა, გენებმა გუნდური სპორტისკენ უბიძგეს: მშობლები ყოფილი ფრენბურთელები არიან და ვოვამ რუსთავში ერთ-ერთი ყველაზე პოპულარული სპორტი კალათბურთი აირჩია.

თინეიჯერულ ასაკში რუსთავის "აზოტის" შემადგენლობაში კორაჩის თასზეც ითამაშა (საშუალოდ 16.5 ქულა), საქართველოს სხვადასხვა ასაკობრივ ნაკრებში მისი მონაგარი 11 ქულას არ ჩამოსცილებია. ყველაზე ეფექტურად კი 1998 წელს იუნიორთა ევროპის ჩემპიონატის შესარჩევი ეტაპი ჩაატარა, სადაც საშუალოდ 25 ქულამდე ავიდა და სლოვენიური "სლოვანისგან" კონტრაქტი დაიმსახურა.

პირველ წელს ვოვამ განათხოვრების წესით "პოსტოინაში" ითამაშა, მომდევნო ორი წელი კი "სლოვანში" გაატარა და 2001-ში კორაჩის თასზე 13.3 ქულამდეც ავიდა. სლოვანის ღირსებას ბოისასთან ერთად ნიკა ცქიტიშვილი, დავით უგრეხელიძე და იაკა ლაკოვიჩი იცავდნენ.

ოლიმპია

შეიძლება თამამად ითქვას, რომ ევროლიგის ბინადარმა "ოლიმპიამ" ბოისა "სლოვანს" ხელიდან გამოგლიჯა, საქმე სასამართლომდეც კი მივიდა.

ვოვაც სწორედ "ოლიმპიაში" ჩამოყალიბდა ევროლიგის კალიბრის კალათბურთელად. მისი ზრდის მიხედვით საევროლიგო ქულები მეტყველებს:

2001/02 - 8.3 წუთი, 2.8 ქულა.
2002-03 - 21.4 წუთი, 8.5 ქულა.
2003-04 - 27.9 წუთი, 9.3 ქულა.
2004-05 - 33.4 წუთი, 15.8 ქულა.

- "სლოვანიდან" "ოლიმპაში" 2001 წელს გადავედი. ამ გუნდთან ერთად ზედიზედ ოთხჯერ ვითამაშე ევროლიგაზე. 2004 წელს ტოპ-16-შიც გავედით. მაშინ უკვე გუნდის კაპიტანი ვიყავი. "ოლიმპიაში" 2010-11 წლების სეზონში დავბრუნდი და დიდი ხნის შესვენების შემდეგ კვლავ ევროლიგის მეორე ეტაპზე აღმოვჩნდით. სლოვენიაში

გატარებულმა წლებმა ბევრი მასწავლა, ევროლიგაზე "ბარსელონას", "მაქაბის" და სხვა გრანდებს ვეთამაშებოდით და დიდი გამოცდილებაც მივიღე, - მოგვითხრობს ვოვა.



მონტეპასკი

ვლადიმერ ბოისა მონტეპასკის მაისურითსლოვენიის შემდეგ საჭირო იყო ახალი საფეხური, მაგალითად იტალიის ჩემპიონი, "მონტეპასკი", რომელშიც ბოისამ 2005-07 წლები გაატარა.

- 2007 წელს იტალიის ჩემპიონობა მოვიპოვე. საერთოდ, სიენასთან თბილი მოგონებები მაკავშირებს. "მონტეპასკი" ევროლიგაზე მაღალი მიზნებისთვის იბრძოდა და ამ გუნდში გადასვლა წინგადადგმული ნაბიჯი იყო, - იხსენებს კალათბურთელი.

თუმცა მეორე სეზონში მწვრთნელი შეიცვალა, გუნდში სიმონე პიანიჯანი მივიდა, რომელიც თამაშს უფრო ამერიკელებზე აწყობდა და ბოისასაც დრო იმდენი არ ჰქონდა, რამდენიც სასურველი იყო. ამიტომ მან გუნდის გამოცვლა გადაწყვიტა.


სპარტაკი

ოვამ იტალიიდან უკიდურეს აღმოსავლეთს მიაშურა - იაპონიის ზღვის სანაპიროზე მდებარე ვლადივოსტოკის "სპარტაკ-პრიმორიეში" ჩაირიცხა.

- ამ გუნდში იმიტომაც წავედი, რომ ევროჩელენჯზე აპირებდა გამოსვლას, თუმცა ბოლო მომენტში კლუბის მესვეურები ფიბა-ევროპასთან ვერ შეთანხმდნენ და ევროპაზე ვერ გავედით. არადა ევროჩელენჯის მატჩების მოსკოვში გამართვას ვაპირებდით. "სპარტაკ-პრიმორიეში" შესანიშნავი პირობები მქონდა, ბიზნეს-კლასით ვმგზავრობდით.
ვოვას ხელფასიც მაღალი დაუნიშნეს, მაგრამ ზამთარში მაინც გუნდის დატოვება ამჯობინა.

არისი

- 2007-08 წლების სეზონის შუაში საქართველოს ნაკრების თავკაცმა გორდონ ჰერბერტმა "არისში" მიმიწვია და საბერძნეთში გადავედი. გუნდი ევროლიგაზე გამოდიოდა და ტოპ-16-შიც მოხვდა. შიდა ჩემპიონატში კი პლეი ოფის საწყის ეტაპზე მოულოდნელად "მარუსისთან" დავმარცხდით.

ასე დასრულდა ვოვასა და ჰერბერტის ბერძნული "მითი". ამის შემდეგ გორდონმა ჩრდილოეთისკენ აინაცვლა - ფინეთში წავიდა. ბოისა კი ევროპის საუკეთესო ლიგაში გადაბარგდა...



მენორკა

ვოვა ესპანურ "მენორკაში" ჩაირიცხა. მშვენიერი ლიგა, მშვენიერი საკურორტო კუნძული, მაგრამ... გუნდმა 2008-09 წლების სეზონი არასახარბიელოდ დაიწყო და ქართველ ფორვარდს ზედიზედ მესამედ მოუწია შუა სეზონში გუნდის დატოვება.

ზადარი

2010 წლის თებერვალში ესპანეთიდან წამოსულს რომ დავუკავშირდი, ბოისამ მითხრა:

- მიუხედავად იმისა, რომ წამყვან ლიგებში ვარ, მომწყინდა ყოველწლიურად გუნდების ცვლა, მინდა ისეთ კლუბში ვითამაშო, ლიდერის თვისებებს რომ გავიხსენებ.
ასეთი გუნდი ხორვატიის "ზადარი" აღმოჩნდა, რომელშიც ვოვას ძველი ნაცნობი ზმაგო საგადინი მუშაობდა.

- ბოისა ჩემი აღზრდილია, კარგად ვიცი რაც შეუძლია და მასთან ერთად მაღალ მწვერვალებსაც მივაღწევ, - აღნიშნა პრეზენტაციისას საგადინმა.

2010 წელს მისი გუნდი ხორვატიის ჩემპიონობასთან ძალიან ახლოს იყო, ბოისამ კი ხუთწლიანი შესვენების შემდეგ პირველად გადალახა სეზონის საშუალო ათქულიანი ბარიერი (13.0), თუმცა მოხდა მეტად არასასიამოვნო რამ:

- ხორვატიის ჩემპიონატის ფინალური სერიის მეოთხე მატჩში მუხლის მყესი გამიწყდა. სერიაში 2:1-ს ვიგებდით. მეოთხე შეხვედრაში წარმატების შემთხვევაში ჩემპიონები გავხდებოდით. მაშინ მართლაც კარგ ფორმაში ვიყავი, მაგრამ სერიოზული ტრავმა მივიღე, გუნდმა ორივე მატჩიც დათმო და ჩემპიონობაც. ოპერაციის შემდეგ, ფაქტობრივად, ერთი წელი გამიცდა.



სლოვენიიდან საქართველომდე

ვლადიმერ ბოისა 2011 წელს "ოლიმპიაში" დაბრუნდა, სადაც გიორგი შერმადინი დახვდა. მათმა გუნდმა ევროლიგის ტოპ-16-ში კი ითამაშა, ვოვასაც საკმარისი დრო ჰქონდა, მცირე ხნით საბერძნეთის "პანიონიოსშიც" გადავიდა და ქართულ "არმიას" ევროჩელენჯზეც დაეხმარა, მაგრამ ხორვატიაში მიღებული მძიმე ტრავმის შემდეგ ჩვეული ფორმის აღდგენა ვერ მოახერხა.

ვოვამ კარიერაში ბევრი ოცნება აიხდინა ერთის გარდა: 2013 წელს სლოვენიაში გამართულ ევრობასკეტზე საქართველოს ნაკრების მაისურით სურდა გამოსვლა. უნდოდა, კარიერა მეორე სამშობლოში, სლოვენიაში სანაკრებო მატჩით დაემთავრებინა, მაგრამ ევრობასკეტს მხოლოდ მაყურებლის სტატუსით დაესწრო...

არადა, ევროპის ჩემპიონატზე თამაში თუ არ მოუწევდა, 7 სექტემბერს სლოვენიასთან მატჩისას ამწვანებული, სავსე ტრიბუნების წინაშე თუნდაც იმის გამოცხადება, რომ ბოისა კარიერას ამთავრებს ბევრ ფერადოვან გაცილების მატჩს აჯობებდა.

3321
მკითხველის კომენტარები / 0 /
მსგავსი ამბები
რუბრიკის სხვა სიახლეები
;