ვღელავთ, როგორც დუელის წინ... ყაზახებთან დიდი მატჩი გველის

ამ ზაფხულს საქართველოს ეროვნული ნაკრების არაერთმა ფეხბურთელმა შეიცვალა კლუბი.

ალბათ, დადგა დრო მიმოვიხილოთ იმ ფეხბურთელების ტრანსფერები, რომლებიც ჩვენი ქვეყნის უპირველესი გუნდის ღირსებას იცავენ. მათი თამაში ნაკრებში მნიშვნელოვნადაა დამოკიდებული მათ საკლუბო მომავალზე.

შემოდგომას კი ქართული საფეხბურთო თემი განსაკუთრებული მოლოდინით ელის. გადაჭარბების გარეშე შეიძლება ითქვას, რომ ერთა ლიგის კარსმომდგარი გათამაშება ჩვენი ფეხბურთისთვის ძალიან ბევრ რამეს გადაწყვეტს...

გიორგი ლორია
ანჟი-კრილია სოვეტოვი

დაახლოებით იმავე დონის გუნდში დაბრუნდა, სადაც წინა სეზონში თამაშობდა. ამ დროისთვის, გიორგი ლორია სამარული კლუბის სათადარიგო მეკარეა. ეს ნამდვილად არაკანონზომიერია. ლორია თავისი გამოცდილებითა და სათამაშო კლასით აშკარად იმსახურებს არათუ პირველნომრობას, ალბათ, უფრო მეტსაც, ვიდრე "კრილია სოვეტოვია".

გურამ კაშია
ვიტესი-სან ხოსე

"სან ხოსე" ამერიკული MLS-ის კლუბია. ამერიკულ ლიგაში არაერთი ვარსკვლავი თამაშობს. რაღა შორს წავიდეთ, მხოლოდ ზლატან იბრაჰიმოვიჩის, უეინ რუნის, ბასტიან შვაინშტაიგერისა და სებასტიან ჯოვინკოს დასახელებაც იკმარებს.

გურამ კაშიამ თავისი ღრმა კვალი დატოვა "ვიტესში". დადგა კლუბის შეცვლის დროც. დავიწყოთ იქიდან, რომ ჩემი სუბიექტური აზრით, ამერიკული ლიგა ჰოლანდიისას სჯობს.

მეორეც, გურამი ახლა იმ ასაკშია, რომ მისთვის ფინანსური ფაქტორიც მნიშვნელივანი უნდა იყოს. მესამე და მთავარი - კაშია მოაზროვნე, მუდამ სიახლის მაძებარი კაცია და მას, ცხადია, აინტერესებს ახალი კულტურის, ახალი ცხოვრების წესის შეცნობა.

დასაწყისი მშვენიერი იყო - ის MLშ-ის ტურის ნაკრებში მოხვდა, სათადარიგოდ, მაგრამ მაინც. ფაქტია, ერთა ლიგაში კაშია ულაპარაკოდ უნდა იყოს საქართველოს ეროვნული ნაკრების ერთ-ერთი ლიდერი - ფეხბურთელი, ვინც არცთუ იშვიათად შეასრულებს მინდორზე მწვრთნელის ფუნქციას.

გიორგი ნავალოვსკი
სკა ენერგია-დინამო (მინსკი)

კარგი იქნებოდა, ჩვენი განმარტების მეორე ნაწილში "მინსკის" მაგიერ ფრჩხილში "თბილისი" დაგვეწერა, მაგრამ რას ვიზამთ. დღევანდელი რეალობაა, რომ ქართული კლუბები, თუნდაც ფინანსური თვალსაზრისით, ახლოსაც ვერ მივლენ ბელარუსის გუნდებთან და მათსავით არც საკლუბო მენეჯმენტი უვარგათ.

"სკა ენერგია" რუსეთის პრემიერლიგიდან გავარდა და, რა გასაკვირია, რომ გიორგი ნავალოვსკიმ გუნდი დატოვა. ბელარუსის ერთ-ერთ საუკეთესო გუნდში გადასვლა მისთვის აშკარად წინგადადგმული ნაბიჯია. რა თქმა უნდა, ევროპული მასშტაბით გრანდი არ არის, მაგრამ შეკრული გუნდია.

ყველას კარგად გვახსოვს, ორი მატჩის ჯამში რა დღე აყარეს ბელარუსებმა ცოტა ხნის წინ ევროპალიგაზე თბილისის "დინამოს" მძლეველ "დუნაისკა სტრედას".

გიორგი აბურჯანია
სევილია B-ლუგო

"სევილიას" მეორე გუნდი სეგუნდა დივიზიონიდან გავარდა, გიორგი აბურჯანია კი ქართველთათვის უკვე შინაურ ლიგაში დარჩა და ეს თავისთავად კარგია. "ლუგოში" ის ხალხი მუშაობს, ვინც ძალიან კარგად იცის აბურჯანიას დადებითი მხარეების შესახებ და ესეც კიდევ ერთი პლუსია. უნდა ვივარაუდოთ, რომ 23 წლის ნახევარმცველს მომავალ სეზონში უწყვეტი სათამაშო პრაქტიკა ექნება.

"ლუგო" კი თანდათან იზრდება. კლუბს თავის არცთუ მდიდარ ისტორიაში არასოდეს უთამაშია პრიმერაში და ვნახოთ, იქნებ ნავსი ახლა გატყდეს. ყოველ შემთხვევაში, როგორც თავად აბურჯანიამ გვითხრა, გუნდის მიზანი სწორედაც რომ ესპანურ საფეხბურთო ელიტაში აღზევებაა.

ოთარ კიტეიშვილი
დინამო (თბილისი)-შტურმი

რა თქმა უნდა, ყოველთვის გვწყდება გული, როცა საქართველოს ჩემპიონატს გამორჩეული ფეხბურთელი ტოვებს. ასე იყო ოთარ კიტეიშვილის შემთხვევაშიც. მეორე მხრივ, საქართველოს ერთ-ერთმა ყველაზე იმედის მომცემმა მოთამაშემ ყველაფერი გააკეთა საქართველოს ყველაზე ტიტულოვანი კლუბისთვის.

ვისაც ბოლო დროს ჩვენს ჩემპიონატში კიტეიშვილის თამაში უნახავს, დაგვეთანხმება - საქართველოს ეროვნული ლიგისთვის ის უკვე გადაზრდილია და მისი ნიჭი ითხოვდა სრულიად ახალ ასპარეზს. სასიხარულოა, რომ მან ეს ასპარეზი მიიღო.

"შტურმი" არ არის ევროპული გიგანტი, მაგრამ ნურც იმას დავივიწყებთ, რომ საქართველოს ჩემპიონატიდან ევროპულ გრანდში პირდაპირ მოხვედრა შეუძლებელია. ჩვენს წამყვან ფეხბურთელებს ამისთვის ტრამპლინი მაშინაც სჭირდებოდათ, როცა საქართველოს პირველობა რაღაცას ჰგავდა და ჩვენი ფეხბუთელებიც მეტად დაფასებულები იყვნენ ევროპულ ასპარეზზე.

"შტურმმა" მიმდინარე სეზონში ითამაშა ჩემპიონთა ლიგაში და "აიაქსთან" მარცხის შემდეგ ევროპალიგაზე გადაინაცვლა. ეს არის გუნდი, საიდანაც ერთი ნაბიჯია ევროპის ტოპჩემპიონატებამდე, ვთქვათ, გერმანულ ბუნდესლიგამდე.

სათვალავშია ჩასაგდები ისიც, რომ ქართველ ფეხბურთელებს ამ ავსტრიულ კლუბში ყოველთვის ძალიან კარგად მისდიოდათ საქმე. სწორედ აქ თამაშისას ედგათ კარიერის საუკეთესო პერიოდი დავით მუჯირს, გიორგი ფოფხაძეს, ილია კანდელაკს...

ჯაბა ჯიღაური
ორდაბასი-გრენობლი

"ორდაბასი" ყაზახეთის ჩემპიონატის უმაღლეს ლიგაში თამაშობს, "გრენობლი" კი - საფრანგეთის პირველობის რანგით მეორე ლიგაში თამაშობს. ამის მიუხედავად, ჯაბა ჯიღაურის კარიერისთვის ეს მხოლოდ წინგადადგმული ნაბიჯია.

ზოგადად, მისი კარიერა კარგად მიდის. მაკედონიურ "ვარდარში" ყოფნისას ამ გუნდის ერთ-ერთი ლიდერი გახლდათ და ევროპალიგის ჯგუფშიც ითამაშა. საფრანგეთის ლიგა 2 მშვენიერი შანსია იმისთვის, რომ კარიერა უფრო მაღალ დონეზე, თუნდაც საფრანგეთის მთავარ ლიგაში გააგრძელო.

გიორგი ქვილითაია
რაპიდი-გენტი

ბელგიის ჩემპიონატი, ალბათ, ოდნავ უკეთესია ავსტრიისაზე. თანაც, "გენტში" უკვე სამი ქართველია და გადაჭრით შეგვიძლია იმის თქმა, რომ მინიმუმ ორი მაინც გაატარებს იქ მთელ სეზონს. ალბათ, ეს იყო გიორგი ქვილითაიას მოტივაცია ახალი კლუბის შერჩევისას. მას რაც შეიძლება მალე უნდა ვუსურვოთ ტრავმის მორჩენა და ოპტიმალური სათამაშო ფორმის დაბრუნება. ასეთ ფორმაში მყოფ ქვილითაიას გოლი გოლზე გაჰქონდა მოწინააღმდეგის კარში, როცა "რაპიდის" მაისურა ემოსა. სწორედ ასეთი ქვილითაია სჭირდება ერთა ლიგაზე საქართველოს ნაკრებს.

ნიკა კაჭარავა
კორონა-ანორთოსისი

ცოდვა გამხელილი სჯობს - ნიკა კაჭარავას შემთხვევაში, უკეთეს ტრანსფერს ველოდით, მაგრამ ისიც უნდა გვახსოვდეს, რომ ქართველი ფეხბურთელებისთვის "ანორთოსისი" ძალიან ახლობელი კლუბია და იქ ტრანსფერი შედარებით იოლია. ცუდი ის არის, რომ კაჭარავასა და კიდევ ერთი ქართველის, ბექა მიქელთაძის გუნდმა როგორღაც მოახერხა და ევროპალიგას ალბანურ "ლაჩისთან" ორმატჩიან დუელში გამოეთიშა.

ასეა თუ ისე, არ გვტოვებს იმის შეგრძნება, რომ კაჭარავას, მისი საფეხბურთო ნიჭის გათვალისწინებით, აშკარად უკეთეს კლუბში შეუძლია თამაში, ვიდრე "ანორთოსისია".

ბაჩანა არაბული
ბალმაზივაროში-პუშკაშ აკადემია

"ბალმაზივაროშში" საქართველოს ნაკრების შემტევი ლიდერად მოგვევლინა. ალბათ, მას ამის გაკეთება უნგრული მასშტაბებით გაცილებით უკეთეს და ამბიციურ "პუშკაშ აკადემიაშიც" თავისუფლად შეუძლია. ზოგადად, ბაჩანა არაბული ძალიან კარგად მოერგო უნგრეთის ჩემპიონატს და არ უნდა გაგვიკვირდეს, ერთ დღესაც იქაურ გრანდში რომ აღმოვაჩინოთ. ამის პოტენციალი მას აშკარად აქვს.

ბუდუ ზივზივაძე
ესბიერგი-დინამო (თბ)

ბუდუ ზივზივაძე, ალბათ, ერთადერთი გამონაკლისი იყო თბილისის "დინამოს" ფეხბურთელებიდან, რომლის გარჯაც ევროთასებზე, ასე თუ ისე, დადებითად შეიძლება შეფასდეს. ყოველ შემთხვევაში, კარგად გვახსოვს, რომ მან "დუნაისკა სტრედას" გასვლაზეც გაუტანა და შინაც. დანიიდან საქართველოში დაბრუნება, ზოგადად, ვერ ჩაითვლება კარიერულ წინსვლად, მაგრამ "დინამო" მაინც "დინამოა", ზივზივაძე კი, ალბათ, ბევრს გაიტანს საქართველოს ჩემპიონატის დარჩენილ მატჩებში და სანაკრებო ამბიციაც ექნება.

ლადო დვალიშვილი
აშქელონი-საბურთალო

საქართველოს ნაკრების სტაჟიანი წევრი ისრაელიდან სამშობლოში დაბრუნდა. გამოცდილ შემტევს ქართულ საფეხბურთო თემში კრიტიკოსები არ აკლია. გასაგებია, რომ მას ყოველთვის იდეალურად არ გამოსდის ნაკრებში თამაში, მაგრამ, რატომღაც, მჯერა, რომ ისტორიაში პირველი საჩემპიონო ტიტულისთვის შემართულ "საბურთალოს" დიდ სარგებლობას მოუტანს.

ყოველდღიური სპორტული გაზეთი "ლელო"
3701
მკითხველის კომენტარები / 1 /
Forcajuve
0
ragadrois dvaloshvilia?ahen rames zoar gixdis dvalishvili?arabidze rayo araxsene?zsicxem.shehaguxa getyoba
მსგავსი ამბები
რუბრიკის სხვა სიახლეები
;