ვცდილობდი, ამაზე არ მეფიქრა... ინტერვიუ გენო პეტრიაშვილთან

გორელი ფალავანი გენო პეტრიაშვილი (125 კგ) რამდენიმე დღის წინათ, პოლონეთში 23-წლამდელთა შორის გამართული მსოფლიოს ჩემპიონატის გამარჯვებული გახდა.

- თ/ჭ. 23-წლამდელთა მსოფლიოს ჩემპიონატი: გამოცხადებული გამარჯვების ქრონიკა [VIDEO]

გენომ უკანასკნელ სამ თვეში ორჯერ შეძლო მსოფლიოს ჩემპიონის ტიტულის მოპოვება. მოგეხსენებათ, სწორედ სამი თვის წინათ, მან დიდებში ტრიუმფალურად ჩაამთავრა მსოფლიოს ჩემპიონატი პარიზში და იქიდანაც ოქროს მედლით დაბრუნდა.

პოლონეთიდან, მსოფლიოს ჩემპიონის კიდევ ერთი ოქროს მედლით დაბრუნებული გენო პეტრიაშვილი შეჯიბრების პერიპეტიებზე გვესაუბრა:

- გენო, 23-წლამდელთა შორის მსოფლიოს ჩემპიონატზე საასპარეზოდ უკვე დიდებში მოპოვებული მსოფლიოს ჩემპიონის ტიტულით წახვედით. მოტივაციისთვის და სათანადოდ მოსამზადებლად ხელს ხომ არ გიშლიდათ გაცილებით უფრო წონადი ტიტული?
- დიდებში მოქმედი მსოფლიოს ჩემპიონობის მიუხედავად, ვცდილობდი, გონებაში არ გამეკარებინა აზრი, რომ 23-წლამდელებში იგივეს მიღწევა ადვილი იქნებოდა. პასუხისმგებლობით მივუდექი საქმეს, მოსამზადებელი შეკრება, რომელიც ბორჯომში ნაკრების მთავარი მწვრთნელის, ზურაბ ჭიღლაძის ხელმძღვანელობით გავიარეთ, ნაყოფიერი გამოდგა. უშუალოდ შეჯიბრებაზე გამგზავრების წინ ვგრძნობდი, რომ კარგ ფორმაში ვიყავი და პოლონეთშიც ყველა მეტოქესთან დაპირისპირებას სრული სერიოზულობით მივუდექი.

შესამჩნევი გახლდათ ისიც, რომ მეტოქენი სწორედ ჩემთან გამოდიოდნენ ყველაზე მობილიზებულნი, თუმცა ეს ლოგიკურიცაა - მოგება და ქულების ართმევა ხომ ზუსტად ჩემპიონთან უფრო ძვირფასი და სასიხარულოა.

- და ქულები ხომ არც აურთმევიათ - ოთხივე მეტოქესთან ერთად 45 ქულა დააგროვეთ და დაკარგეთ ერთადერთი...
- სამაგიეროდ, ვერ შევასრულე ჩემი პირადი მწვრთნელის, ნუგზარ სხირელის დავალება. ის ჩემგან ჩემპიონატის ისე მოგებას ითხოვდა, რომ არცერთი ქულა არ უნდა დამეკარგა. ფინალის შემდეგ მეხუმრა კიდეც ეს ოქრო კარგია, მაგრამ ის ერთი ქულა რატომ დაკარგეო.

- დასაწყისში ორი მეტოქე აზიელი იყო - იაპონელი იამამოტო და ჩინელი ჟი ჰუ. განსხვავდებიან ისინი სტილით სხვა კონტინენტის წარმომადგენელი მოჭიდავეებისაგან?
- ვერ ვიტყვი, რომ რამე განსხვავებული სტილით გამოირჩევიან აზიელები. ყოველ შემთხვევაში, მძიმე წონაში ასე არაა. იამამოტო და ჰუ სუსტი მოჭიდავეები არ ყოფილან, მაგრამ მეც სათანადო შემართებით დავხვდი და არ მივეცი ქულის აღების საშუალება.

- ის ერთადერთი ქულა ამ ჩემპიონატზე ნახევარფინალში უკრაინელ დანილო კარტავისთან დაკარგეთ, რომელსაც ადრეც არაერთხელ შეხვედრიხართ...
- კარტავისთან წლეულსაც და შარშანაც რამდენჯერმე მომიწია ჭიდაობამ და ყველა მათგანი გამარჯვებით დავასრულე. ის ფიზიკურად ძლიერი მოჭიდავეა, ამასთან, სულ ჩასაფრებულია და მოწინააღმდეგე თუ ფხიზლად არ იქნება, ქულებს აუცილებლად დააკარგვინებს. ალბათ, შემთხვევითი არ ყოფილა, რომ ერთადერთი ქულა პოლონეთის არენაზე ჩემთან სწორედ მან აიღო, თუმცა იმ ეპიზიდში ჩემი ბრალი იყო, ფეხი ცუდად გავაცალე და უკრაინელმაც ამით კარგად ისარგებლა.

- რუს მაგომედამინ დიბიროვთან ოქროს მედლისთვის პაექრობას როგორ გაიხსენებთ?
- დიბიროვი ევროპის ორგზის ჩემპიონია ახალგაზრდებს შორის. ამ ტიტულებში ჩანს მისი შესაძლებლობებიც. ვფიქრობ, პერსპექტიული მოჭიდავეა, გრძნობს ასპარეზობისას შეტევის თუ თავდაცვის დროულ საჭიროებას. საჩემპიონო შეხვედრაში ჩემთანაც კარგად დაიწყო, თუმცა მე მაქსიმალურად ვიყავი განწყობილი იმისათვის, რომ ეს ჩემპიონატი ოქროს მედლით დამესრულებინა.

შრომა არ მეზარება. ჩემს გასაკეთებელს სხვა არ გააკეთებს, ამიტომ, თუ ინერტულად ვივარჯიშებ და მწვრთნელების დავალებას სრულყოფილად არ შევასრულებ, ბუნებრივია, დავზარალდები

- ამ შეჯიბრებაშიც ხშირად იყენებდით ფეხში შესვლას, რომელიც თქვენთვის საყვარელი ფანდია.
- ჭიდაობისას მზად ვარ, სხვა ილეთებიც გამოვიყენო ქულების მოსაპოვებლად, თუმცა ფეხში შესვლით და შემდეგ დატრიალებით მართლაც ყველაზე მეტჯერ დავაგროვე ქულები პოლონეთის ხალიჩაზე.

- 2017 წელი მსოფლიოს ჩემპიონის მეორე ტიტულით დაასრულე, სამი თვის წინანდელ ჩემპიონობას დიდებში ახლა თანატოლებში მოჰყვა ტრიუმფი. წლევანდელ სხვა შედეგებსაც თუ გავითვალისწინებთ, თქვენი კარიერისთვის სტაბილურობაც უკვე დამახასიათებლად იქცა...
- შრომა არ მეზარება. ჩემს გასაკეთებელს სხვა არ გააკეთებს, ამიტომ, თუ ინერტულად ვივარჯიშებ და მწვრთნელების დავალებას სრულყოფილად არ შევასრულებ, ბუნებრივია, დავზარალდები. შესაბამისად, მონდომებით ვუდგები საქმეს და თუ სტაბილური ვარ, ან მოვუმატე, გულშემატკივარმა უნდა შეაფასოს. ისე კი ვერც ამჟამინდელი წარმატებებით ვიქნები ბოლომდე კმაყოფილი, რადგან წინ კიდევ ბევრი შეჯიბრებაა და მიზნები, რომლებიც დასახული მაქვს, უნდა შევასრულო.

- პოლონეთში თქვენს გარდა ოქრო ქართველთაგან ვერავინ აიღო, ბრინჯაოს მედალი კი სამი გვქონდა...
- ვფიქრობ, რომ სამივე ჩვენს მოჭიდავეს, რომლებმაც ბრინჯაოს მედლები დაისაკუთრეს, შეეძლოთ საჩემპიონო ბრძოლაში ჩაბმა. ფინალში უნდა ეჭიდავათ მირზა სხულუხიას (70 კგ), ავთანდილ კენჭაძესა (74 კგ) და ირაკლი მწითურსაც (86 კგ). არა უშავს, იშრომებენ და დაუფასდებათ მომავალში.

- მსოფლიოს ჩემპიონატზე რომელიმე მოჭიდავემ თუ დატოვა გამორჩეული შთაბეჭდილება?
- ძალიან მომეწონა 85 კგ-ში მოასპარეზე ალიხან ჯაბრაილოვი, რომელმაც შესანიშნავად იჭიდავა და თავის წონაში ოქროს მედლის მფლობელიც გახდა. ის საკმაოდ თავისუფლად, ლაღად ასპარეზობდა, სასიამოვნო იყო მისი ჭიდაობისთვის თვალის დევნება.

- გენო, თქვენი უმცროსი ძმის, კოტეს სპორტული ზრდის პროცესი, როგორ მოგწონთ?
- კოტე ჯერ მხოლოდ 11 წლისაა. ისიც ნუგზარ სხირელის დარბაზში ვარჯიშობს და ის გარემო, სადაც ბევრი წარმატებული სპორტსმენია, სადაც მეც გვერდით ვუდგავარ, რასაკვირველია, დადებითად უნდა წაადგეს. ამასთან, კოტე ძალიან მონდომებულია. ახლა პოლონეთიდან საჭიდაო ფორმის კომპლექტი ჩამოვუტანე და უნდა გენახათ, როგორ გაიხარა. ასეთი შენაძენი მისთვის მუდამ უძვირფასესია. კარგი იქნება, თუ მომავალში ისიც ისევე გამახარებს თავისი წარმატებებით, როგორც ჩემი გამარჯვებებით ახლა თავად ხარობს.

- უახლოეს შეჯიბრებაზე სად გიხილავთ?
- მე და ლადო ხინჩეგაშვილი ირანის ქალაქ კაშანის კლუბის რიგებში 7 დეკემბერს მსოფლიოს საკლუბო ჩემპიონატზე ვიასპარეზებთ. ჩვენი მიზანი გამარჯვებაა. სხვათა შორის, საკლუბო ჩემპიონატს თავისი ხიბლი და ჟინი ახლავს, თანაც ირანში ძალიან უყვართ ჭიდაობა, იქაური მაყურებელი საოცარად აზარტულია. მოჭიდავეს ასეთ სიტუაციაში მუდამ ეძალება ბრძოლის ჟინი.

ყოველდღიური სპორტული გაზეთი "ლელო"
2056
მკითხველის კომენტარები / 0 /
მსგავსი ამბები
რუბრიკის სხვა სიახლეები