ზაზა დოლიძე: არცერთი სამსახურიდან არავის გავუშვივარ...

მალე ფეხბურთის განვითარების ფონდს ახალი ხელმძღვანელი ეყოლება. ზაზა დოლიძემ თანამდებობიდან წასვლის თაობაზე დაწერა განცხადება. ის თბილისის "დინამოში" იმუშავებს და გენერალური დირექტორის უაღრესად საპასუხისმგებლო თანამდებობას ჩაიბარებს.

გუშინ "ლელო" ზაზა დოლიძეს დაუკავშირდა და ინტერვიუ ჩამოართვა მას.

- ბატონო ზაზა, ფეხბურთის განვითარების ფონდის ხელმძღვანელის თანამდებობა უკვე დატოვეთ?

- ოფიციალურად ჯერ ასე ვერ ვიტყვით. ორშაბათს დავწერე განცხადება თანამდებობიდან წასვლის თაობაზე. მინისტრმა უნდა დააკმაყოფილოს ჯერ. რამდენიმე დღეში ალბათ ოფიციალურად დაკმაყოფილდება ჩემი განცხადება.

- თქვენი წასვლა ამ თანამდებობიდან ცოტა მოულოდნელი იყო. ფონდს დაარსების დღიდან ხელმძღვანელობით...

- რატომ იყო მოულოდნელი? თბილისის "დინამო" ჩემი აზრით, საქართველოში ძალიან მაღლა დგას თავისი სტატუსით. ალბათ, ყველაზე მაღლა, რაც არსებობს ქართულ სპორტში... როცა საუბარია ასეთ თანამდებობაზე, ამაზე მეტი მოტივაცია რაღა გინდა. თანაც, უკვე 3,5 წლის განმავლობაში ვხელმძღვანელობდი ფონდს. მიმაჩნია, რომ საქმე საკმაოდ გავაკეთეთ. ბატონმა რომან ფიფიამ შემომთავაზა თანამშრომლობა და მეც მივიღე გადაწყვეტილება. სრული პასუხისმგებლობით გეუბნებით, არცერთი სამსახურიდან, სადაც აქამდე მიმუშავია, არავის გავუშვივარ.

- თუ ხართ ჩამოყალიბებული, რა იქნება თქვენი პირველი ნაბიჯი "დინამოში"?

- ასე გადაჭრით ვერ ვიტყვი სატელეფონო ინტერვიუში. შევხვდები უახლოეს მომავალში ბატონ რომანს და წარვუდგენ როგორც მოკლევადიან, ისე გრძელვადიან სამუშაო გეგმას.

- ფონდი ხომ არ გაუქმდება?

- არა, რას ამბობთ... პირიქით, იგეგმება მისი მოდერნიზაცია და კიდევ უფრო გაძლიერება. არის ახალი პროექტები, რომლებზეც ახლა ვერ ვისაუბრებ. მოვა დრო და შეიტყობთ ყველაფერს...

- რამდენად კმაყოფილი ხართ იმ მუშაობით, რომელიც აქამდე გასწიეთ?

- იმ კლუბებში, რომლებმაც იმუშავეს სწორად, შედეგი სახეზეა. უბრალოდ, არან ზოგიერთ კლუბებში ადამიანები, რომლებიც არ ფიქრობენ პროგრესზე. წარმატება რომ ვახსენე, თუნდაც, "საბურთალო" ავიღოთ. "შერიფს" ჩვენს ჩემპიონზე გაცილებით დიდი ბიუჯეტი აქვს, შედეგი კი სახეზეა. ჩვენს კლუბებს სწორად მუშაობა მართებთ, რადგან ფინანსურად კარგა ხანს ვერ გავეჯიბრებით, ვთქვათ,, თურქულ და უკრაინულ კლუბებს...

- ვინ იქნება თქვენი მენკვიდრე ფეხბურთის განვითარების ფონდში?

- ამ ეტაპზე ჩემს მოვალეობას ჩემი მოადგილე, გიორგი კალანდაძე შეასრულებს. ყველა წლევანდელი პროექტი დამტკიცებულია. ასე რომ, ჩემი აზრით, სიჩქარე საჭირო არაა. ისე კი, რა თქმა უნდა, ფონდს სჭირდება ახალი ხელმზღვანელი და ამ საკითხზე ერთობლივად იმუშავებენ.

ყოველდღიური სპორტული გაზეთი "ლელო"
1228
მკითხველის კომენტარები / 0 /
მსგავსი ამბები
რუბრიკის სხვა სიახლეები
;