ზაზა დოლიძე: ზოგჯერ იმაზე მეტ ხელფასს უნიშნავენ ფეხბურთელებს, ვიდრე გადახდა შეუძლიათ... 

საქართველოს ეროვნული ნაკრები ევროპის ჩემპიონატზე მოხვედრასთან ძალიან ახლოსაა. გადასადგმელია მხოლოდ ორი ნაბიჯი. ერთა ლიგაში ვლადიმირ ვაისის გუნდის წარმატებამ (მიუხედავად შესარჩევში ორი სასტარტო მარცხისა) მცირე ხნით უკანა პლანზე გადასწია ის პრობლემები, რომელიც ჩვენს ფეხბურთში დაგროვდა...

... ქართულ საკლუბო ფეხბურთში პრობლემები მართლაც თავზე საყრელადაა. ქართული საფეხბურთო კულუარები თვალუწვდენელი სივრცე სულაც არ არის და ახალი ამბავი აქ სწრაფად ვრცელდება. დღე არ გავა, არ გავიგოთ, რომ ამა თუ იმ კლუბში ხელფასი გვიანდება, რომ ამა თუ იმ კლუბში სავარჯიშო პროცესი ჩაშლის პირასაა და ასე შემდეგ...

არადა, არსებობს ქართული ფეხბურთის განვითარების ფონდი, რომელიც საკმაოდ სოლიდურ თანხას გამოდის ჩვენი საფეხბურთო სინამდვილის კვალობაზე. ფაქტია, ჩვენს საფეხბურთო მეურნეობაში არსებობს მთელი რიგი პრობლემებისა, რომელიც კლუბებში არასწორი მენეჯმენტითაა გამოწვეული.

ამ წერილში წაიკითხავთ ზოგიერთი ჩვენი კლუბის ხელმძღვანელის კომენტარს, იმ კლუბების, რომელთა კრიზისზეც პერიოდულად ისმის ხმები. ცუდია, რომ სხვა კლუბების მესვეურები დუმილს ამჯობინებენ. არადა, ფეხბურთელები თვეობით აუღებელ ხელფასებზე ჩივიან. ნათქვამია, ჭირმა თავი არ დამალაო. გასაგებია, რომ ზოგი იმიტომ მალავს რეალურ სიტუაციას, მისი გამოსწორების იმედი აქვს, ან არ აქვს და უბრალოდ, დროს წელავს, მაგრამ გვერწმუნეთ, ბატონებო, ეს საქმეს ვერ უშველის. ჭირი თავს მაინც არ დამალავს...

სიმართლე ითქვას, ამ წერილის სამზეოზე გამოსვლა დააჩქარა ქუთაისის “ტორპედოს” დღევანდელმა ყოფამ. საქართველოს ერთ-ერთი საუკეთესო კლუბი დაშლის პირასაა და ამაზე უარესი რაღა უნდა იყოს?!

“მიჭირს ამის თქმა, მაგრამ... შესაძლოა, მომდევნო მატჩამდე დავიშალოთ. რაც შეეხება ამ თამაშს, ჩვენი გუნდის ხასიათი ვერ იყო ისეთი, როგორიც ასეთი დაპირისპირების მოგებას სჭირდება”, - თქვა “საბურთალოსთან” წაგებული (2:3) მატჩის შემდეგ “ტორპედოს” მთავარმა მწვრთნელმა კახა ჩხეტიანმა.

ახლა კი დაპირებული კომენტარები ზოგიერთი ქართული კლუბის წარმომადგენლის. ეს ის კლუბებია, რომელთა კრიზისზეც ხშირად ლაპარაკობენ...

გეგი კიკაბიძე (“შევარდენი 1906-ის” დამფუძნებელი, გამგეობის წევრი): “სეზონის დასაწყისში კლუბში გარკვეული ინვესტიციები ჩაიდო და ფეხბურთის ფონდის მიერ გასაცემი სტიმულირების ბოლომდე ათვისება იგეგმება. ამ მომენტში არის გარკვეული დავალიანება, რომელიც უახლოეს პერიოდში იქნება გასტუმრებული. უნდა გავითვალისწინოთ ზოგადი ფონი და ეკონომიკური მდგომარეობაც. გარკვეული შეფერხებები გვაქვს, მაგრამ ეს მხოლოდ დროის ამბავია და სიტუაცია მალე გამოსწორდება.

“შევარდენს” საერთო ჭრილში ფინანსური პრობლემები არ ექნება. ეროვნულ ლიგაში გადასვლისთვის ვიბრძვით და კლუბის გეგმებში არამყარი ფინანსური გარემოს შექმნა არ შედის. გვყავს სპონსორი, რომლისგანაც ინვესტიციები ეტაპობრივად წამოვა და კლუბში არსებული ყველა დავალიანება გასტუმრებული იქნება.

არსებული ვითარების ფონზე გუნდში არის ერთსულოვნება, დიდი მოტივაცია და წარმატების სურვილი, რაც ყველაფერზე მაღლა დგას და ამგვარ მიდგომას სპორტში ყოველთვის დიდი მნიშვნელობა აქვს. ფეხბურთელებმაც, ადმინისტრაციამაც და კლუბის თითოეულმა თანამშრომელმაც იციან, რომ მენეჯმენტი დასახული მიზნის მისაღწევად ყველაფერს გააკეთებს. ხელმძღვანელობას და სტაფს შორის არის ნდობის და ურთიერთპატივისცემის იმდენად მაღალი დონე, რომ კლუბის მომავალთან დაკავშირებით კითხვის ნიშნები არავის გასჩენია”.

გურამ რუხაძე (“ვიტ ჯორჯიას” პრეზიდენტი): “აპრილის პირველი ნახევრის ჩათვლით ხელფასები დარიგებულია. უახლოეს მომავალში დარჩენილსაც დავარიგებთ. ასე რომ, ჩვენთან პრაქტიკულად არანაირი დავალიანება არ არსებობს”.

კახა ებრალიძე (“გურიას” დირექტორი): “ჩვენ გვქონდა დავალიანება ერთი ლეგიონერის და თან საკმაოდ სოლიდური - 140 ათასი. რაც დავალიანებებია დარჩენილი, ყველა ძველია. მე რომ მოვედი, დამხვდა”.

დავალიანება არსებობს ფოთის “კოლხეთშიც”. ქვედა ლიგებშიც მოიძებნებიან შეჭირვებული კლუბები. მოკლედ, ვითარება სახარბიელო ნამდვილად არ არის.

“ლელო” დაუკავშირდა ქართული ფეხბურთის განვითარების ფონდის ხელმძღვანელ ზაზა დოლიძეს:

“როგორც იცით, დღეს ქართულ ფეხბურთში არსებობს ორი სახეობის კლუბი - კერძო და სახელმწიფო. ჩვენ ვასრულებთ ჩვენს ვალდებულებას ბოლომდე. თუ ვინმე დაინტერესებული ადამიანი მოგმართავთ, შეგიძლიათ მობრძანდეთ და დოკუმენტურად ნახოთ.

რაც შეეხება ქუთაისის “ტორპედოს”. ამ კლუბის თვიური სახელფასო ბიუჯეტი სცდება 400 ათას ლარს და ამ შემთხვევაში არსებობს ვალდებულება კერძო სპონსორის მხრიდან. ეროვნული ლიგაში მოასპარეზე კლუბი იღებს 800 ათას ლარს და ხელფასებისთვის ნახევარზე მეტის გამოყენების უფლება არ აქვს. არის ხოლმე შემთხვევები, როცა კლუბებს არ აქვთ ფონდის ფულის გარდა არაფერი და მაინც იმაზე მეტ ხელფასებს ნიშნავენ, ვიდრე შეუძლიათ გადახდა. ამაზე ვმუშაობთ. გვაქვს გარკვეული სქემები და ეს საკითხი აუცილებლად უნდა მოგვარდეს.

ქვედა ლიგებში კარგი მდგომარეობაა. არის მხოლოდ უიშვიათესი გამონაკლისები. მაგალითად, ხობის “კოლხეთი”. იქაც იგივე პრობლემაა - დანიშნულია იმაზე მაღალი ხელფასები, ვიდრე ფონდის დაფინანსებით შეუძლიათ გადახდა...

ჩვენ ზუსტად გრაფიკის მიხედვით მივდივართ. ერთადერთი, ცოტა დავუგვიანეთ “შევარდენს” პრემიალური თანხის ჩარიცხვა, მაგრამ ამ წერილს რომ წაიკითხავს მკითხველი, თანხა უკვე ჩარიცხული იქნება. საქართველოს ფეხბურთის ფედერაციის რეკომენდაციით მოხდა ასე. ერთ-ერთი ფეხბურთელი, ლეგიონერი, თავის დროზე რაღაც საეჭვო თამაშთან იყო თითქოს დაკავშირებული. ვესაუბრე ფეხბურთის ფედერაციაში და ეს საკითხი აღარ დგას დღის წესრიგში. არაა დარეგისტრირებული ეს მოთამაშე კლუბში”, - გვითხრა ზაზა დოლიძემ.

ყოველდღიური სპორტული გაზეთი "ლელო"
1594
მკითხველის კომენტარები / 0 /
მსგავსი ამბები
რუბრიკის სხვა სიახლეები
;