ზაზა დოლიძე: მოთხოვნები კიდევ  უფრო გამკაცრდება და  სადღეგრძელოებს  აღარ დავიჯერებთ

"კლუბებისგან საბანკო გარანტიას ან კერძო კომპანიის თავდებობას მოვითხოვთ"

ზაზა დოლიძე კატეგორიულად უარყოფს, რომ ზოგიერთ კლუბში შექმნილი ფინანსური პრობლემები, მათ შორის, ქუთაისის “ტორპედოსა” და “ვიტ ჯორჯიაში” ფონდის მიზეზითაა გამოწვეული.

ამ და სხვა საინტერესო თემებზე ფეხბურთის განვითარების სახელმწიფო ფონდის ხელმძღვანელმა “ლელოსთან” ილაპარაკა...

- ზოგიერთ კლუბში არსებული შეფერხებების გამო, კითხვა გაჩნდა - ფეხბურთის განვითარების სახელმწიფო ფონდმა კლუბების წინაშე არსებული ვალდებულება შეასრულა?

- სრული პასუხისმგებლობით ვაცხადებ, რომ ფონდის მიერ აღებული ვალდებულებები სრულდება. ყველა კლუბს თანხა დროულად, ხელშეკრულებაში მითითებული პირობების მიხედვით ერიცხება.

- მათ შორის, “ვიტ ჯორჯიასა” და “ტორპედოშიც”?

- რა თქმა უნდა, აქ გამონაკლისები არ არსებობს. 

- მაშინ კლუბებში პრობლემები რატომ გაჩნდა?

- არის 5-6 კლუბი, ძირითადად, კერძო კლუბები, რომელთაც ჩვენ მიერ დარიცხული საბაზისო თანხის გარდა, დამატებით მოზიდული ფინანსების იმედი ჰქონდათ და სახელფასო ბიუჯეტიც სწორედ ამ იმედით გაზარდეს. მაგრამ დამატებითი თანხები ვერ მოიზიდეს და გამომდინარე აქედან, წარმოიქმნა დეფიციტი. ანუ ამ პრობლემებში ფონდის დადანაშაულება არასწორია. პირიქით, ფონდი და სახელმწიფო პროგრამა რომ არ ყოფილიყო, დღეს ბათუმსა და, ზოგადად, რეგიონებში საფეხბურთო ბუმი არ იქნებოდა.

კლუბების მფლობელები პირდაპირ აცხადებენ - რომ არა ეს პროგრამა, ფეხბურთის მიმართ ასეთი ინტერესი არ იქნებოდაო. კარგია, რომ ეროვნული ლიგის ამბები კარგად შუქდება, მაგრამ ფეხბურთს პრობლემებიც ახლავს და ეს მხოლოდ საქართველოში არ ხდება.

ჩვენ შემთხვევაში ეს კლუბების სუბიქტური მიზეზებითაა გამოწვეული და არა - სახელმწიფო პროგრამით. ჩვენ მხოლოდ ფონდის გამოყოფილ თანხებს ვაკონტროლებთ და არა - სპონსორულ და მეპატრონის სახსრებს. დისტანციურად კი ფონდის ზემოთ დაგეგმილი თანხების გაკონტროლება შეუძლებელია.

- არაუზრუნველყოფილი ხელფასების კონტროლი შეუძლებელია?

- ფეხბურთის ფედერაცია და ფონდი კლუბისგან პერსპექტიული ბიუჯეტის ფინანსურ გარანტიას მოითხოვს. ფონდის გარანტია მყარია, ხოლო ფონდის დაფინანსების ზემოთ აღებული ვალდებულებებისთვის მოთხოვნილი იქნება მყარი უზრუნველყოფა, საბანკო გარანტია ან კერძო კომპანიის თავდებობა.

სხვაგვარად, ფეხბურთის ფედერაცია კლუბს მოთამაშეთა რეგისტრაციის უფლებას არ მისცემს, ხოლო ფონდი ბიუჯეტს არ დაუფინანსებს. საერთოდ, მოთხოვნები კიდევ უფრო გამკაცრდება და არავის სადღეგრძელოებს აღარ დავიჯერებთ. 

- თუ საბანკო ან კერძო კომპანიის გარანტიის პირობებიც არ შეასრულეს, მაშინ კლუბს პასუხს ვინ მოსთხოვს? ფონდს არ აქვს იმის უფლებამოსილება, რომ ბანკი და კომპანიები აკონტროლოს...

- მაშინ გამკაცრებული იქნება ლიცენზირების მოთხოვნები და კლუბი ვალდებულებას თუ ვერ შეასრულებს, ეროვნულ ლიგაში თამაშის ლიცენზიასაც ვერ მიიღებს, შესაბამისად, ევროთასებზე მონაწილეობის უფლებასაც დაემშვიდობება. ლიცენზია ოთხ ლიგას ეხება, სადაც პროფესიული ფეხბურთია. 

- მართალია, თითქოს, ფონდიდან გამოყოფილი თანხიდან კლუბს სახელფასო ბიუჯეტში მხოლოდ 40 პროცენტის დახარჯვის უფლება აქვს?

- რა თქმა უნდა, ფონდის თანხებს ხარჯვის წესები აქვს, რომელსაც ჩვენ ვარეგულირებთ. ადრე ზოგიერთი კლუბი ამ თანხის 90 პროცენტს ხელფასებზე ხარჯავდა და ჩავთვალეთ, რომ ეს პროპორცია ფეხბურთის განვითარებისთვის საკმარისი არ იყო. ამიტომ წინ სხვა კომპონენტები წამოვწიეთ - განათლება, სწორი კვება, მედიცინა, ნორმალური ბურთებითა და ფორმებით უზრუნველყოფა, სეზონის წინ კარგი მომზადება... შესაბამისად, შემოვიღეთ, პროპორციები და დაფინანსების მთლიანად ხელფასზე დახარჯვა დაუშვებელია.

- ანუ ახლა ხელფასებში ბიუჯეტის რა პროცენტის ხარჯვაა შესაძლებელი?

- მაქსიმუმ 50 პროცენტის. ჩემი აზრით, ეს ფეხბურთის განვითარებისთვის ძალიან სწორი და მიზნობრივი აქცენტია. ფეხბურთის მხოლოდ ხელფასებით განვითარება წარმოუდგენელია. ახლა კი ბევრი რამ შეიცვალა.

- მაგალითად...

- ერთ კონკრეულ ამბავს გეტყვით, რაც თამაშებისთვის გუნდის მზადებას ეხება. ადრე, გუნდების უმრავლესობა მეტოქის სტადიონზე მატჩის დღეს მიემგზავრებოდა.

მაგალითად, “ვიტ ჯორჯია” თამაშის დღეს ბათუმში რომ ჩადიოდა, გზაში დაღლილი მოთამაშეები თავიანთ შესაძლებლობას სრულად როგორ გამოავლენდნენ? მათ კარგად მომზადების და ძალების აღდგენის საშუალება რომ არ ექნებოდათ, თავადაც ხვდებით. ახლა ეს საკითხი მოგვარებულია.

სხვათა შორის, წელს პირველად მოხდა, რომ ეროვნული ლიგის ყველა გუნდი უცხოეთში კარგ საფეხბურთო ბაზებსა და მოედნებზე მოემზადა, უმრავლესობა - თურქეთში, მცირე ნაწილი - ესპანეთში. მათ საკმაოდ ნაყოფიერი შეკრებები ჰქონდათ და ეს მიმდინარე სეზონში თამაშების ხარისხზეც აისახა.

- შესაძლოა, დაფინანსების სისტემაში რამე შეიცვალოს?

- ჩვენ ამ სისტემას ფეხბურთის ინტერესებიდან გამომდინარე ვაუმჯობესებდით, ვცვლიდით და მომავალშიც ასე გაგრძელდება. სრულყოფა და დახვეწა ყოველთვის სასურველია. ფონდი მომხრეა, რომ იყოს შეზღუდვები, რომელიც ფეხბურთს წაადგება.

ყოველდღიური სპორტული გაზეთი "ლელო"
1906
მკითხველის კომენტარები / 1 /
ამბაკო
0
ფეხბურთის რესურსი სავალდებულო სასოფლო სამუშაოებში რომ მივმართოთ?
მსგავსი ამბები
რუბრიკის სხვა სიახლეები
;