ზაზა ნადირაძე: ტკივილის მიუხედავად ოქროსთვის ვიბრძოლებ

ბელარუსის დედაქალაქ მინსკში მეორე ევროპულ თამაშებზე გუშინ შეჯიბრებაში ჩაებნენ ნიჩბოსნები. შესანიშნავად იასპარეზა მცხეთელმა ზაზა ნადირაძემ, რომელმაც ერთადგილიანი კანოეთი 200 მეტრი საკვალიფიკაციო ეტაპზე 39.421 წამში დაფარა და მთავარ ფინალში პირველი ადგილით შევიდა.

მეორე-მესამე ადგილებზე ჰენრიკას ზუსტაუტასი (ლიეტუვა, 39.526) და ალფონსო ბენავიდესი (ესპანეთი, 39.969) გავიდნენ. მეორე კვალიფიკაციაში პირველი-მესამე ადგილები ჰელდერ სილვამ (პორტუგალია, 40.128), ივან შტილმა (რუსეთი, 40.360) და ოლენ ბოროვიკმა (უკრაინა, 40.580) დაიკავეს.

მსოფლიოს ჩემპიონმა არტსიომ კოზირმა (ბალარუსი) მხოლოდ ნახევარფინალში მოიპოვა მედლებისთვის ბრძოლის უფლება, ჩეხი მარტინ ფუკსა კი, საერთოდ, ფინალს მიღმა აღმოჩნდა. 

დღეს გადამწყვეტ რაუნდში ბილიკების მიხედვით ერთმანეთს დაუპირისპირდებიან: 1. მიხალ ლუბნიევსკი (პოლონეთი), 2. ოლენ ბოროვიკი (უკრაინა), 3. ჰენრიკას ზუსტაუტასი (ლიეტუვა), 4. ჰელდერ სილვა (პორტუგალია), 5. ზაზა ნადირაძე (საქართველო), 6. ივან შტილი (რუსეთი), 7. ალფონსო ბენავიდესი (ესპანეთი), 8 არტსიომ კოზირი (ბელარუსი), 9. ნიკოლა კრაჩოუმი (იტალია). 

ერთადგილიანი კანოეთი იასპარეზა ქალებში დუშელმა მარიამ ქერდიკაშვილმაც. საკვალიფიკაციო ეტაპზე მან 200-მეტრიანი დისტანციის ფინიშის ხაზი მეხუთემ გადაკვეთა (51.526) და მხოლოდ ნახევარფინალში გამოსვლის უფლება მიიღო, იქ კი სტანილია სტამენოვასა (ბულგარეთი, 52.197) და გაბრიელა ლადიკოვასთან (სლოვაკეთი, 52.241) ერთად სამეულში (52.392) მოხვდა და A ფინალში დაიბევა ადგილი. დღეს მეორე ევროპული თამაშების მედლებისთვის იბრძოლებენ: 1. გაბრიელა ლადიკოვა (სლოვაკეთი), 2. ბიანკა ნადი (უნგრეთი), 3. ელზა იახნი (გერმანია), 4. დოროტა ბოროვსკა (პოლონეთი), 5. ოლგა რომანენკო (რუსეთი), 6. ანასტასია ჩეტვერიკოვა (უკრაინა), 7. ალიონა ნაზდროვა (ბელარუსი), 8. სტანილია სტამენოვა (ბულგარეთი), 9. მარიამ ქერდიკაშვილი (საქართველო). 

200 მეტრზე ერთადგილიანი კაიაკით (ბაიდარა) გამოვიდა თბილისელი ბადრი ყაველაშვილი, რომელიც წინასწარი გაცურვისას (35.227) მეხუთე იყო, ნახევარფინალში (35.118) მეოთხე და მხოლოდ B ფინალში გამოსვლის უფლება მიიღო. 

გუშინ საკვალიფიკაციო პაექრობების შემდეგ მინსკში ზაზა ნადირაძეს შევეხმიანეთ. 

- სამწუხაროდ, შეჯიბრებრებამდე რამდენიმე დღით ადრე საკმაოდ სერიოზული ტრავმა მივიღე - კუნთი მაქვს დაზიანებული, - გვითხრა მან. - ბოლო ექვსი დღეა, ფაქტობრივად, ნორმალურად არც მივარჯიშია, სტარტის წინ გუნდის ექიმი გამომყვა და ტკივილის გაყუჩებას ეცადა. ოდნავ დამიწყნარა, თუმცა ბოლომდე ვერა, რადგან სტარტზე მეორე მოსმისას ხელი ძალიან ამტკივდა, ამიტომ როგორიც მე მინდოდა, ისეთი ტემპი ვერ ავკრიფე. როგორც იქნა, საკუთარ თავს ვძლიე და სიჩქარესაც მოვუმატე. ვცდილობდი, მეტოქეები ძალიან არ გამეშვა წინ. ფინიშზე თავს ძალა დავატანე და გაცურვა მოვიგე. ფინალშიც ყველაფერს ვიღონებ გასამარჯვებლად. 

- 2020 წლის საგზურის საქმე როგორ იქნება?

- ორიოდე კვირის წინ ნიჩბოსნობის საერთაშორისო ფედერაციამ ლიცენზიების გაცემის წესი ისევ შეცვალა. ასე რომ, მინსკი არაფერს იძლევა. წლეულს აგვისტოს ბოლოს მსოფლიოს ჩემპიონატსა და გაისად ევროპის სალიცენზიო ტურნირზე გაიცემა ტოკიოს საგზურები. 

- ევროპული თამაშების ფინალში მარცხენა მხარეს ჰენრიკას ზუსტაუტასი, მარჯვნივ კი ივან შტილი და არტსიომ კოზირი გეყოლებათ...

- სამივე ძლიერი და სახელოვანი სპორტსმენია. შტილი და კოზირი სულაც მსოფლიოს რამდენიმეგზის ჩემპიონები და ყველა შეჯიბრების ფავორიტები არიან. ნებისმიერ მათგანს შეუძლია გადამწყვეტ რაუნდში გამარჯვება. თუმცა ისიც უნდა ითქვას, რომ წინაწარი გაცურვებისას სხვა სპორტსმენებმა მათზე უკეთესი შედეგები აჩვენეს. ასე რომ, ძალიან დაძაბული ფინალი იქნება. 

- მარიამ ქერდიკაშვილსა და ბადრი ყაველაშვილზე რას იტყვით?

- მარი შესანიშნავი გოგოა. ძლიერი, მებრძოლი ხასიათი გამოავლინა. საკვალიფიკაციო გაცურვისას ვერა, მაგრამ ნახევარფინალში მიზანს მიაღწია - ასეთი დონის ტურნირის მთავარ ფინალში მოხვედრა და მედლისთვის ბრძოლა უკვე უდიდესი შედეგია, თან იმასაც თუ გავითვალისწინებთ, რომ საქართველოში სულ ორი თუ სამი კანოიტი გოგო გვყავს. წარმატებას ვუსურვებ მას. რაც შეეხება ბადრი ყაველაშვილს, წინაწარი გაცურვისას და ნახევარფინალში ცუდი ზოლი შეხვდა, სადაც მეტი ქარი იყო და ტალღებიც. თანაბარ პირობებში, დარწმუნებული ვარ, უკეთეს შედეგს აჩვენებდა. 

ყოველდღიური სპორტული გაზეთი "ლელო"
933
მკითხველის კომენტარები / 0 /
მსგავსი ამბები
რუბრიკის სხვა სიახლეები
;