ზაზა ფაჩულია - უკან, მილუოკიში?

THE ATHLETIC - ის ჟურნალისტ მარკუს ტომპსონის ინფორმაციით, "მილუოკი ბაკსი"  "გოლდენ სტეიტ უორიორსს" ერთ-ერთი ცენტრის შესაძლო ტრეიდზე უთანხმდება.

მას მერე, რაც მილუოკიმ გრეგ მონრო "ფინიქსში" გაუშვა, გუნდი ცენტრის პოზიციაზე გაძლიერებას საჭიროებს:

"სხვადასხვა წყარომ დაადასტურა, რომ "მილუოკიმ" და "გოლდენ სტეიტმა" ტრეიდის ვარიანტები განიხილეს. არაფერი გადაწყვეტილი არ არის, მაგრამ "ბაკსი" ცენტრების ბაზარზეა გამოსული, ხოლო "უორიორსს" ამ პოზიციაზე ზედმეტი ხალხი ჰყავს.

ამ ორი გუნდის მოლაპარაკების პროცესში განიხილებოდა ზაზა ფაჩულიას ან ჯაველ მაკგის "მილუოკიში" გადასვლა. ეჭვიც არაა, რომ თავიდანვე მათ ჯორდან ბელი მოითხოვეს, მაგრამ "გოლდენ სტეიტის" უარი მიიღეს", - წერს ტომპსონი.

ტომპსონი ვარაუდობს, რომ თუკი ახალბედა ჯორდან ბელის ტრეიდი "მილუოკისთვის" შეუძლებელია, რადგან "გოლდენ სტეიტში" მისი ძალიან ეიმედებათ, ძალიან რთული იქნება "უორიორსის" დაყოლიება ფაჩულიას ტრეიდზეც.

ფაჩულიას ინტელიგენტური თამაში მას "მილუოკისთვის" სასურველ მოთამაშედ ხდის, მაგრამ ტომპსონი მიიჩნევს, რომ "მილუოკის" კალიფორნიელების დათანხმება ძალიან გაუჭირდება. ასე რომ, ტრეიდის უმთავრეს კანდიდატად 29 წლის მაკგი რჩება:

"მაკგი არ არის კმაყოფილი იმ წუთებით, რაც გუნდში ეძლევა. "გოლდენ სტეიტმა" მას მხოლოდ მინიმალური კონტრაქტი შესთავაზა და თავიდანვე გააფრთხილა, რომ სასტარტო ცენტრი ის არ იქნებოდა. მაკგი "უორიორსში" არაფერს აშავებს, მაგრამ მისი ტრეიდი ყველაზე ლოგიკურია, თუ მისით სერიოზულად დაინტერესდნენ", - წერს ტომპსონი.

ზაზა ფაჩულიამ ჯამში 3 სეზონი ითამაშა "მილუოკი ბაკსში". ზაზა ორ სხვადასხვა პერიოდში იყო "ბაკსის" წევრი და ბოლოს იგი მნიშვნელოვან როლს თამაშობდა გუნდში, რომელიც ყველასთვის მოულოდნელად, მე-6 ნომრად გავიდა პლეი ოფში და იქაც იბრძოლა.

2004/05 წლების სეზონში თამაშობდა ის 6,2 ქულას და 5,1 მოხსნას აკეთებდა. 2013/14 და 2014/15 წლების სეზონებში კი საშუალოდ 8,0 ქულას და 6,6 მოხსნას ითვლიდა.

შობის საღამოს "გოლდენ სტეიტმა" 99:92 დაამარცხა "კლივლენდი", ზაზა უნიფორმაში იყო, მაგრამ მას კვლავ არ უთამაშია. მატჩის შემდეგ ჟურნალისტების წინაშე გამარჯვებულთა მწვრთნელი სტივ კერი წარდგა, რომელსაც პირველ რიგში, ზაზას უთამაშებლობის შესახებ ჰკითხეს:

"ზაზა თამაშისთვის მზად იყო და მე მის გამოყვანას მეორე მეოთხედის დასაწყისიდან ვაპირებდი, როცა "კლივლენდი" ტრისტან ტომპსონს გამოიყვანდა, მაგრამ მათ გადაწყვიტეს, თამაში დაბალი ხუთეულით გაეგრძელებინათ. ზაზა შემდეგ მატჩს აუცილებლად სასტარტოში დაიწყებს".

2603
მკითხველის კომენტარები / 0 /
მსგავსი ამბები
რუბრიკის სხვა სიახლეები