ზაზა ფაჩულიას ფრიადი, დეტროიტის 50% [VIDEO]

ზაზა ფაჩულიას "დეტროიტ პისტონსი" მიმდინარე სეზონში მეტად საინტერესოდ თამაშობს. გუნდმა ბევრი ისეთი მატჩი მოიგო, რომელშიც აუტსაიდერად ითვლებოდა, ისეთებიც წააგო - მოსაგებს რომ უწოდებენ. ჰოდა, სადღეისოდ მოგება-წაგებათა 50-პროცენტიანი მაჩვენებელი აქვს - 16/16.

წინა ტურში "პისტონსი" შინ აუტსაიდერ "ატლანტასთან" დამარცხდა. ეს იყო მისი მე-16 წაგება (15 მოგების წილ). ამ მატჩს "ვაშინგტონთან" საშინაო შეხვედრა მოჰყვა და ტრადიცია არ დაირღვა - მოგება-წაგებათა ბალანსი აღდგა, ზაზას გუნდმა მეთექვსმეტე მოიგო.

დეტროიტელებმა "ვაშინგტონთანაც" თანაბრად ითამაშეს, მხოლოდ მესამე პერიოდში ჰქონდათ აღმავლობა, 12-წუთიანი მონაკვეთი 31:17 მოიგეს, რამაც საბოლოო შედეგზე დიდი გავლენა იქონია - 106:95.

ზაზა ფაჩულიამ ფრიადზე ითამაშა: 13 წუთში 5 ქულა, 5 მოხსნა, 2 პასი. ახალგაზრდა მკითხველს შეიძლება გაუკვირდეს - ფრიადი რას ნიშნავსო. განვმარტოთ: მაშინ, როცა ზაზა სკოლაში დადიოდა, შეფასების სისტემა ხუთბალიანი იყო. ჰოდა, ყველაზე მაღალი სწორედ 5-იანი გახლდათ, რომელსაც ფრიადს უწოდებდნენ.

ბომბარდირი ისევ ბლეიქ გრიფინი გახდა - 23 ქულა მოინაგრა; ანდრე დრამონდმა ისევ ორმაგი დუბლი შეასრულა - 16 ქულა, 11 მოხსნა.

"პისტონსი" აღმოსავლეთის კონფერენციაში მეექვსე ადგილზეა. მომდევნო მატჩს 29 დეკემბერს ინდიანაში "პეისერსთან" გამართავს. 

1586
მკითხველის კომენტარები / 1 /
რეზო
0
მოინაგრა– რა ქართულია,სად ისწავლეთ გრამატიკა,რატომ ანაგვიანებთ ქართულ ენას!გთხოვთ ,ნუ იგონებთ ახალ ტერმინებს,ნუ უბნევთ გონებას ახალგაზრდებს.
მსგავსი ამბები
რუბრიკის სხვა სიახლეები
;