ზაზა ფაჩულია: აი, რატომ 'დეტროიტი'! [VIDEO]

ზაზა ფაჩულიამ ნაციონალურ საკალათბურთო ასოციაციაში თავისი მე-16 სეზონი ლურჯ-თეთრი მაისურით დაიწყო - "დეტროიტ პისტონსთან" ერთად იბრძოლებს ჯერ პლეი ოფში მოსახვედრად, შემდეგ... რაც შეიძლება, წინ წასასვლელად.

რა მიზნებს ისახავს გუნდი, როგორ შეეგუა ზაზა ახალ გარემოს, ახალ გუნდსა და ახალ ქალაქს, ამის შესახებ სასაუბროდ "პისტონსის" ქართველ ცენტრს დეტროიტში დავუკაშირდით.

ახალი ნავსაყუდელი

ზაზა ფაჩულია 8 წელი "ატლანტაში" ცხოვრობდა, მას მერე იყო ორწლიანი გაჩერებები ოკლენდში და მილუოკიში, ერთწლიანი - დალასში...

- ატლანტიდან წამოსვლის შემდეგ ორ წელზე მეტს არსად გავჩერებულვარ. ამას შეიძლება დადებითი კუთხითაც შევხედოთ და უარყოფითითაც, - გვითხრა ზაზამ, - ახალი გარემო ახალი გამოცდილებაა. ეცნობი ახალ ქალაქს, ახალ გუნდს, ახალ მწვრთნელებს, თანაგუნდელებს, გულშემატკივრებს. დიდი სხვაობაა მეტოქის რანგში და მასპინძლის სტატუსით ჩასვლას შორის. თუნდაც დეტროიტელი თანაგუნდელის, ანდრე დრამონდის სიტყვები გავიხსენოთ...

"პისტონსის" ერთ-ერთმა იმედმა, დრამონდმა ჟურნალისტებთან გულახდილად თქვა - ფაჩულიას წინააღმდეგ თამაში ძალიან არ მიყვარდა, "გოლდენ სტეიტის" ცენტრი გულზე არ მეხატებოდა. თუმცა ჩვენს გუნდში რომ ჩაირიცხა და სხვა კუთხით გავიცანი, დავრწმუნდი, რომ კარგი პიროვნება და მაღალი დონის პროფესიონალიაო.

რაც შეეხება გუნდის ხშირად შეცვლის უარყოფით მხარეებს, ფაჩულია მოკლედ გვიხსნის:

- როდესაც ოჯახი გყავს, ბავშვები სკოლაში დადიან, უკეთესია, ერთ ადგილას ცხოვრობდე და არ გიწევდეს ქალაქიდან ქალაქში გადაადგილება. უკეთესია, მაგრამ ჩემს შემთხვევაში ასე არ გამოდის, პროფესიული სპორტი თავისას მოითხოვს. ბავშვებსაც უწევთ ახალ გარემოსთან ადაპტაცია და ეს მათთვისაც დადებითი გამოცდილებაა, ვიდრე დაბრკოლება. ყველა ქვეყანა, ყველა შტატი თავისებურად საინტერესოა. ჩემთვის კი, მთავარი ის არის, რომ NBA-ში მე-16 სეზონი კარგ გუნდში დავიწყე.



დეტროიტი რით არის საინტერესო?

ისევე როგორც ქალაქები და შტატები, კლუბებიც გამოირჩევიან ერთმანეთისგან. ყველას თავისი ორიგინალური ტრადიცია და ხელწერა აქვს. ვინც ამერიკულ კალათბურთს რეგულარულად ადევნებს თვალს, მას არ გაუჭირდება "დეტროიტის" სპეციფიკურობაზე ლაპარაკი, მაგრამ რამდენიც უნდა ვილაპარაკოთ ოკეანის გაღმიდან, "პისტონსის" წევრ ქართველზე კომპეტენტურები მაინც ვერ ვიქნებით.

- ახალი სეზონის წინ გუნდში მთავარი მწვრთნელი შეიცვალა - მოვიდა დუეინ კეისი, რომელიც მანამდე "ტორონტო რეპტორსს" წვრთნიდა. ახალი მწვრთნელი ახალ სტრატეგიას ნიშნავს, თუმცა "დეტროიტი" აქამდეც მაღლებზე ორიენტირებული გუნდი იყო და კეისისაც უყვარს წინახაზელებზე თამაშის აწყობა. მთავარი ცენტრი ანდრე დრამონდია, მე - მისი შემცვლელი.

სწორედ რომ დრამონდის ფაქტორს არ შეიძლება არ დაეფიქრებინა ფაჩულია - ის ხომ ისეთ ადგილას მიდიოდა, სადაც სასტარტო ცენტრი ვერ იქნებოდა, ხოლო დღევანდელ კალათბურთში გუნდების უმეტესობა მთავარი ცენტრის გასვლის შემდეგ დაბალი ხუთეულით აგრძელებს თამაშს და ტემპს უმატებს. ასეთ პირობებში ზაზას "დეტროიტში" გადასვლა თითქოს რისკი იყო - მოუწევდა თამაში?

- ჩემი გამოცდილებიდან გამომდინარე, "დეტროიტში" გადასვლაში რისკს ვერ ვხედავდი. სიმართლე გითხრათ, მწვრთნელს რომ ვესაუბრე, არც მიკითხავს, რამდენის თამაში მომიწევდა. არც მას უკადრებია წუთებზე ლაპარაკი. მთავარია, საკუთარი თავის იმედი გქონდეს, ხვდებოდე, რა შეგიძლია და რით შეგიძლია გუნდს გამოადგე.

რით გამოადგება ზაზა პისტონსს?

ვინც "დეტროიტის" შემადგენლობაში ზაზა ფაჩულიას თამაშს ადევნებს თვალს, კარგად მოეხსენება, რითაც ეხმარება იგი გუნდსა და თანაკლუბელებს.

- ინგლისელებს კარგი სიტყვა აქვთ - Confidence, რაც თვითრწმენას, თავდაჯერებას ნიშნავს. საკმარისი Confidence მაქვს საიმისოდ, რომ ახალ გუნდს კარგად მოვერგო და ჩემი ცოდნა გუნდს კარგად მოვახმარო. მწვრთნელს, დუეინ კეისის რომ ველაპარაკე, კიდევ უკეთ დავინახე საკუთარი თავი "დეტროიტში". 48 წუთის განმავლობაში მოედანზე დგომის პრეტენზია არ მქონია. ვიცი, რომ მთავარი ცენტრი ანდრე დრამონდია, მაგრამ იგი შედარებით ახალგაზრდაა, ერთმანეთს კარგად ვეხმარებით.

"პისტონსში" გამართულ ერთ-ერთ პირველ მატჩში ზაზას 12 წუთი ერგო. ეს მოკლე დრო მშვენივრად გამოიყენა - 9 ქულა ჩააგდო...

- სიმართლე რომ ვთქვა, ქულებს ყურადღებას არ ვაქცევ. ჩემთვის მთავარია, სწორი კალათბურთი ვითამაშო, რომ ყველა ბედნიერი იყოს. სწორი კალათბურთი მაღალ ხარისხს განაპირობებს. ეს მეც დიდ სიამოვნებას მანიჭებს. ორი წლის განმავლობაში გამოვდიოდი "გოლდენ სტეიტში", სადაც ორჯერ გავხდი NBA-ს ჩემპიონი, სწორი და ლამაზი კალათბურთით ვაღწევდით წარმატებებს. სწორედ ესაა სასიამოვნო. "პისტონსშიც" ძალიან კარგი მწვრთნელია, რომლის ხელში გუნდი მაღალი შედეგებისთვის იბრძოლებს.



პლეი ოფი?

ზაზამ ზაფხულში, მწვრთნელ დუეინ კეისისთან საუბრის შემდეგ დადებითად გადაწყვიტა კონტრაქტის საკითხი.

- მეამაყება, რომ კარიერის მანძილზე მაღალი დონის სპეციალისტებთან მომიწია მუშაბამ. მათ შორსაა დუეინ კეისი, რომელსაც შარშან "ტორონტო რეპტორსთან" ერთად განსაკუთრებული წელი ჰქონდა. კარგად აწყობილი, დისციპლინირებული გუნდი ჰყავდა. "დეტროიტში" გადმოსვლის შემდეგ მას სასურველი შედეგის მისაღებად დრო სჭირდება.

"პისტონსმა" 2018-19 წლების სეზონი არათანაბრად დაიწყო. საწყისი 4 მატჩი მოიგო, შემდეგ ასევე ოთხი წაგება მიაყოლა...

- გუნდი ხომ ერთ დღეში ვერ აშენდება. შემადგენლობაშიც განხორციელდა ცვლილებები. წინ გრძელი სეზონია და ვხედავ რესურსს, "დეტროიტი" კარგ საპლეიოფო გუნდად ჩამოყალიბდეს. ტალანტი ნამდვილად არის, თუმცა მხოლოდ ნიჭით მაღალ მიზნებს ვერ შესწვდები, მნიშვნელოვანია, ყველამ ჩვენი როლი გავითავისოთ, ერთმანეთს ბოლომდე გვარდში დავუდგეთ და შედეგიც მოვა.

შედეგი პლეი ოფია. 2016 წლის შემდეგ "დეტროიტ პისტონსს" რეგულარული ეტაპის ბარიერი არ გადაულახავს. ფაჩულია მოვლენებს რეალურად აფასებს: ჯერ კარგ გუნდად ჩამოვყალიბდეთ, ისეთად პლეი ოფში რომ ღირსეულად გავა და კიდევ უფრო მაღალ მიზნებზე მერე ვილაპარაკოთო.

ბლეიქ გრიფინთან დაპირისპირებები

ანდრე დრამონდი ზაზა ფაჩულიაზე და ბლეიქ გრიფინზე ახალგაზრდაა. ზაზას ბლეიქთან 2009 წლის შემდეგ დიდი ბრძოლები აქვს გადატანილი. გრიფინი დეტროიტში თამაშობს მესამე ნომრის პოზიციაზე, თორემ მანამდე, "კლიპერსში" (რომელმაც დრაფტზე პირველ ნომრად აირჩია) ფარქვეშ თამაშზე ორიენტირებული მძიმე ფორვარდი იყო.

- მე და გრიფინს ერთმანეთის წინააღმდეგ ბევრჯერ გვითამაშია. ყოფილა ემოციური და უხეში მომენტებიც. როდესაც ერთ ლიგაში (NBA) 450-მდე კალათბურთელია, აქედან რეალურად 250 თამაშობს, ყოველი მატჩი ბრძოლაა ლიგაში პოზიციების შენარჩუნებისთვის. მოედანზე რამეს დათმობ და უმალ სხვა დაიკავებს შენს ადგილს.

ზაზას ბლეიქთან შეხვედრისას ძველი ამბები არ გაუხსენებია...

- წარსულზე ფიქრი დროის კარგვაა. ახლა თანაგუნდელები ვართ და ერთი მიზნისთვის ვიბრძვით. მუდამ წინ უნდა იხედო. ცხოვრება იმიტომაა საინტერესო, რომ მომავალს იმედიანად უყურებ, ბევრს შრომობ, რომ მიზანს მიაღწიო. ვფიქრობ, ჩვენც სწორი გზით მივდივართ და ვიმედოვნებ, აპრილში მიზნამდეც მივალთ.

გაგრძელება იხილეთ ხვალ

1127
მკითხველის კომენტარები / 0 /
მსგავსი ამბები
რუბრიკის სხვა სიახლეები