ზაზა ფაჩულია: ან ვაკეთებ კარგად, ან არ ვაკეთებ!

დეტროიტულმა გამოცემა CLOSEUP 360-მა გამოაქვეყნა ვრცელი სტატია ზაზა ფაჩულიას შესახებ, რომელიც ჩვენს მკითხველსაც უთუოდ დააინტერესებს.

განსხვავებული ზაფხული

"2018 წლის ზაფხული ზაზა ფაჩულიასთვის განსხვავებული იყო. იგი ოკლენდიდან დეტროიტში გადავიდა საცხოვრებლად და NBA-ში თავის მე-16 სეზონს "დეტროიტ პისტონსთან" ერთად გაატარებს.

მიუხედავად ცივი კლიმატისა, ზაზა და მისი ოჯახი ახალ ქალაქში ხალხის სითბოზე ლაპარაკობენ.

- მინდა გითხრათ, რომ ქალაქი, რომელშიც გადმოვედი იმაზე გაცილებით უკეთესია, ვიდრე მანამდე ვფიქრობდი, - ამბობს ზაზა ფაჩულია.
იგი დეტროიტში ივლისში დაბინავდა, შემდეგ ევროპაში გაეშურა, ჯერ დასასვენებლად, შემდეგ სამშობლოში, საქართველოში გაემგზავრა. მან დაისვენა მექსიკაში, კარიბის ზღვის სანაპიროზე, შემდეგ მოინახულა იტალია, თურქეთი, საბერძნეთი, საქართველოში ჩასულს კი დიდი საჩუქარი დახვდა:

- მამუკა ბახტაძე პრემიერ-მინისტრის პოსტზე ახალი დანიშნული იყო, ერთ-ერთი პირველი, რაც გააკეთა, ჩემთან შეხვედრა და ღირსების ორდენის გადმოცემა გახლდათ. ეს ნებისმიერი ქართველისთვის ძალიან საამაყოა, მადლობელი ვარ.

ფაჩულიამ ღირსების ორდენი საკუთარი კარიერითა და საქმიანობით დაიმსახურა. წლების განმავლობაში საქართველოს ნაკრების წევრი იყო და მაღალი მიზნების მიღწევაში ეხმარებოდა, რამდენიმე წელია საკალათბურთო აკადემია გახსნა. როგორც თავად ამბობს, აკადემია მისთვის ახდენილი ოცნებაა, ნიჭიერ ქართველ ბავშვებს ეხმარება განვითარებასა და კალათბურთელებად ჩამოყალიბებაში.



დარბაზის კიბეებზე

საქართველოში კალათბურთს დიდი ტრადიცია აქვს. იგი ერთ-ერთი ყველაზე პოპულარული სპორტია ამ ქვეყანაში.

კალათბურთი ზაზასაც პატარაობიდან შეუყვარდა. მამამისი, დავით ფაჩულია ძიუდოისტი იყო. დედა - მარინა კოდუა, საბჭოთა კავშირის იუნიორთა ნაკრების წევრი. მას შვილი ყოველთვის მიჰყავდა სპორტის სასახლეში საკალათბურთო მატჩებზე...

- დედაჩემი ძალიან მეხმარებოდა. მას ხშირად დავყავდი კალათბურთზე, ცდილობდა ისეთ ადგილზე დავესვი, რომ თამაში კარგად მენახა. თუმცა ეს ყოველთვის არ ხერხდებოდა, რადგან დარბაზი ისე ივსებოდა, ხალხი კიბეებიდან ადევნებდა თვალს შეხვედრებს. მეც ვმჯდარვარ კიბეებზე. ჩემთვის მთავარი თამაშის ნახვა იყო, სად აღმოვჩნდებოდი, დიდი მნიშვნელობა არ ჰქონდა. ბავშვი ვიყავი, საკალათბურთო მატჩები ჩემზე საოცარ შთაბეჭდილებას ახდენდა.

ან ვაკეთებ კარგად...

რადგან კარგად ახსოვს საკუთარი ბავშვობა, ზაზა ცდილობს ქართველ ბავშვებსაც დაეხმაროს ოცნებების ახდენაში.
2015 წელს საქართველოში ევროპის ახალგაზრდული თამაშები გაიმართა. ქართულმა მთავრობამ ინფრასტრუქტურა განაახლა. შეჯიბრება 26 ივლისიდან 1 აგვისტომდე ჩატარდა. მას მერე რა ბედი უნდა სწეოდა დარბაზებსა და სტადიონებს?

- ახალგაზრდული თამაშების შემდეგ არაერთი დარბაზი იყო მისახედი. მთავრობამ მათზე იზრუნა და დღეს ყველა წესრიგშია, - განაგრძობს ფაჩულია.
ზაზამ მაშინდელი პრემიერ-მინისტრისგან, ირაკლი ღარიბაშვილისგან მიიღო სატელეფონო ზარი. მან და ტარიელ ხეჩიკაშვილმა (სპორტის იმდროინდელი მინისტრი) ფაჩულიას შესთავაზეს დიდუბის მანეჟის განკარგვა, რადგან მანამდეც ჰქონდათ მოსმენილი, რომ ფაჩულია კარიერის დასრულების შემდეგ აკადემიის გახსნას აპირებდა. ზაზამ მოსაფიქრებლად რამდენიმე დღე ითხოვა.

- ეს საპასუხისმგებლო საქმე, იოლი გადასაწყვეტი არ იყო. თუმცა მშვენიერი შანსი გახლდათ დიდი საქმის დასაწყებად. ჩემი პრინციპია: ან ვაკეთებ კარგად, ან არ ვაკეთებ.

2015 წლის 1 ნოემბერს ზაზა ფაჩულიას აკადემია დაიბადა. ბავშვებს საშუალება აქვთ ივარჯიშონ მშვენიერ პირობებში, გამოცდილ ქართველ და უცხოელ მწვრთნელებთან.

გასულ ზაფხულს ზაზა ფაჩულიაც საკუთარ აკადემიაში მოზარდებთან ერთად ვარჯიშობდა, რაც ორივე მხარისთვის სასარგებლო იყო. პატარებისთვის - ზაზასგან ბევრი საკალათბურთო ნიუანსის სასწავლად, ფაჩულიასთვის - მოტივაციის გასაზრდელად, ახალგაზრდები ხომ სხვა ენერგიით ვარჯიშობენ. ამასთან, დეტროიტელი ფორმაში შედიოდა.

დამიჯერეთ, ერთი ადამიანისთვისაც არ მითხოვია - ხმა მომეცი მეთქი. ხალხი ყოველდღიურად კომპიუტერთან მისვლისთანავე მაძლევდა ხმას. ასე მივიღე 1.5 მილიონამდე ხმა, მაშინ, როცა ჩემს ქვეყანაში 3.5 მილიონი მცხოვრებია. არ შეიძლება ეს არ დააფასო.

სწავლა აუცილებელია

აკადემიის კედლები დამშვენებულია ცნობილი სპორტსმენებისა და სპეციალისტების ფრაზებით. ეს კალათბურთელებისთვის დამატებითი მოტივაცია და ორიენტირია. ფაჩულია საკუთარ აკადემიაში დიდ ყურადღებას აქცევს სწავლას.

- თუ გსურს მსოფლიოს მასშტაბის სპორტსმენი იყო, ინგლისურად უნდა ილაპარაკო, - ამბობს ზაზა, - სწავლაში თითოეულ მოთამაშეს ხელს ვუწყობთ. მათ ხომ ცოდნა პატარაობიდანვე სჭირდებათ.

ზაზას აკადემიაში ბავშვების რაოდენობა სწრაფად იზრდება. თავიდან იყო 250 ბავშვი, 2019 წელს 700-ს მიაღწია. ფაჩულია ფიქრობს, რომ მოვარჯიშეთა რაოდენობა 1000-მდე ავა. ვარჯიშობენ 5-დან 20 წლამდე მოზარდები.

- ჩვენთან მუშაობენ უცხოელი მწვრთნელები, ახალგაზრდა და გამოცდილი ქართველი სპეციალისტები. შეიძლება ყველა საკითხზე ვერ ვთანხმდებით, მაგრამ ვისმენთ ჯანსაღ არგუმენტებს, რატომ ფიქრობს მწვრთნელი ასე. ეს ყველაფერი კი ბავშვების საკეთილდღეოდ კეთდება.

ახალი შენამატი ამერიკელი მწვრთნელი ვილ სმიტია, ავსტრალიური წარმოშობის სპეციალისტი, რომელიც ჩინეთის ახალგაზრდულ ნაკრებსაც ავარჯიშებდა.

ზაზას მიაჩნია, რომ აკადემია პასუხისმგებელია არა მხოლოდ მოსწავლეებზე, არამეთ მათ მშობლებზე.

- ისინი გვენდობიან, ბავშვები აღსაზრდელად მოგვაბარეს. ე.ი. სჯერათ ჩვენი, ჩვენი შეხედულებების. მშობლებთან თავიდან ბოლომდე გახსნილები ვართ, მათაც იციან, რომ ყველა ვერ გამოვა პროფესიონალი კალათბურთელი, მაგრამ ჩვენი ამოცანაა თითოეულ მოზარდს შესაძლებლობების მაქსიმალურად გამოვლენაში დავეხმაროთ.

ზაზა ფაჩულიას აკადემია. ცემის დღიურები

გაყინული დარბაზიდან

ზაზას პატარაობაში საქართველოში გაჭირვება იყო, ხალხს არ ჰქონდა გაზი, არ იყო სინათლე, პატარა კალათბურთელები გაყინულ, შუშებჩამტვრეულ დარბაზში ვარჯიშობდნენ. ამის მიუხედავად 1998 წელს NBA-ს ვლადიმერ სტეფანიამ მიაღწია. 2002 წლის დრაფტზე ნიკოლოზ ცქიტიშვილი მე-5 ნომრად აირჩიეს. ზაზა ფაჩულია კი 2003 წლის შემდეგ ამერიკაშია...

- ნაციონალურ საკალათბურთო ასოციაციაში მე-16 სეზონს ვატარებ. ეს იოლი სულაც არ არის, თავიდანვე თუ არ შეეგუე შრომას, გამძლეობა თუ არ გამოიმუშავე, არაფერი გამოგივა. ყოველი დღე ხომ ტესტია. შანსი ხელიდან არასოდეს უნდა გაუშვა, თორემ მერე უკან დაბრუნება ძალიან რთულია, - ამბობს ზაზა და მომავალ თაობასაც სწორედ მენტალურად, საბრძოლველად ამზადებს.

ამის კარგი მაგალითი 13 წლის ლუკა ალავიძეა, რომელიც ზაზას აკადემიიდან ჯერ ევროპის ჟუნიორ NBA-ში მოხვდა, შემდეგ ევროპელთა ნაკრებში აიყვანეს და ამერიკაში მსოფლიოზე ითამაშა.

- სასიამოვნოა, როცა ხედავ შენი აკადემიის წარმომადგენლის ასეთ წარმატებას. ეს სხვებსაც მატებს მოტივაციას. წარმატებას ხომ საზღვარი არ აქვს.



ქართველთა ერთიანობა

სექტემბერში ზაზა ფაჩულიამ რამდენიმე დღე ჰარვარდის ბიზნესის აკადემიაში გაატარა კაირი ირვინგთან და პოლ მაილსაპთან ერთად. ზაზა აგრძელებს სწავლას პროფესორ ანიტა ელბერსთან...

- ზოგჯერ მგონია, რომ სპორტსა და ბიზნესს შორის განსხვავება მხოლოდ ის არის, რომ სპორტსმენებს ფორმები გვაცვია, მენეჯერებს - კოსტიუმები. წარმატების მიღწევა ორივეგან რთულია, მაგრამ შედეგი ორივეგან ტკბილია. პროცესში ძალიან ბევრი მსგავსებაა.

ზაზას მიღწევებით მის სამშობლოშიც ამაყობენ. სწორედ ამიტომ, ძალიან ცოტა დააკლდა 2016 წლის NBA-ს "ოლ სტარში" მოსახვედრად. ქართველებმა იაქტიურეს და სულაც არ გაგვიკვირდებოდა ფაჩულია ვარსკვლავთა მატჩში თუ მოხვდებოდა.

- არსებობს ტყუილი და ნამდვილი სიყვარული. დამიჯერეთ, ერთი ადამიანისთვისაც არ მითხოვია - ხმა მომეცი მეთქი. ხალხი ყოველდღიურად კომპიუტერთან მისვლისთანავე მაძლევდა ხმას. ასე მივიღე 1.5 მილიონამდე ხმა, მაშინ, როცა ჩემს ქვეყანაში 3.5 მილიონი მცხოვრებია. არ შეიძლება ეს არ დააფასო.

ფაჩულიასთვის ეს არის მცირე მაგალითი როგორ შეუძლიათ ქართველებს გაერთიანება. საქართველო ხომ მსოფლიოს ერთ-ერთი ყველაზე ძველი ქვეყანაა, მდიდარი ისტორიითა და ტრადიციებით. არ არის დიდი და მდიდარი, როგორც მისი ზოგიერთი მეზობელი, მაგრამ დღესაც ფეხზე დგას, რადგან ხალხმა ერთმანეთის გვერდში დგომა იცის."

ყოველდღიური სპორტული გაზეთი "ლელო"
2947
მკითხველის კომენტარები / 0 /
მსგავსი ამბები
რუბრიკის სხვა სიახლეები
;