ფაჩულია და ბითაძე... არასწორი შეკითხვა: ვინ უფრო მაგარია 19 წლის ასაკში?! [VIDEO]

ქართველებს მტკიცებითი ფორმით ლაპარაკი ძალიან გვიყვარს. ნეტავ რომელიმე სხვა ქვეყნის მწერლობაში არის იმდენი ძახილის ნიშანი, რამდენიც ჩვენთან. ძახილის ნიშანი შემთხვევით როდი ჰქვია - ქართველი იძახის, ე.ი. ასეა!

19 წლის გოგა ბითაძე 19 წლის ზაზა ფაჩულიაზე ძლიერია! - არაერთხელ მომისმენია. 16 წლის წინანდელი ზაზაც მახსოვს, მაგრამ თუ დამიჯერებთ, არასოდეს მიფიქრია ასეთი შედარების გაკეთება. ჯერ ერთი იმიტომ, რომ ზაზა და გოგა სხვადასხვა საკალათბურთო ეპოქის შვილები არიან, სხვადასხვა ეპოქის საქართველოში აღიზარდნენ და მხოლოდ კონკრეტული მონცემებით, ვინ უკეთესად აყენებს ბლოკს, ვინ უკეთესად ხსნის ან აფარებს, არ მიმაჩნია დასკვნის გამოტანა მართებულად.

ამ პუბლიკაციის დაწერაც მხოლოდ იმიტომ გადავწყვიტე, რომ გავახსენოთ მკითხველს რას აკეთებდა ფაჩულია 19 წლის ასაკში და რას აკეთებს 19 წლის ბითაძე დღეს. ვის უფრო დიდი პერსპექტივა ჰქონდა თუ აქვს, თავად მკითხველმა დაასკვნას. გოგას ზაზასთან შედარების მთავარი მიზანი ხომ ის არის, რომ შემდეგ ითქვას - ბითაძეს NBA-ში დიდი მომავალი აქვსო.

გოგა ბითაძე: რატომ მოვხსენი NBA-ს დრაფტიდან კანდიდატურა?.. [VIDEO]

გგონიათ ბითაძეს მხოლოდ ფაჩულიას ადარებენ? ჟურნალისტებისგან ასეთი ფრაზაც მომისმენია: სპორტის სამინისტრომ 2018 წლის საუკეთესო ახალგაზრდა სპორტსმენად გიორგი ჩაკვეტაძე დაასახელა - არადა, ჩვენ ხომ, გოგა ბითაძე გვყავს?!
ჩაკვეტაძეცა და ბითაძეც ძალიან გვახარებენ, მაგრამ სპორტის სხვადასხვა სახეობის წარმომადგენლები არიან და... გაცილებით მეტი პარალელი შეინიშნება ფაჩულია-ბითაძის კარიერაში, ვიდრე ჩაკვეტაძე-ბითაძისაში.

რატომ მოხსნეს კანდიდატურა დრაფტიდან?

2018 წელს გოგა NBA-ს დრაფტზე დადგა, მასზე ამერიკული პრესაც რეგულარულად წერდა, მაგრამ ბოლო მომენტში კანდიდატურა მოხსნა. ცხადია, თავის მენეჯერთან შეთანხმების შემდეგ.

საქართველოში დაბრუნებულ ახალგაზრდა კალათბურთელს კანდიდატურის მოხსნის მიზეზი რომ ვკითხე, მოკლედ მომიგო:

- ფიზიკურად არ ვიყავი მზად NBA-სთვის. ერთ წელიწადში ბევრს ვიშრომებ, თამაშსაც გავაუმჯობესებ, ფიზიკურადაც ავალ NBA-ს დონეზე და დრაფტზე მერე დავდგები.

"მერეში" 2019 წელი იგულისხმა.

ზაზა ფაჩულია ამერიკაში 2002 წელს ჩავიდა. იქ რამდენიმე გუნდში ივარჯიშა, თუმცა მენეჯერთან და მწვრთნელებთან კონსულტაციის შემდეგ გადაწყვიტა ევროპაში დაბრუნებულიყო და ძველი კონტინენტიდან ეჩვენებინა ამერიკელებისთვის, რა შეეძლო.

- 2002 წელს დრაფტისწინა ვარჯიშებზე ბერძენი პაპადოპულოსი ვნახე. იგი დრაფტზე იყო წარდგენილი მაგრამ არ აირჩიეს. ვგრძნობდი, რომ საჭირო იყო უკეთ მომზადება, ევროპაში თავის გამოჩენა, რომ ამერიკელ სკაუტებს მეტი ყურადღება მოექციათ, - მითხრა ზაზამ.



ვის ხელში?

NBA-ს მესვეურთა ყურადრების მისაქცევად ფაცულიას სათამაშო დრო სჭირდებოდა. არადა, "ულქერს" მურატ დიდინი წვრთნიდა, რომელმაც...

- თავიდან შანსი მომცა - 16 წლის ახალგაზრდა ევროლიგაზე მათამაშა, შემდეგ სათადარიგოთა სკამზე დამსვა და მოედანზე აღარ გავყავდი. დიდინთან მუშაობამ ბევრი რამ შემძინა, სერიოზული გამოცდა ჩავაბარე. ვისწავლე თავის გატანა, გზების ძიება შესაძლებლობების დასამტკიცებლად. ეს ყველაფერი კი ხასიათზე მოქმედებს, ხასიათს აყალიბებს. მთავარია, სწორი დასკვნები გამოიტანო და გაუძლო.

ზაზამ გაუძლო. "ულქერმა" - ვერა. 2002 წელს მურატ დიდინი თოლგა ოლგორენმა შეცვალა. ახალი მწვრთნელი ზაზას უფრო ენდობოდა და, ცხადია, ქართველი ახალგაზრდაც კმაყოფილი იყო:

- თავიდანვე მათამაშებდა, ხუთეულშიც მანდობდა ადგილს. იცით, რა იყო სხვაობა ორ მწვრთნელს შორის? - მურატ დიდინს ლამაზად გარჯას პრაგმატული თამაში ერჩივნა. ოლგორენს - პირიქით. ერთ-ერთი წინასასეზონო მატჩისას ეფექტურად ჩავტენე და ახალი მწვრთნელის, თოლგა ოლგორენისგან კომპლიმენტი მივიღე. იგი მეუბნებოდა, NBA-ის დრაფტზე დადგები, მეც ხელს შეგიწყობ, ოღონდ შენც უნდა მომეხმაროო.

თოლგა ოლგორენის სიტყვები ფაჩულიას ერთგვარ დევიზად ექცა:

- ყველაზე მთავარი, რაც მასთან მუშაობისას მახსენდება, დარიგებაა - მთავარი თავდადებაა, რაც უნდა მოხდეს, მატჩში მთელი ენერგია უნდა ჩადოო. სხვათა შორის, თურქეთში ასპარეზობისას ერთ მატჩში კბილი ჩამომტყდა, სისხლი მდიოდა, მაგრამ ვყლაპავდი, პირს არ ვაღებდი, არ მინდოდა მწვრთნელს შევემჩნიე და შევეცვალე.

თუ ზაზა მწვრთნელების ხასიათსა და ხუშტურებზე იყო დამოკიდებული, ბითაძეს შემთხვევაში პირიქითაა - მწვრთნელები არიან დამოკიდებულნი მასზე. როგორ? რატომ?

მიზეზი მარტივია: ბითაძე 16 წლისა მოხვდა "მეგა ბიმაქსში", გუნდში, რომელიც მის აგენტს ეკუთვნის. სწორედ ამ გუნდში გამოწვრთნეს და გამოზარდეს ნიკოლა იოკიჩი, რომელიც ახლა NBA-ის ვარსკვლავეთში საპატიო ადგილასაა.
როდესაც გუნდის მთავარი მიზანი ამა თუ იმ კალათბურთელის აღზრდაა, მწვრთნელსაც მკაფიო მითითება აქვს - ხელი შეუწყოს პროგრესში. შესაბამისად ვერც ერთი მწვრთნელი ვერ წავა ხელმძღვანელობის წინააღმდეგ და მურატ დიდინივით სათადარიგოთა სკამს ვერ მიაჯაჭვებს შეგირდს.

ბითაძეს სათამაშო პრაქტიკა რომ სჭირდებოდა, ჯერ სერბეთის ლიგის აუტსაიდერ "სმედეროვოში" გაანათხოვრეს, მომდევნო სეზონში "მეგა ბიმაქსში" ათამაშეს, ახლა კი ევროლიგის წარმომადგენელ "ბუდუჩნოსტში" გაუშვეს. დარწმუნებული ვარ, გოგას მენეჯერს "ბუდუს" მწვრთნელისგან მინიმუმ 20 წუთის თამაშის გარანტია რომ არ მიეღო, "ბიმაქსიდან" არც გაუშვებდა.

- "მეგა ბიმაქსი" საუკეთესო ადგილია ახალგაზრდა მოთამაშეებისთვის. ძალიან მიხარია, რომ სწორედ ამ გუნდში მოვხვდი. "ბიმაქსში" სამი წელი გავატარე და თითოეულ სეზონში დიდი გამოცდილება მივიღე. უდიდესი მნიშვნელობა ჰქონდა გასულ სეზონში ადრიატიკის ახალგაზრდულ (U19) ლიგაში თამაშს. კარიერაში პირველად მოვიგე MVP-ის ტიტული. ახალგაზრდული ლიგის საუკეთესო მოთამაშის ჯილდოს მიღებამ თვითდაჯერება და მოტივაცია შემმატა, - ეს გოგას სიტყვებია.

ზაზას და გოგას საკლუბო ამბების შედარებით შეიძლება ვინმემ დაასკვნას - "ულქერი" ცუდი იყო, "მეგა ბიმაქსი" - კარგი. ასეთი დახარისხება არ შეიძლება, უბრალოდ ფაჩულიას შემთხვევაში საქმე გვაქვს 17 წლის წინანდელ მენეჯმენტთან, მაშინ ხომ NBA-სკენ ნიჭიერი ევროპელები ისევე გუდანაბადაკიდებულნი მიდიოდნენ, როგორც ტომ კრუზი და ნიკოლ კიდმანი ფილმში "შორს". არავინ იცოდა რა ბედი ეწეოდათ ახალ კონტინენტზე, ახალ გარემოში...

დღეს 19 წლის სლოვენიელი ლუკა დონჩიჩი სამმაგ დუბლებს ასრულებს, ევროპელებზე ფასიც აწეულია და ზოგ კალათბურთელზე უკვე დაბეჯითებით შეიძლება ვთქვათ - NBA-შიც დაიმკვიდრებს ადგილს.

ზაზა ფაჩულია: ამერიკელები შეცდნენ, დრაფტზე 42-ე ნომრად რომ ამირჩიეს!



ევროლიგა - სცენა NBA-სთვის

"NBA-შიც დაიმკვიდრებს ადგილს" - ამის თქმის უფლებას ერთადერთი რამ გვაძლევს - ევროლიგა. ეს ევროპის საუკეთესო ლიგაა, რომლის გამორჩეულ კალათბურთელებზე ამერიკელები უკვე ნადირობენ.

ადრიატიკის ლიგაზე "მეგა ბიმაქსის" შემადგენლობაში გოგა ბითაძე მატჩში 26-28 ქულას აგდებდა, ოკეანისგაღმელი სკაუტების ინტერესები, თავისთავად, იყო, მაგრამ შუა სეზონში იგი ევროლიგის წარმომადგენელ "ბუდუჩნოსტში" გადავიდა, რის შემდეგაც NBA-ს დამკვირვებელთა ინტერესი, ფაქტობრივად, გაათმაგდა.

მიზეზი გაზეთ "ლელოში" გოგას "ბუდუჩნოსტში" გადასვლის დღეს დავწერე: ევროლიგა ერთგვარი საზომია, რომლითაც ფასდება ესა თუ ის კალათბურთელი რამდენად მზადაა ნაციონალურ საკალათბურთო ასოციაციაში სათამაშოდ.

გოგა ბითაძე "მეგა ბიმაქსის" რიგებში ადრიატიკის ლიგაზე საუკეთესო იყო, თუმცა შუა სეზონში იგი სერბული გუნდიდან "ბუდუჩნოსტში" გადავიდა. ტრანსფერის მიზეზი მარტივი იყო - დაემტკიცებინა, რომ ევროლიგის დონეზეც შეეძლო ხარისხიანი თამაში.

პირველივე მატჩში დაგვანახა, რომ შეუძლია - მიუნხენში 17 ქულა ჩააგდო, ხოლო "მილანთან" სტუმრად გამართულ შეხვედრაში დაამტკიცა, რომ ევროლიგის ერთ-ერთი საუკეთესო ცენტრია. რომ არა ბითაძე, "ბუდუჩნოსტი" იტალიაში ძალიან შერცხვებოდა. მონტენეგროელებმა 94:111 დათმეს, 19 წლის ქართველ ცენტრს კი 26 წუთში 23 ქულა, 7 მოხსნა, 2 პასი და 2 დაფარება ჰქონდა. მან 12-დან 8 ორქულიანი, 1-დან 1 სამიანი, 6-დან 4 საჯარიმო ჩააგდო, მეტოქეებს წესები რვაჯერ დაარღვევინა. მარგი ქმედების კოეფიციენტის მიხედვით გოგას ბადალი არ ჰყავდა - 31.

ამას მოჰყვა "რეალთან" გამარჯვება 73:60. ქართველი ფორვარდი წარმატების ერთ-ერთი მთავარი ფაქტორი რომ იყო, ამას მისი სტატისტიკაც ადასტურებს: 28 წუთი, 13 ქულა, 10 მოხსნა, 1 ჩაჭრა, 3 დაფარება.

ამ მატჩის შემდეგ გამოცემა "ევროსპორტმა" დაწერა: "მას შემდეგ, რაც სლოვენიელი ლუკა დონჩიჩი NBA-ში გადავიდა, გაჩნდა შეკითხვა - ვინ იქნებოდა შემდეგი დიდი ევროლიგელი, ვინც ამერიკის ნაციონალურ საკალათბურთო ასოციაციას მიაშურებდა.

ამ შეკითხვაზე პასუხი უკვე გვაქვს - გოგა ბითაძე, 1999 წლის 20 ივლისს დაბადებული ქართველი ცენტრი, რომელიც "ბუდუჩნოსტის" ღირსებას იცავს.

ამ სეზონში ბითაძემ "მეგა ბიმაქსში" 11 მატჩი გამართა (ადრიატიკის ლიგაზე). 19 წლის ყმაწვილის კვალობაზე სტატისტიკა შთამბეჭდავი ჰქონდა: 20.2 ქულა, 7.9 მოხსნა, 2.5 დაფარება, ორქულიანების რეალიზების 64.5 და სამიანების 41.7 პროცენტი.

ბითაძე თანამედროვე ცენტრია - ეფექტურია ფარქვეშაც და თუ გუნდს დასჭირდა, ახლო და შორი დისტანციიდანაც შეუძლია ტყორცნა. კარგად ნავარჯიშები ტანით (211 სმ, 112 კგ) გოგას მშვენივრად შეუძლია სირბილი, მობილური ცენტრია და საოცრად აქტიურია ფარქვეშ მოხსნებისა და დაფარებებისას."

ახლაც მკაფიოდ მახსოვს 2003 წლის დრაფტისწინა სტატიები. ზაზა ფაჩულიას ყოველი ხსენებისას ამატებდნენ - ევროლიგაზე "პანათინაიკოსთან" 26 ქულა, 8 მოხსნა ჰქონდა და ტურის საუკეთესო კალათბურთელადაც დასახელდაო.
ეს მატჩი 9 აპრილს იყო, "ულქერმა" 19-ქულიანი სხვაობით სძლია ბერძნებს...

- სიტყვით ვერ გადმოვცემ იმ მძაფრ შეგრძნებებს, მატჩისას და მისი დასრულების შემდეგ რომ განვიცადე. ეს იყო ჩემი საუკეთესო თამაში "ულქერის" მაისურით. ბედნიერი ვარ, რომ იგი ევროლიგის ჩემპიონთან შეხვედრას დაემთხვა. არავის ეგონა, "პანათინაიკოსს" თუ მოვუგებდით, ჩვენ ხომ ტოპ-16-ში მანამდე ყველა მატჩი წავაგეთ. ბერძნებს კი ფინალურ ოთხეულში გასვლის პრეტენზია ჰქონდათ... რაც შეეხება 26 ქულას, ეს ჩემი საევროლიგო რეკორდია.

მანამდე ყველაზე მეტი, 21 ქულა იტალიურ "სკავოლინისთან" ჰქონდა. ისე კი თურქული რეკორდი ვერ გააუმჯობესა, 2001-ში თასის მეოთხედფინალშიც 26 ქულა ჰქონდა.

"პანათინაიკოსთან" მატჩის საფინალო სირენა... და ყველა ჟურნალისტი ზაზასთან გაჩნდა - რას იტყვიო.

- რა უნდა მეთქვა? ეიფორიაში ვიყავი, - გამოუტყდა ქართული გაზეთის "სარბიელის" კორესპონდენტ ირაკლი პერტაიას ზაზა და განაგრძო:

- ერთი რამ კი მქონდა სათქმელი - მწვრთნელს წინა მატჩებშიც ამდენი რომ ვეთამაშებინე, ახლა უკეთესად ვიბურთავებდი-მეთქი. თუმცა თავი შევიკავე. ამის თქმა, ჩემგან არ იქნებოდა ლამაზი. როცა მათამაშებდნენ, ჩემსას ვცდილობდი: "პანათინაიკოსამდე" თურქეთის ჩემპიონატში "ოიაკს" 24 ქულა ჩავუგდე, "ტელეკომს" - 13, ითუ-ს - 17... არ მინდა ჩემს ქულებზე ბევრი ლაპარაკი, მინდა ცოტა მეტი დრო. ამით ხომ "ულქერიც" იხეირებს და მეც.
როგორ თქვა ზაზამ - ჩემს ადგილს მოვნახავო? NBA-ის გულისხმობდა ხომ?

- სწორედაც! NBA-ში თამაში ჩემი მთავარი მიზანია. "პანათინაიკოსთან" მატჩის შემდეგ თურქებიც ალაპარაკდნენ ამერიკულ პერსპექტივაზე. შინ რომ მივედი, ჩანაწერს ვუყურე, სადაც თურქი კომენტატორები ამბობდნენ, ფაჩულია NBA-ში აპირებს წასვლას და თუ ეს დაუშვა, "ულქერისთვის" ამაზე ცუდი არაფერი იქნებაო. ახლა გაახსენდათ ჩემი ამერიკაში გადასვლა? სათადარიგოთა სკამს რომ ვიყავი მიჯაჭვული, მაშინ არავის ვახსოვდი. მე კი მიმაჩნია: "პანათინაიკოსთან" მატჩით იმ სახლის კედლები ავაშენე, NBA რომ ჰქვია.



მოვიდა დრაფტი

ზაზა ფაჩულიას 2003 წლის დრაფტზე ზოგიერთი კლუბი პირველ წრეში (30-ეულში) აყვანას ჰპირდებოდა, მაგრამ 42-ე ნომრად "ორლანდო მეჯიქმა" აირჩია.

ზაზას დრაფტის დასრულებისთანავე ველაპარაკე და გაბრაზებულმა მითხრა - ამერიკელ მწვრთნელებს მალე დავუმტკიცებ, რომ შეცდნენ და პირველ წრეში არჩევას ვიმსახურებდიო.

მეორე წრეში აყვანა იმას ნიშნავს, რომ კალათბურთელს საზაფხულო ლიგებზე დასამტკიცებელი აქვს რა შაუძლია და არც კონტრაქტი აქვს გარანტირებული. დიდი ალბათობაა, ევროპაში დააბრუნონ. თუ მაინც მიაღწია ხელშეკრულების გაფორმებას, მინიმალურ თანხას იღებს - 750 ათას დოლარს.

ზაზამ საზაფხულო ლიგებზე კარგი თამაშით კი დაიმსახურა კონტრაქტი "მეჯიქისგან", მაგრამ მწვრთნელები მასზე ყურადღებას ვერ გაამახვილებდნენ: მათ დრაფტის პირველ წრეში არჩეულები ჰყავდათ მისახედი - ხომ უნდა დაემტკიცებინათ, რომ არჩევანში არ შემცდარან.

"ორლანდო" სეზონის ბოლოს იოლად შეელია ფაჩულიას, ისევე როგორც მომდევნო სეზონში "მილუოკი ბაქსი". 2005 წელი ქართველი ცენტრისთვის გარდამტეხი აღმოჩნდა - ხელშეკრულება გააფორმა "ატლანტა ჰოქსთან", მშენებარე ახალგაზრდა გუნდთან. ფაჩულია სასტარტო ხუთეულის წევრად იქცა და საშუალოდ 31.4 წუთში 11.7 ქულასა და 7.9 მოხსნას აგროვებდა (2005-06).

"ატლანტას" შემდეგ იყო "მილუოკი", "დალასი", "გოლდენ სტეიტი" და ახლა - "დეტროიტი". ამასობაში კი გავიდა 16 წელი NBA-ში გადასვლიდან... დღეს მას ორი საჩემპიონო ბეჭედი აქვს.

ყველაზე მთავარი იცით რა არის? - ზაზა 1999 წლიდან 2017 წლამდე რეგულარულად ჩამოდიოდა საქართველოს ნაკრებში სათამაშოდ. მხოლოდ ევრობასკეტი 2013 გამოტოვა - აქილევსის მყესის ოპერაცია ჰქონდა გაკეთებული...



ისევე როგორც ფაჩულიამ, გოგა ბითაძემაც, პირველ რიგში, სანაკრებო თამაშებიდან შეაყვარა თავი ქართველ გულშემატკივარს. სადღეისოდ მსოფლიოსა და ევროპის ჩემპიონატების შესარჩევი ეტაპები შუა სეზონში იმართება და NBA-ში წასვლის შემდეგ გოგა შესარჩევზე ნაკრებს ვერ დაეხმარება, თუმცა უახლოესი ევრობასკეტი 2021 წელს იმართება და ნამდვილად არ გვყავს ის გუნდი, ფინალურ ეტაპზე ვერ გააღწიოს. იქ კი გამოცდილ შენგელიასა და შერმადინს ახალგაზრდა ბითაძე და ბურჯანაძე შეუწყვილდებაიან და...

ზაზას მაგალითზე გარკვევით ავხსენით რამდენად უარყოფითად მოქმედებს კალათბურთელის კარიერაზე მეორე წრეში არჩევა. ეს რომ თავიდან აერიდებინა, ამიტომაც მოხსნა ბითაძემ კანდიდატურა 2018 წელს დრაფტიდან.

მას სპეციალისტები უკვე პირველ წრეში აყვანას უწინასწარმეტყველებენ, რაც გარანტირებული კონტრაქტი და მწვრთნელის უზომო ნდობაა. დანარჩენი უკვე ბითაძეზე იქნება დამოკიდებული.

ჩვენ კი ის დაგვრჩენია, გოგას NBA-ს მინიმუმ 16-სეზონიანი კარიერა და მინიმუმ ორი საჩემპიონო ბეჭედი ვუსურვოთ.

2290
მკითხველის კომენტარები / 2 /
N
1
პირველ რიგში, შევთანხმდეთ, გოგას თამაში ყველას ძალიან მოგვწონს და მისგან დიდ წარმატებებს ველოდებით!

ჩემის აზრით, 19 წლის ასაკში შედარება დიდი ვერაფერი ბედენაა. მთავარია, საბოლოოდ ვინ რა შედეგს დადებს. აი, ზაზას უკვე ორი ბეჭედი აქვს, რაც, ჩემის აზრით, გოგასათვის ერთგვარი ნიშნული უნდა გახდეს. ამ მხრივ, მახსენდება გასული საუკუნის 80–იანი წლების დასაწყისში არგენტინის ფეხბურთის ნაკრების მწვრთნელს, სესარ ლუის მენოტის ჰკითხეს: ვინ უფრო დიდი ფეხბურთელია, პელე თუ მარადონაო. მენოტიმ უპასუხა: ჯერ მარადონამ სამჯერ მოიგოს მსოფლიოს ჩემპიონატი და 1000 გოლი გაიტანოს და მერე ვილაპარაკოთო. ასეა ეს. წიწილებს შემოდგომაზე ითვლიან!

კიდევ ერთხელ, გოგა, ძალიან გვჭირდები, ძალიან გქომაგობთ და დიდ წარმატებებს ველოდებით შენგან!!!
tinto bras
4
რასაც ზაზამ მიაღწია, იგივეს მიაღწევს ბითაძე??
მსგავსი ამბები
რუბრიკის სხვა სიახლეები
;