ზაზა ფაჩულია და NBA-ს ოლ სტარი... საგა 2007 წელს დაიწყო

"ფეისბუქზე" წლეულსაც ყველას გხვდებათ ლათინური ჰეშტეგიანი წარწერა #NBAvoteZazaPachulia. ეს იმას ნიშნავს, რომ NBA-ში "ოლ სტარის" მონაწილეთა შერჩევა დაწყებულია. ჩვენც აქტიურად უნდა დავუჭიროთ მხარი ჩვენს წარმომადგენელ ზაზა ფაჩულიას, რომელიც ვარსკვლავთა მატჩთან ყველაზე ახლოს 2016 წელს იყო. 14 ათასი ხმა დააკლდა, რომ კავაი ლეონარდისთვის ეჯობნა და მის მაგივრად ეთამაშა "ოლ სტარში".

ზაზას საოლსტარე საგა არც დღეს დაწყებულა და არც გუშინ - 2007 წლიდან იღებს სათავეს. მაშინ ჩვენი ცენტრი შაკილ ონილთან და დუაით ჰოვარდთან კონკურენციაში ცდილობდა ვარსკვლავთა მატჩში მოხვედრას...

თუ ვინმეს სიტყვა "საგა" გადამეტებულად მოეჩვენა, ვურჩევთ, პუბლიკაცია ბოლომდე ჩაიკითხოს. მანამდე კი მოგახსენებთ, რომ საგა ძველი სკანდინავიური საგმირო თქმულებაა. რა გმირობა ჩაიდინა ზაზამ და ქართველმა ხალხმა 2016 და 2017 წლებში, ამის შესახებ ბევრმა იცის, მაგრამ ქვემოთ დეტალურად მოგახსენებთ.

შვეიცარიელმა... დანიელმა... ან თუნდაც შვედმა, შესაძლოა, არც იცოდეს, ვინ არის მისი ქვეყნის პრეზიდენტი. იცით, რატომ? იმიტომ, რომ მას ნაკლებად აინტერესებს პოლიტიკა. სამაგიეროდ, მშვენივრად ეცოდინება, ვინ არის ზლატან იბრაჰიმოვიჩი, რომ მისი მამა ბოსნიიდან გადასახლდა შვედეთში...

სპორტი ხომ პოლიტიკაზე უფრო საინტერესო, უფრო მიმზიდველია და ჩამთრევია. დალაგებულ ქვეყნებში ხალხი გამოხშირვის მეთოდით არჩევს ინტერესთა სფეროს და მისთვის წარმოუდგენელია, როგორ შეიძლება უყურო რეპორტაჟს პარლამენტიდან, როცა სხვა არხზე "მანჩესტერი"-"ლივერპულის" რეპორტაჟი მიმდინარეობს.

ბოლო დროს, ამ მხრივ სიტუაცია ჩვენთანაც უმჯობესდება, ხალხს პოლიტიკა სწყინდება და სპორტულად ექცევა. არა? არ გჯერათ? აბა, გავიხსენოთ 2016 წელი - NBA-ს "ოლ სტარის" გამოკითხვისას ჩვენი "ფეისბუქის" "კედლები", ყოველ ნაბიჯზე რა წარწერა გვხვდებოდა? #NBAvoteZazaPachulia ხომ არა?

როგორ ფიქრობთ, ზაზას უფრო მეტი იცნობს მსოფლიოს მასშტაბით თუ... ჩვენს პოლიტიკოსებს? ჯერ კიდევ 2016-ში ამერიკულ Gოოგლე-ში ჩავწერე გოლდენსტეიტელი ქართველის გვარ-სახელი, იმის გამოსარკვევად, ინტერნეტსივრცეში რამდენჯერ იყო ნახსენები.

533 000-ჯერ. კიდევ რამდენიმე ცნობილი გვარი ჩავწერე, პოლიტიკოსისაც, ხელოვანისაც, მაგრამ 533 000-ს ვერც ერთმა ვერ გადააბიჯა. ზაზა პირველი იყო.

იცით, რატომაა ეს სასიამოვნო? - იმიტომ, რომ იგი სპორტსმენია, მიზანს არაადამიანური შრომით მიაღწია, ყოველი მატჩის შემდეგ გასახდელში დასისხლიანებული ბრუნდება.

2016 და 2017 წლების NBA-ს "ოლ სტარის" გამოკითხვისას მიმომხილველები ყველაზე მეტად ფაჩულიას გვარს ახსენებდნენ, უკვირდათ, როგორ ახერხებდა იგი დემარკუს კაზინსსა თუ ენტონი დევისზე მეტი ხმის მოგროვებას.

შესაძლოა, ბევრს არ ახსოვს, მაგრამ ზაზამ მოთელვა 2007 წელს გაიარა, პირველად სწორედ მაშინ გაუჩნდა "ვარსკვლავთა" მატჩში მოხვედრის შანსი. ატლანტელი ფაჩულია აღმოსავლეთის კონფერენციის ცენტრებში მეექვსე ადგილზე გავიდა, ჩამორჩა შაკილ ონილს, დუაით ჰოვარდს, ბენ უოლასს, ალონზო მურნინგსა და ენდრიუ ბოგატს. იცით, რამდენი ხმა მიიღო ქართველმა? - 244 507!

მაშინ გამოკითხვა მხოლოდ NBA-ს ოფიციალურ საიტზე მიმდინარეობდა, დღეში ერთი ხმის უფლება გვქონდა. სოცქსელების დაუხმარებლად 244 507 ხმის მოგროვება სახუმარო საქმე როდია...

2007 წლის შემდეგ გამოკითხვის მეთოდმა ტრანსფორმაცია განიცადა, საქმეში სოციალური ქსელების მომხმარებლებიც ჩაერთვნენ და ხმის მიცემის პროცედურა გამარტივდა. შეიცვალა გუნდების დაკომპლექტების სისტემაც: 2000-იანებში სასტარტო ხუთეულები სამ ამპლუად იყოფოდა - უკანახაზელებად, ფორვარდებად და ცენტრებად.

ასეთი სისტემა რომ შენარჩუნებულიყო, 2016-ში ზაზას "ოლ სტარში" აუცილებლად ვიხილავდით. ამჟამად კალათბურთელები ორ ამპლუად არიან გაყოფილნი - უკანახაზელებად და წინახაზელებად. ცენტრები ფორვარდებში შეერია. როგორ გინდა გაუწიო წინააღმდეგობა დასავლეთის კონფერენციის თავდამსხმელებს - კავაი ლეონარდს, კობი ბრაიანტს, კევინ დურანტს?! გამოკითხვაში წინახაზელთა ტოპტრიოში სწორედ ესენი მოხვდნენ და "ოლ სტარი 2016-იც" ითამაშეს.

ქართველი გულშემატკივრების საოცარი მონდომების წყალობით ზაზამ 768 112 ხმა მოაგროვა და სულ ცოტა დააკლდა ხუთეულში გასასვლელად. კავაი ლეონარდმა მას 14 228 ხმით აჯობა. ფაჩულიამ ნოვიცკისა და დანკანს გადაასწრო.

მომდევნო წელს "გოლდენ სტეიტის" ქართველმა ცენტრმა საკალათბურთო საზოგადოება კიდევ უფრო გააოცა - "ოლ სტარის" გამოკითხვაში გულშემატკივართა 1 528 941 ხმით დასავლეთის ფორვარდთა შორის მე-2 ადგილზე გავიდა (დურანტის შემდეგ).
...მაგრამ ვარსკვლავთა მატჩში მაინც ვერ მოხვდა. მიზეზი "ზაზას წესია"!

- მჯერა იმის, რასაც ვამბობ: ჩვენ, ქართველებმა, "ოლ სტარის" წესები შევცვალეთ. შარშან მართლაც ცოტა დამაკლდა. ეს უკვე გამარჯვება იყო, რადგან სწორედ ამ შემთხვევის გამო, მიმდინარე სეზონის წინ კომისარი ადამ სილვერი და NBA-ს ხელმძღვანელობა შეიკრიბა და წესებში ცვლილებები შეიტანა.

თუ აქამდე მხოლოდ ფანებზე იყო დამოკიდებული, ამჯერად ხმების მეორე ნახევარი კალათბურთელებს, მედიასა და მწვრთნელებს ეკუთვნით. მედია ლიგის მნიშვნელოვანი ნაწილია და ხმის უფლება ნამდვილად უნდა ჰქონოდა, - განმარტავს ჩვენიანი.

გამოკითხვის დასრულებისთანავე იგი პოპულარულ რადიოგადაცემა BJ BUCHER-ზე ამავე სახელის წამყვანმა მიიწვია. "ოლ სტარში" ვერმოხვედრით იმედგაცრუებული ხომ არ ხარო?

- საინტერესო სიტუაციაში აღმოვჩნდი: ვარსკვლავთა მატჩზე მივდიოდი და ვერ მივედი. სიმართლე გითხრათ, გაწბილებული ნამდვილად არ ვარ. ეს ის შემთხვევა იყო, რომლის კონტროლიც არ შემეძლო, დამოკიდებული ვიყავი ფანებზე, მწვრთნელებზე, კალათბურთელებზე... გამოკითხვა ერთი თვის განმავლობაში მიმდინარეობდა, ძალიან საინტერესო და სასიამოვნო პროცესი გახლდათ. შარშანდელი "ოლ სტარის" გამოკითხვა სახალისო იყო, წლევანდელი - ორმაგად სახალისო, რადგან მივიღე უფრო მეტი ხმა. ვერც ერთხელ ვერ მოვხვდი, მაგრამ მაინც სასიამოვნო იყო, თუნდაც იმიტომ, რომ დავინახე, ხალხი მქომაგობს, ხმას მაძლევს, ვუყვარვარ, პატივს მცემს, უნდა "ოლ სტარში" მიხილოს. ეს დიდებულია.

BJ BUCHER არ მოეშვა: გასაგებია, რომ ხალხის სიყვარული დაინახე, მაგრამ თავაწევით რატომ არ ამბობ - "ოლ სტარში" მოხვედრა მეკუთვნისო?! თუნდაც იმ ხალხის გამო, ვინც ხმა მოგცა. ნეგატივს რატომ არ ხედავ?

- ეს ყველაფერი პიროვნების ხასიათზეა დამოკიდებული. ნამდვილად არ მინდოდა, ვინმესთვის მომეწოდებინა, ხმა მომეცით-მეთქი. საშუალოდ 15 ქულა და 10 მოხსნა რომ მქონოდა, მაინც არავის ვთხოვდი. სოციალურ მედიაში რომ მეაქტიურა, ტელევიზიით ხალხისთვის მომეწოდებინა, ტელეფონით რომ მერეკა, შესაძლოა, "ოლ სტარში" მოვხვედრილიყავი, მაგრამ ამ სიტუაციის ხიბლი ის არის, რომ ყველაფერი ნატურალურად მოხდა. ამიტომ ვამაყობ, ამიტომ ვგრძნობ თავს კარგად.

რადიოს წამყვანი დაინტერესდა, ვის მისცა ხმა ფაჩულიამ...

- ძირითადად, ჩემს თანაგუნდელებს. საკუთარი თავისთვის ხმა ნამდვილად არ მიმიცია. აკი აღვნიშნე, მეც, ჩემს ოჯახსაც გვსურდა, რომ ყველაფერი მართლაც ბუნებრივად ყოფილიყო.

ჯერ კიდევ 2007 წელს ზაზამ მითხრა: - ვარსკვლავთა მატჩში ვერ მოვხვდი, მაგრამ ეს იმას არ ნიშნავს, რომ იქ თამაშის შანსი აღარ მექნება.
მაშინ სერიოზულად დავფიქრდი ზაზას ნათქვამზე, როგორ შეიძლება ასე თამამად ლაპარაკი იმ სანახაობაზე, რომელიც წელიწადში ერთხელ იმართება, მასში ონილები და ბრაიანტები თამაშობენ?!

თურმე ზაზამ იცოდა, რასაც ამბობდა, საკუთარი თავის იმედი ჰქონდა...

...ქართველი ხალხის ძალაც იგრძნო, რომელმაც NBA-ს ხმამაღლა მისწერა: #NBAvoteZazaPachulia.

...გამოკითხვა გრძელდება.

1845
მკითხველის კომენტარები / 0 /
მსგავსი ამბები
რუბრიკის სხვა სიახლეები