ზაზა ფაჩულია: ეს არის ომი უხილავი მტრის წინააღმდეგ... იზოლაციისას არის ორი რამ, რაც აუცილებლად უნდა ვაკეთოთ

მსოფლიო აღარ მოძრაობს, სახლშია. არავინ იცის, რა დროში დავამარცხებთ კორონავირუსს. შესაბამისად, დიდი მნიშვნელობა აქვს შინ ყოფნისას შევინარჩუნოთ ერთგვარი რიტმი...

ამას კარგად ახერხებს ზაზა ფაჩულია, რომელიც ამჟამად ოჯახთან ერთად სან ფრანცისკოშია. როდესაც ვწერთ "კარგად ახერხებსო", იქვე უნდა მივამატოთ - მეტ-ნაკლებად, რადგან იზოლაციამ ნებისმიერი ადამიანის ცხოვრება მნიშვნელოვნად შეცვალა, მგალითად: სრულყოფილად ვერ შევასრულებთ იმას, რაც სატრენაჟორო დარბაზში უნდა გაგვეკეთეინა და ა.შ.

ზაზას ამერიკაში დავუკავშირდით და ცოტა უჩვეულო ინტერვიუ გამოვიდა. თუ აქამდე საქართველოს ნაკრებზე, NBA-ზე, ჩემპიონობაზე ველაპარაკებოდით, ახლა ომზე, ოჯახზე, წიგნებსა და შინ ვარჯიშზე ვისაუბრეთ.

"შინ, ოჯახთან ერთად ვარ და მაქსიმალურად ვცდილობ გარეთ არ გავიდე, ხალხთან ახლო კონტქატზე ხომ ლაპარაკიც ზედმეტია. ძირითადად კომპიუტერითა და ტელეფონით მაქვს კომუნიკაცია როგორც სამსახურის, ასევე პირად საქმეზე.

მსოფლიოში მძიმე მდგომარეობაა. ვირუსის გავრცელება დიდი ხანია დაიწყო და დღეს არ ჩანს ვადა, როდის დასრულდება ეს ყველაფერი. ბევრი ამბობს და ვეთანხმები - ერთგვარ ომში ვართ, გვყავს უხილავი მტერი, რომელსაც ერთად ვებრძვით. ვეცნობი სხვადასხვა ქვეყნის მონაცემებს. ძალიან ცუდია, რომ დაავადებულთა რიცხვი ისევ ზევით მიდის, დაღმართისკენ ჯერ არ წასულა...

ეს თავისთავად სტრესის მომგვრელია. ბევრს უჭირს, ბევრიც იმ კატეგორიის ადამიანია, ესა თუ ის საქმე ახალი დაწყებული აქვს, კოროვანირუსმა კი შუა გზაზე შეაწყვეტინა. ეს არის ომი, რომელშიც მოგებული არავინაა, ბევრი ადამიანი ავადდება და იღუპება.

ჩვენი ამოცანაა ერთად დავამარცხოთ ვირუსი. ამას კი მხოლოდ იმ შემთხვევაში შევძლებთ თუ სპეციალისტების რჩევას მოვუსმენთ და მითითებებს ზედმიწევნით კარგად შევასრულებთ. კორონავირუსი მსოფლიოს მტერია, რომელიც ერთმანეთის გვერდში დგომით უნდა დავამარცხოთ. ვგულისხმობ ფსიქოლოგიურად, ფინანსურად ან თუნდაც სიტყვით გვერდში დადგომას. ეს ძალიან მნიშვნელოვანია.

[ისტორიული VIDEO] ზაზა ფაჩულია საქართველოს ნაკრებში: თითოეული მომენტი უთუოდ უნდა გახსოვდეთ

ისევე როგორც ყველა ადამიანის ცხოვრებაში, ახალმა რეალობამ ჩემს ცხოვრებაშიც უკვე ბევრი შეცვალა. როგორც აღვნიშნე, სამსახურის საქმეებს შინიდან ვაწარმოებ, ტელეფონით, ინტერნეტით, ვიდეოზარებით. ჩემი შვილებიც სახლიდან არიან ჩართულნი აქტივობებში. თუმცა აქამდე მუდმივად მოძრაობაში იყვნენ. ზოგიერთი აქტივობა შევწყვიტეთ...

კალათბურთი ჩემს თავზე ავიღე და ბავშვებთან ერთად ყოველდღიურად ვვარჯიშობ. არ ვიცი, რამდენ ხანს გაგრძელდება კორონავირუსისგან იზოლაცია, ამიტომ ვცდილობ, ოჯახთან ერთად მოვახერხო ადაპტირება და გავაგრძელოთ ის საქმე, რაც გვიყვარს. საამისოდ საჭიროა ერთი ფარი, ბურთი და პატარა სივრცე. ეს ყველაფერი გვაქვს. დანარჩენს დრო გვიჩვენებს, მოუთმენლად ველი, როდის დაიწყება ინფიცირებულთა რაოდენობის კლება...

ზაზა ფაჩულიას VIDEO მიმართვა ბიზნესსექტორს

როგორც აღვნიშნე, ცვლილებები ყველას ცხოვრებაში მოხდა და კიდევ ბევრი იქნება. რაც მთავარია - დღევანდელი სიტუაცია აუცილებლად გვიბიძგებს, გადავხედოთ ღირებულებებს. აქამდე ბევრს არ ჰქონდა დრო შვილებთან სრულყოფილი ურთიერთობისთვის. ეს, რა თქმა უნდა, რთული სამუშაო რეჟიმის ბრალია, თუმცა ამის მერე, ბევრ ღირებულებას გადავაფასებთ, კიდევ ერთხელ დავფიქრდებით, რა მნიშვნელობა აქვს ოჯახს და ვეცდებით, რაც შეიძეება მეტი დრო დავუთმოთ.

როდესაც სახლში გიწევს ყოფნა, ლიმიტირებული ხარ. ვერ აკეთებ ყველაფერს, რაც გსურს. თუმცა არსებობს რამდენიმე რამ, რაც შეგიძლია და უნდა გააკეთო. ასეთი საქმიანობის ტოპ-ხუთეულში აუცილებლად უნდა შევიდეს კითხვა და ვარჯიში. ორივე ძალიან მნიშვნეოვანია განსაკუთრებით მაშინ, როცა რამდენიმე კვირა და შეიძლება თვეობით შინ ყოფნა გიწევს.

ასეთ მდგომარეობას მეორე მხარეც აქვს - დრო გიჩნდება იმისთვის, რისთვისაც ყოველდღიური სამუშაო პროცესის გამო ვერ იცლიდი. უნდა იმუშაო საკუთარ თავსა და განვითარებაზე. დრო, რომელიც ახლა გამოგვიჩნდა, მაქსიმალურად ეფექტურად უნდა გამოვიყენოთ.

იზოლაციის პირობებში ვერ ვხედავ მიზეზს, რამაც შეიძლება ხელი შეგვიშალოს ვარჯიშში ან თვითგანვითარებაში. 24 საათის განმავლობაში საამისოდ დრო აუცილებლად უნდა გამონახო. შინ მარტო არ ვვარჯიშობ - ჩემს მეუღლესთან, თიკასთან და ბავშვებთან ერთად ვხალისობ. ექსტრემალურმა მდგომარეობამ კრეატიული აზროვნებაც გააღვივა - ნამდვილად არ მეგონა, რომ ოდესმე სავარჯიშო დარბაზში ვერ წავიდოდი, ამიტომ საჭირო აქსესუარები სახლში არ მაქვს. ხან ბავშვს ავიყვან და ისე ვვარჯიშობ, ხან სხვა ორიგინაურ ხერხს მოვიფიქრებ... ეს დროის დადებითად გატარების მშვენიერი საშუალებაა. თან, ძალიან მნიშვნელოვანია ჯანმრთელობისთვის.

ინტერნეტის ეპოქაში ვცხოვრობთ. დღეს ნებიმიერისთვის ხელმისაწვდომია ონლაინ-გაკვეთილები, ონლაინ-ვარჯიშები. შეგიძლია აირჩიო, რა ტიპის ვარჯიში გინდა და ინტერნეტში აუცილებლად მოძებნი. ეს კიდევ უფრო ამარტივებს საქმეს. აქვე მინდა შეგახსენოთ, რომ ზაზა ფაჩულიას აკადემიას "ფეისბუქის" გვერდზე სპეციალური ონლაინ-ვარჯიშები გვაქვს ჩვენი პატარა კალათბურთელებისთვის, რაც არა მხოლოდ აკადემიის ბავშვების, არამედ ნებისმიერი მსურველისთვისაა ხელმისაწვდომი.

ყველა ადამიანს საკუთარი ინტერესი აქვს. სწორედ ამის მიხედვით უნდა განვითარდეს. მაგალითად: მე და ჩემს მეუღლეს, თიკას სხვადასხვა ტიპის ლიტერატურა გვაინტერესებს. ის მხატვრულს კითხულობს, მე ბოლო დროს ინფორმაციას სტატიებით ვიღებ. ვეცნობი ბიზნესის, ეკონომიკისა და მსოფლიოს სხვადასხვა კუთხეში მიმდინარე ამბებს. კალათბურთი უნივერსალური რამაა, ბევრი მეგობარი შემძინა მსოფლიოს მასშტაბით და მაინტერესებს მათ ქვეყანაში მიმდინარე ამბები. ვფიქრობ დღეს ყველასთვის მნიშვნელოვანია, რა ხდება იტალიაში, ჩინეთში, თუნდაც ინდოეთში...

თუ გაინტერესებთ, იმასაც გეტყვით, რომ ბოლო წიგნი, რომელიც წავიკითხე მარშალ გოლდსმიტის ნაშრომია - What got you here, won't get you there. იზოლაციისა და კარანტინის პირობებში ბევრი გვირჩევს რა წიგნი წავიკითხოთ. მე გირჩევთ - წაიკითხეთ ის, რაც გსიამოვნებთ და რაც თქვენს განვითარებას შეუწყობს ხელს.

გისურვებთ ჯანმრთელობას და გამარჯვებას მსოფლიო ომში უხილავი მტრის წინააღმდეგ."

6036
მკითხველის კომენტარები / 2 /
ნანა
3
ჯანმრთელობას ვისურვებ თქვენს ლამაზ ოჯახს, იმედია მალე დასრულდება ეს საყოველთაო კარანტინი და ყველა ჩვენ-ჩვენ საქმეს მივუბრუნდებით
ქართველი
3
ნეტავი ყველა შენნაირად იყოს ჩემო ზაზა, ჩვენო სიამაყე. ჩვენ, "მოკვდავნი" მხოლოდ შიმშილზე ვფიქრობთ, კორონაზე საშიში რომ არის, ხვალინდელი დღის დარდი გვანადგურებს, უსახსრობის და უმუშევრობის გამო რომ გველოდება, მართლაც სახელმწიფო მეწველი ძროხა ხომ არ არის, როდემდე შეგვიწყობს ხელს ჩვენ საცოდავებს.
მსგავსი ამბები
რუბრიკის სხვა სიახლეები
;