ზაზა ფაჩულია: უესტბრუკს იმიტომ წამოვადექი თავს, რომ...

ESPN-მა საინტერესო ვიდეო მოამზადა ზაზა ფაჩულიასა და მისი ოჯახის შესახებ. ვეცადეთ, ეს ვიდეო გაზეთის ფურცლებზე 2D ფორმატში გადმოგვეტანა...

ავტორი ზაზას ოჯახთან ერთად მიემგზავრება სან ფრანცისკოს მუზეუმში. გზაში ბავშვებს ეკითხება:

- ვინ არის თქვენი საყვარელი მოთამაშე?

- სტეფ კარი, - საბა ფაჩულია.

- KD (კევინ დურანტი), - დავით ფაჩულია.

- კლეი ტომპსონი, - პატარა მარიამ ფაჩულია.

- გილოცავ, კლეი, - ეს უკვე ზაზას კომენტარია.

"როგორც ხედავთ, ზაზა არც შვილებისთვისაა საყვარელი კალათბურთელი, - დაასკვნა ამერიკელმა წამყვანმა, - ზოგის აზრით, იგი NBA-ში ერთ-ერთ ყველაზე ბინძური მოთამაშეა. დღეს სხვა მხრიდან გავიცნოთ ფაჩულია. მასთან ერთად გადავკვეთოთ ყურე და მუზეუმს ვესტუმროთ. როგორც სხვა შემთხვევებში, ამჯერადაც თავისუფალ დროს ოჯახთან ატარებს. კალათბურთელ მეუღლესთანაა თიკაც, რომელიც 11 წლის წინათ გაიცნო. ის ქართული ნაციონალური ბალეტის მოცეკვავე იყო."

- ზაზასთან ერთად გიცეკვიათ?

- იგი ძალიან ცუდი მოცეკვავეა. ვერ მოძრაობს, - პასუხობს თიკა ალავიძე.

- ვერ მოძრაობს? ზოგჯერ ამიტომ ხომ არ აქვს პრობლემები მოედანზე?

- ასე ვფიქრობ. ცოტა მოუქნელია.

"მოუქნელი თუ ბოროტი ჩანაფიქრებით?" - ისევ ESPN-ის წამყვანი სვამს შეკითხვას. ამჯერად "სან ანტონიოს" თავკაცი გრეგ პოპოვიჩი პასუხობს:

- მას აქვს ისტორია ამ ტიპის მოქმედებებისა, ბინძურად თამაშისა...

- ნახეთ? მან განზრახ იმოქმედა ასე, - ეს უკვე რასელ უესტბრუკმა თქვა ნამატჩევს.

- ეს ზაზაა, ზაზას სტილში თამაშობს, - რასელს თანაგუნდელი პოლ ჯორჯი გამოექომაგა.

- ყველაზე მცდარი შეხედულება თქვენს შესახებ, - ეკითხება ჟურნალისტი ზაზას.

- გასაგებია, რასაც მეკითხებით. სამწუხაროა, რაც მოხდა გასულ წელს კავაი ლეონადრთან დაკავშირებით. მაგრამ ასეთები შეიძლება ყოველდღე მოხდეს.

- ეს არ იყო წინასწარ განზრახული მოქმედება?

- არა, არ ყოფილა.

- წლეულს, რასელ უესტბრუქთან დაჯახება?

    ⇒ზაზა ფაჩულიას მეუღლე ESPN-ს: ასეთი სიძულვილი ცხოვრებაში პირველად ვიგრძენი [თარგმანი]

- არც ეს. ვიგრძენი, რომ ვიღაცა მუხლზე მომაწვა. ეს ნიკ იანგის ფეხი იყო. შეიძლება ეს განზრახ გააკეთა, რაც მეტად მოხერხებული ნაბიჯი იყო მისი მხრიდან. ცუდად ითამაშა და შეიძლება თავისი მოქმედებით ამის გადაფარვა უნდოდა. ასეთ რამეებზე არავინ ლაპარაკობს.

- ლეონარდთან შეჯახების შემდეგ ბევრი მუქარა იყო...

- ცუდ სიტუაციაში ვიყავი. ყველაზე უარესი ის იყო, რომ ჩემს ოჯახსაც დაემუქრნენ, - თქვა ზაზამ. მისმა მეუღლემ კი განაგრძო:

- ცხოვრებაში პირველად ვიგრძენი ვიღაცის სიძულვილი ზაზასადმი. მივიღეთ ბევრი მუქარის მესიჯი. ასეთ დროს კი, პროტოკოლია - უსაფრთხოების ზომები უნდა მიიღო.

- რას ფიქრობდი უესტბრუკს რომ წამოადექი?

- იგი ფეთქებადია, სისწრაფეს რომ აკრებს, რთულია შეჩერება. ამიტომ, ჩვენს ნახევარზე გადმოსვლისთანავე ვეცადე ჯარიმით შემეჩერებინა. ტაიმის ბოლო წუთები იყო და ფოლის მიღების უფლება გვქონდა. თავს რატომ წამოვადექი? იმიტომ, რომ ახლაც ვთვლი, მან გააფორმა, ისეთი შეჯახება ნამდვილად არ იყო, რომ ასე ეგორავა. ხალხს რა კუთხითაც სურთ, იმ კუთხით შეხედავს ასეთ სიტუაციებს. ზოგისთვის ცუდი ვარ, მსოფლიოში ყველაზე "ბინძური" მოთამაშე. თუმცა ეს უკვე წარსულია, ჩავლილი ამბავია. კარიერაში, ერთადერთი რასაც ვნანობ, კავაი ლეონარდთან მომხდარი შემთხვევაა. ოღონდ არ შარშანდელი არამედ შარშანწინდელი - "დალასში" რომ ვთამაშობდი, წაქცეულმა ხელი დავუჭირე. ეს არის ერთადერთი რამ რასაც ჩემს კარიერაში ვნანობ. შეცდომებს ვუშვებთ მოედანზე, მის მიღმა. თუმცა უნდა კარგად გავიაზროთ, რატომ მოხდა ასე და გამოვასწოროთ.
კვლავ ESPN-ის ჟურნალისტი: ბევრი მისტერიაა ზაზას ირგვლივ... 2018 წლის პლეი ოფი დაიწყო, ახალი დრამაც იწყება...

713
მკითხველის კომენტარები / 0 /
მსგავსი ამბები
რუბრიკის სხვა სიახლეები