ზაზა ფაჩულია: 17 წელი ნაკრებში... ამის მერე, როგორი ემოციით უნდა უყურო ტრიბუნიდან?! [VIDEO]

"დეტროიტსა" და დეტროიტელებზე ჩვენი გაზეთის წინა ნომერში ზაზა ფაჩულიასგან უკვე მოვისმინეთ. მასთან მხოლოდ ამერიკულ ამბებზე როდი ვისაუბრეთ, შევეხეთ საქართველოს ნაკრებს, თბილისის "დინამოს", საკალათბურთო აკადემიას...

ნაკრები
ზაზა ფაჩულიას სანაკრებო დებიუტი 2000 წელს ლუქსემბურგთან მატჩში შედგა. 2017 წელს, ევრობასკეტზე, იტალიასთან მატჩის შემდეგ მან სანაკრებო კარიერის დასრულების შესახებ გამოაცხადა. 2018 წლის ივნის-ივლისის მატჩებს, ავსტრიასთან და სერბეთთან იგი ტრიბუნებიდან ადევნებდა თვალს.

- ძალიან რთული იყო ნაკრების მატჩების გვერდიდან ყურება. თან ისეთ ადგილას ვიჯექი, მოედანზე მიმდინარე მოვლენები ჩემთან ძალიან ახლოს ვითარდებოდა. ვიცოდი, რომ მუდმივი არაფერია, ადრე თუ გვიან ნაკრებში აღარ ვითამაშებდი, თუმცა თამაშის დღე რომ მოვიდა, ფსიქოლოგიურად მაინც გამიჭირდა მაყურებლის როლში ყოფნა. ალბათ, იმიტომ, რომ ნაკრებში 17 წლის განმავლობაში ვთამაშობდი, ძალიან ბევრი ენერგია და დრო დავხარჯე...

სიტყვა "დახარჯვაზე" ზაზა შეჩერდა და უფრო დეტალურად განმარტა:

- ეს, არ იყო უქმად ხარჯვა, ეს იყო საკუთარი ენერგიის სამშობლოსთვის გაღება, რისი ბედნიერებაც ყველას არა აქვს. 2018 წლის ზაფხული განსხვავებული იყო, ნაკრებში რომ არ ვთამაშობდი, ახლა მივხვდი, რამდენი დრო მიდიოდა სანაკრებო შეკრებებზე, მგზავრობაზე, მაგრამ ნამდვილად არ ვნანობ. დამიჯერეთ, უკან რომ დავბრუნდე, კვლავ იმავე გზას ავირჩევდი. თუმცა ყველაფერს აქვს დასაწყისი და დასასრული, კალათბურთს მთელი ცხოვრება ვერ ითამაშებ...

მომავალი

მას შემდეგ, რაც ზაზამ ნაკრებში ბოლო მატჩი გამართა, ეროვნულმა გუნდმა მსოფლიოს ჩემპიონატის პირველი საკვალიფიკაციო მოილია და მეორეს თამაშობს. ერთ წელიწადში 8 შეხვედრა ჩაატარა.

- სერბეთთან და ავსტრიასთან მატჩებს ფარსუკნიდან მივადევნე თვალი, სექტემბერში თბილისში არ ვიყავი, თუმცა საბერძნეთთან თამაში ტელევიზიით ვნახე. მაგარი თამაში გამოვიდა, საინტერესო იყო და გულშემატკივრისთვისაც ძალიან ემოციური გამოდგა. მართალია, შედეგი ჩვენთვის მისაღები არ იყო, თუმცა ქომაგმა მაღალი დონის კალათბურთი იხილა და სწორედ ასეთ მატჩებში უნდა გაიზარდოს გუნდი. რომ მოგვეგო, ძალიან კარგი იქნებოდა, მაგრამ ისიც უნდა გავითვალისწინოთ, რომ გუნდი ერთ დღეში არ შენდება.

საინტერესოა, როგორ უყურებს ზაზა ნაკრების მომავალს.

- როდესაც ნაკრებში ვთამაშობდი, არაერთხელ მითქვამს გულისტკივილით - არ მინდა, ჩვენი ნაკრებიდან წასვლის შემდეგ ის, რასაც მივაღწიეთ, წყალში ჩაიყაროს და ყველაფერის ახლიდან დაწყება დაგვჭირდეს-მეთქი. დღეს მომავალს იმედის თვალით ვუყურებ. ნაკრებშიც არიან იმედისმომცემი მოთამაშეები და ღირსეული შემცვლელებიც გვეზრდება. ამ საქმეში დიდი წვლილი უნდა შეიტანონ საკალათბურთო აკადემიებმა, რომლებშიც მოზარდებს ყველა პირობა აქვთ მაღალ დონეზე ვარჯიშისთვის.



აკადემია

ზაზა ფაჩულიას საკუთარი სახელობის აკადემია აქვს, რომლის სახელით მოასპარეზე ბავშვები ხშირად ხვდებიან საქართველოს სხვადასხვა ასაკის ნაკრებში.

- ეს სასიამოვნოცაა და საამაყოც. ნაკრების მაისურის მორგება და ქვეყნის ღირსების დაცვა განსაკუთრებული გრძნობაა, ჩვენს პატარა კალათბურთელებს ეძლევათ შანსი, გაახარონ საკუთარი გულშემატკივრები, საკუთარი ქვეყანა. ჩვენთან, აკადემიაში ამ საკითხზე ბავშვებს ბევრს ველაპარაკებით, თუმცა ყველას საკუთარი არჩევანი აქვს, ვერავის ვერაფერს დავაძალებთ. მწვრთნელებს ბავშვები ნაკრების თამაშებზე დაჰყავთ, ერთად ქომაგობენ, ცდილობენ დაანახონ სწორი გზა...

ზაზას პატარაობაში სხვა სიტუაცია იყო, ბავშვებს გაყინულ დარბაზში უწევდათ ვარჯიში.

- თანამედროვე პატარებისა თეთრი შურით მშურს. მათ ყველა პირობა აქვთ შესაძლებლობების მაქსიმალურად გამოსავლენად. ასეც უნდა იყოს, მოზარდს უნდა ჰქონდეს მაგალითი, მოტივაცია, მონდომება და ჟინი, რომ გახდეს დიდი კალათბურთელი. საამისოდ თუ მოთმინებაც აღმოაჩნდება, ნამდვილად შეძლებს ოცნების ახდენას. თუ არ დაიზარებს, 5-10 წელიწადში თავად დაინახავს საკუთარი შრომის შედეგს.



დინამო

ოქტომბერში ზაზა ფაჩულიამ "დინამო" იყიდა და საკუთარი მოსაზრება სოცქსელში გამოაქვეყნა:

"მოგეხსენებათ, საკალათბურთო კლუბი თბილისის "დინამო" ერთ-ერთი ყველაზე ისტორიული და ტიტულოვანია საქართველოში. მე ვითავისებ ამ დიდ პასუხისმგებლობას, რომ არა ზაზა ფაჩულიას აკადემიის წარმატებული საქმიანობა და ახალგაზრდა თაობის თვალშისაცემი წინსვლა, ვერ შევეჭიდებოდი ახალ მნიშვნელოვან გამოწვევას. უამრავი ნიჭიერი ბავშვის აღმოჩენამ განაპირობა უფრო დიდი ინტერესი და მოტივაცია მომცა უფრო მეტი გავუკეთო თითოეულ მათგანს.

ასევე, მეძლევა საშუალება საკლუბო სპორტი გავხადო უფრო პოპულარული. ეს, რა თქმა უნდა, არ იქნება მარტივი და სწრაფი პროცესი, თუმცა ჩემი მხრიდან ყველაფერს ვეცდები, რომ "დინამომ" თავის სათქმელი თქვას დიდ ასპარეზზე."

"დინამოს" ზაზას მეგობარი შიო ხეცურიანი უხელმძღვანელებს.

- გვაქვს რამდენიმეწლიანი გეგმა, რომლის განხორციელებას თავიდანვე შევუდექით. არ ვამბობ, აქამდე სწორი იყო მიდგომა თუ არასწორი, უბრალოდ, ჩვენი ხედვა გვაქვს და ბავშვთა სკოლაში გარკვეული ცვლილებები განვახორციელეთ. აქამდე გუნდების უმეტესობაში თითო მწვრთნელი იყო, ახლა ორ-ორი იქნება, ასევე გუნდები კიდევ გავყავით, რომ ბავშვების რაოდენობა შემცირებულიყო, ხარისხი გაზრდილიყო და მეტი სარგებელი მიიღოს თითოეულმა კალათბურთელმა.

"დინამოს" ბავშვთა აკადემია აქამდეც ერთ-ერთი გამორჩეული იყო...

- განვმეორდები: არ ვამბობ, აქამდე ცუდი იყო, ან კარგი-მეთქი, უბრალოდ, მჯერა ჩვენი ხედვების. ჩვენი მთავარი ამოცანაა ბავშვებს ჰქონდეთ კალათბურთის სიყვარული, ჯანსაღად ცხოვრობდნენ, ჯანსაღად აზროვნებდნენ და საკუთარი შესაძლებლობები სრულად გამოავლინონ.

სუპერლიგა

თავიდანვე ითქვა, რომ სუპერლიგის წარმომადგენელ "დინამოში" ამ ეტაპზე ცვლილებები არ იგეგმება...

- "დინამოდან", ურთიერთშეთანხმების საფუძველზე, მხოლოდ ერთი კალათბურთელი წავიდა. სხვა ცვლილებები არ განხორციელებულა. არც მიზნები შეცვლილა, გუნდს მაღალ მიზნებს ვუსახავთ და იმედი გვაქვს, რომ სუპერლიგაში წარმატაბული იქნება. თუმცა "დინამოს" უმთავრესად, როგორც ტალანტების აღზრდის ადგილს, ისე ვუყურებთ.

ზაზას "რეალისა" და "ბარსელონას" მაგალითი მოჰყავს:

- მადრიდის "რეალში" ყოველთვის დიდი თანხები იხარჯება ტრანსფერებზე, გუნდი ვარსკვლავებით ივსება. საქართველოში, ამის ფუფუნება არავის აქვს, ჩვენთვის გაცილებით მისაღებია "ბარსელონას" მაგალითი - პატარაობიდანვე არჩევენ, თავად ზრდიან ნიჭიერ ფეხბურთელებს და შედეგსაც მათით აღწევენ. ასეა "გოლდენ სტეიტშიც" - კლეი ტომპსონი, სტეფ კარი, დრეიმონდ გრინი გუნდის არჩეული კალათბურთელებია, ძირითად ბირთვს კი ყოველწლიურად თითო-ოროლა ვარსკვლავს ამატებენ...

ზაზას აკადემიის გუნდი წლეულს "ა" ლიგაში იასპარეზებს...

- გვყავს სხვადასხვა ასაკის ძალიან კარგი ბავშვები. მათ უნდა ჰქონდეთ მიზანი, რომ თავის გამოჩენის შემთხვევაში "ა" ლიგის გუნდში, ან ისტორიულ გუნდში, "დინამოში" ითამაშებენ. ეს გუნდები მათ პროფესიულ ზრდაში, კარიერის აწყობაში დაეხმარებიან, შემდეგ კი ევროპისა თუ ამერიკის კლუბებში განაგრძობენ კარიერას და რაც მთავარია - საქართველოს ნაკრებს გამოადგებიან.

ყოველდღიური სპორტული გაზეთი "ლელო"
1259
მკითხველის კომენტარები / 0 /
მსგავსი ამბები
რუბრიკის სხვა სიახლეები