ზაზა ჯანაშია: შეტევაში მარილი გვაკლია...

"ყაზახებმა როგორ უნდა გვაჯობონ, მათზე ბევრად ნიჭიერი ფეხბურთელები და გუნდი გვყავს"

ზაზა ჯანაშია ერთა ლიგაში საქართველოს ნაკრების წარმატებული სტარტით გახარებულია და ამას ლოგიკურად მიიჩნევს. "ჯვაროსნების" ყოფილი თავდამსხმელი და "ზუგდიდის" დღევანდელი პრეზიდენტი "ლელოს" განვლილ ორ მატჩსა და საქართველოს ნაკრებზე თავის მოსაზრებებს უზიარებს...

- საინტერესოა, როგორ შეაფასებთ საქართველოს ნაკრების მიერ ერთა ლიგის სტარტზე ნაჩვენებ თამაშს. შედეგი მშვენიერია, ხარისხზე რას იტყვით?

- ჩემთვის მთავარი შედეგია. როცა 2 მატჩში 6 ქულა გაქვს, ეს უკვე იმის ნიშანია, რომ გუნდი წარმატებით თამაშობს. კარგი თამაშის გარეშე ეს წარმოუდგენელი იქნებოდა. რა თქმა უნდა, თამაშის ხარისხი იდეალური არ არის. მაგრამ მე ასე ვიტყოდი - თამაში დამაიმედებელია. ბიჭებმა ორივე მატჩში კარგად ითამაშეს და ერთი ძალიან დამაიმედებელი მოთამაშეც გამოჩნდა - გიორგი ჩაკვეტაძე.

- ჩვენი მეტოქეებიდან უკეთესი შთაბეჭდილება რომელმა დატოვა?

- ჩემთვის ორი აზრი არ არის, რომ ლატვიამ. ძალიან კარგად ორგანიზებული გუნდია, დაცვაშიც მშვენივრად თამაშობს და, რაც მთავარია, მწვავე კონტრშეტევებიც ახასიათებს. ვფიქრობ, ეს გუნდი უფრო საშიშია, ვიდრე ყაზახეთი.

- ლატვიის ნაკრებთან მოგება ძალიან გაგვიჭირდა. თქვენი აზრით, რატომ?

- სწრაფი და მობილური გუნდია და როცა ასეთი გუნდი დაცვაში ჯდება, მისი დამარცხება იოლი არ არის. მატჩის ასეთი სცენარი ლოგიკურიც იყო. მაგრამ იმასაც ვიტყვი, რომ ჩვენს გუნდს გულშემატკივრის თანადგომა ძალიან დაეხმარა, თორემ ლატვიელები საკმაოდ სახიფათოდ თამაშობდნენ. ჩემი აზრით, რიგაში საპასუხო შეხვედრა ძალიან რთული იქნება და დიდი ნებისყოფა, მონდომება და სიფრთხილე დაგვჭირდება, ლატვიელთა წინააღმდეგობა რომ დავძლიოთ.

- უფრო კონკრეტულად, რა მოგეწონათ საქართველოს ნაკრებში და არ მოგეწონათ?

- მომეწონა ის, რომ გუნდი ორგანიზებული გახდა და მეტოქეზე ზეწოლას ახერხებს. ჯერ ბევრი რამაა გასაუმჯობესებელი, მაგრამ უპირველესად, მიმაჩნია, რომ შეტევაში მარილი გვაკლია.

- ნიკა კაჭარავას გულისხმობთ?

- არა, ზოგადად შეტევას. კაჭარავამ ბოლომდე იბრძოლა და მიმაჩნია, რომ მას შეუძლია გუნდისთვის უფრო სასარგებლო გახდეს. მეჩვენება, რომ შებოჭილია და ბოლომდე ვერ გაიხსნა. არადა, თავიდან პირველ სანაკრებო მატჩებში უფრო თავდაჯერებული ჩანდა. საერთოდ, საფეხბურთო გაგებით თავხედი თავდამსხმელია და ეს მომწონს. მაგრამ ნაკრებში ეს სითავხედე და თავდაჯერებულობა აკლია და არა - პოტენციალი. ამიტომაც მიმაჩნია, რომ მას ბევრად უკეთ შეუძლია თამაში. მას ერთი გოლი უნდა და დარწმუნებული ვარ, სულ სხვა კაჭარავას ვიხილავთ.

- საერთოდ, თავდასხმაში რთული მდგომარეობაა - ქვილითაია ტრავმირებულია, მჭედლიძე ჯერ ფორმაში არ არის, კაჭარავას სათამაშო პრაქტიკა აკლდა...

- იმედია, ეს პრობლემები მალე მოგვარდება - მჭედლიძეც აღიდგენს ფორმას და ქვილითაიაც მალე დაბრუნდება. ეს ბიჭები ჩვენი ნაკრებისთვის დიდ ძალას წარმოადგენენ.

- ნახევარდაცვაზე რას იტყვით?

- მსგავსი რამ ნაკრებში არ მახსენდება - ყველა მათგანი ბოლომდე დაიხარჯა და ძალიან კარგად ითამაშა. სწორედ მათმა კარგმა თამაშმაც განაპირობა, ერთა ლიგაში ორივე მატჩი რომ მოვიგეთ.

- გიორგი ჩაკვეტაძე ახსენეთ. ყველა გულშემატკივარი იმას ოცნებობს, რომ გიორგიმ ბევრი იშრომოს და სხვა ნიჭიერი ქართველივით ზრდა არ შეაჩეროს...

- მე ამის დიდი იმედი მაქვს. "დინამოს" აკადემიაში ვმუშაობდი და გიორგის სწორედ იქიდან ვიცნობ კარგად. ის ნამდვილი პროფესიონალია, ვარჯიში უყვარს და საქმისადმი სერიოზული მიდგომა ახასიათებს. მჯერა, გზიდან არ გადაუხვევს და დიდ ფეხბურთს ითამაშებს. ერთა ლიგაში გამოჩნდა, რომ საქართველოში ნიჭიერი ბიჭები გვეზრდებიან. ჩაკვეტაძე ამის მაგალითია. ეგაა, ახალგაზრდებს მეტი ნდობა და შანსი სჭირდებათ, თორემ სათადარიგო სკამზე გაზრდილი მოთამაშე არ მახსენდება. გიორგის "დინამოში" კახა კაჭარავა ენდო და უცებ გაიზარდა, უცებ დაკვალიანდა და დღეს ძალიან დამაიმედებელი ფეხბურთელი გვეზრდება.

- უახლოეს თაობაში მსგავს ტალანტებს თუ ხედავთ?

- ნამდვილად ვხედავ. მაგალითად, ხვიჩა კვარაცხელიას, რომელსაც დიდი ფეხბურთის თამაში შეუძლია. მიხარია, რომ მას "რუსთავში" ათამაშებენ და ტურიდან ტურამდე უფრო თავდაჯერებულია. ოთხი წელიწადია, რაც საქართველოში დავბრუნდი და თუნდაც მხოლოდ ზუგდიდში ბევრი ნიჭიერი ბავშვი შევნიშნე. უბრალოდ, მათ ნდობა და საკუთარი ძალების რწმენა აკლიათ. ამ კუთხით უნდა ვიმუშაოთ და დავეხმაროთ.

- ისევ ერთა ლიგას დავუბრუნდეთ. ყაზახეთის ნაკრებზე რას იტყვით?

- ვუყურებდი და ვერ ვხვდებოდი, საქართველოს ნაკრებს როგორ უნდა მოუგოს?

- მათ წელს უნგრეთს მოუგეს გასვლაზე...

- ეს ამხანაგური შეხვედრა იყო. მაგრამ ლოგიკით, მათ ჩვენთან მოგების შანსი არ აქვთ. ამბობენ, ყაზახები ფეხბურთში დიდ ფულს დებენო. მაგრამ ძლიერი კლუბები რომ ჰყავთ, არაფერს ნიშნავს. კლუბებში ლეგიონერებს იმატებენ.

ორიოდე ლეგიონერი ეროვნულ ნაკრებში კი ჰყავთ, მაგრამ იმავეს მასობრივად ვერ ახერხებენ. ნაკრები ადგილობრივებით კომპლექტდება, ამაში კი ფული ვერ უშველით - საქართველოში ბევრად ნიჭიერი მოთამაშეები იბადებოდნენ და იბადებიან. ნიჭს კი ვერ იყიდი. ამიტომ, არც უნდა ვიფიქროთ იმაზე, რომ ყაზახებს ვერ ვაჯობებთ. ჩვენ გვყავს ვარსკვლავები, მათზე ბევრად ნიჭიერი ფეხბურთელები და გუნდი. ამიტომ, ერთა ლიგაში ჩვენი ნაკრების გამარჯვებაში დარწმუნებული ვარ.

ყოველდღიური სპორტული გაზეთი "ლელო"
2600
მკითხველის კომენტარები / 2 /
პურისმჭამელი
1
მართალია ზაზა, შეტევაში მარილი აკლია ნაკრებს და ეს მარილი ლადო დვალიშვილია!
სოსო
1
ნაკრებს მარილი კი არ აკლია,ვაისის ხელში ხანდახან ამლაშებს კიდეც,ნაკრებს შენისთანა ჯანიანი,სწრაფი და კარზე დაგეშილი თავდამსხმელი აკლია.კაჭარავაზე კი ვეთანხმები,იგი გაცილებით იმაზე მეტად გააკრიტიკეს,ვიდრე იმსახურებდა.იგი ამ თამაშისათვის არ იყო 100%0-ით მზად,მაგრამ მჭედლიძე მთლად უთამაშებელი იყო და ქვილითაიაც დაიმტვრა.ბიჭმა თავი არ დაზოგა და ამდენი საყვედური არა სწორი მგონია.
მსგავსი ამბები
რუბრიკის სხვა სიახლეები
;