ზამთრის სატრანსფერო პერიოდი ახლოვდება, ვინ საით?

ახლოვდება ზამთრის სატრანსფერო პერიოდი. საქართველოს ნაკრების რამდენიმე ფეხბურთელმა შეიძლება კლუბი შეიცვალოს.

მოდით, სათამაშო რგოლების მიხედვით მიმოვიხილოთ ჩვენი ქვეყნის პირველი გუნდის ფეხბურთელთა მდგომარეობა, რომელთაც მარტიდან ევროპის ჩემპიონატის შესარჩევ ციკლში მოუწევთ ჩაბმა და მათი სათამაშო კონდიციები აქტუალური იქნება...

გიორგი ლორია
ამ დროისთვის საქართველოს ნაკრების ნომერ პირველი მეკარე უკლუბოდაა. რა თქმა უნდა, ქვეყნის უმთავრესი გუნდის ინტერესებშია, რომ მან, რაც შეიძლება, მალე იპოვოს ახალი კლუბი, სადაც სისტემატური სათამაშო პრაქტიკა ექნება. მეკარის ტრანსფერი დღეს გვარიანად ჭირს, მაგრამ ლორიას აქვს იმის გამოცდილება და კლასი, რომ სასურველი გუნდი მოძებნოს.

გიორგი მაკარიძე
რამდენიმე დღის წინ გიორგიმ თავად უთხრა "ლელოს", რომ დიდი ალბათობით ზაფხულამდე დარჩება "რიუ ავეში", მაგრამ გამორიცხული არც ის არის, სხვა გუნდს მიაშუროს. რაც მთავარია, გიორგიმ ტრავმა მოიშუშა და ვარჯიშიც დაიწყო.

ვაკო ყაზაიშვილი
საინტერესოა, დარჩება თუ არა ვაკო ამერიკულ "სან ხოსეში". თუ ის ჩათვლის, რომ ევროპაში დაბრუნების დროა, "ბებერ კონტინენტზე" სასურველი კლუბის მოძებნა ნამდვილად არ უნდა გაუჭირდეს. ალბათ, მისი კარიერისთვის ეს უკეთესიც იქნება.

ჯანო ანანიძე
შესაძლოა, "როსტოვში" დაბრუნდეს. ერთხელ ის უკვე თამაშობდა ამ გუნდში და კარგი სეზონიც გამოუვიდა. სიმართლე ითქვას, ჯანო ამ კლუბისთვის არ გვემეტება. ალბათ უკეთესი იქნებოდა ძალების მოსინჯვა ევროპაში, მაგრამ რას ვიზამთ...

გიორგი ხარაიშვილი
შვედური "გიოტებორგის" ლიდერად ძალიან მოკლე ხანში ჩამოყალიბდა. კლუბს მისი გამოსყიდვა სურს და სხვა მსურველებიც ჰყავს. აგერ, ხარაიშვილის აღმზრდელი კლუბი, "საბურთალო" ჩემპიონთა ლიგის საკვალიფიკაციო ეტაპზე გავიდა და ვნახოთ, ეგებ მასაც დაეხმაროს. ყოველ შემთხვევაში, ხარაიშვილი კონტრაქტით სწორედ თბილისელთა კუთვნილებაა.

გიორგი ჩაკვეტაძე
საქართველოს ნაკრების მთავარი იმედის ტრანსფერზე ბოლო დროს ლამის ტომები იწერება ევროპულ მედიაში. არ დარჩენილა პრაქტიკულად არც ერთი გრანდი, რომლისთვისაც ჩაკვეტაძის გვარი არ დაეკავშირებინოთ. მათ შორის, სახელდება ზამთარში ტრანსფერის ალბათობაც...

ლევან მჭედლიძე
მორიგი ტრავმის შემდეგ ლევან მჭედლიძე მინდორს დაუბრუნდა. აქა-იქ ისევ იწერება "ემპოლიდან" მისი შესაძლო წასვლის თაობაზე. ვნახოთ, რა და როგორ იქნება. თუ მჭეედლიძე ჯანმრთელად იქნა, დღევანდელ საფეხბურთო ორომტრიალში არსად დაიკარგება.

ნიკა კაჭარავა
კვიპროსული "ანორთოსისი" არ არის ის გუნდი, რომელიც შეეფერება საქართველოს ნაკრების შემტევ ნიკა კაჭარავას. გადაწყვეტილება ნებისმიერ შემთხვევაში თავად ფეხბურთელმა უნდა მიიღოს. მას უკვე აქვს უცხოეთში თამაშის საკმარისი გამოცდილება და იმედია, ისეთ კლუბს შეარჩევს, სადაც მუდმივი სათამაშო პრაქტიკა ექნება.

ყოველდღიური სპორტული გაზეთი "ლელო"
1662
მკითხველის კომენტარები / 1 /
Bros.
0
Kargo ras botaobt made uazrobebs cert.
მსგავსი ამბები
რუბრიკის სხვა სიახლეები
;