ზაურ სვანაძე: მათი ბიუჯეტების მესამედი მაინც რომ მოგვცა...

ზაურ სვანაძე 28 ოქტომბრიდან ბაქოს "კეშლიას" (ადრე "ინტერი") მთავარი მწვრთნელი აღარ არის და გუნდი მისმა ასისტენტმა რამაზ სვანაძემაც დატოვა. აზერბაიჯანული კლუბის ოფიციალური ვებგვერდის ცნობით, კლუბის ხელმძღვანელებმა ქართველ სპეციალისტთან შეხვედრის შემდეგ ხელშეკრულება ორმხრივად გაწყვიტეს.

ზაურ სვანაძე ბაქოს გუნდში მთავარ მწვრთნელად 2015 წელს დაინიშნა, როცა პოსტი კახა ცხადაძემ დატოვა და საქართველოს ნაკრები ჩაიბარა. მისი ხელმძღვანელობით ბაქოელები ევროპალიგაზე ორჯერ მოხვდნენ.

თუმცა, წლევანდელი სეზონი წარუმატებელი გამოდგა. კლუბს ფინანსური პრობლემები შეექმნა და ეს შედეგებზეც აისახა. ბოლო ტურში "კეშლიამ" საშინაო შეხვედრა "ქიაფაზთან" 0:2 დათმო, 8-გუნდიან ჩემპიონატში მე-7 ადგილზეა და კლუბის ხელმძღვანელობა შედეგებით უკმაყოფილო დარჩა.

ზაურ სვანაძე "ლელოს" აზერბაიჯანიდიან წამოსვლის მიზეზებზე ელაპარაკა:

- ერთი კვირაა, რაც აზერბაიჯანული კლუბი დატოვეთ. "ინტერი" ბოლო წლებში სულ ლიდერებს შორის იყო და წლეულს რა დაგემართათ?
- ყველაფრის თავიდათავი ფინანსური პრობლემები გახდა, რომელსაც ვერაფრით მოვერიეთ. ხელფასების 2-3 თვით დაგვიანებამ მოთამაშეებზე უარყოფითად იმოქმედა და ვგრძნობდი, რომ ისინი მოედანზე ძველებურად მონდომებულები აღარ იყვნენ. ფინანსური პრობლემების გამო საკადრო საკითხების მოგვარებაც ვერ მოვახერხეთ.

- კლუბს ტრანსფერების განხორციელების უფლება აღარ ჰქონდა...
- დიახ, ასე იყო ბოლო ერთი წელიწადი და ნორმალური შევსება ვერ მივიღეთ. ფაქტობრივად, მხოლოდ ადგილობრივების იმედად ვთამაშობდით, როდესაც აზერბაიჯანში შედეგის მისაღწევად ლეგიონერების დამატება აუცილებელია - ადგილობრივებით ეს შეუძლებელია. ჩვენ კი მხოლოდ ორი უცხოელი შემოგვრჩა, რომლებსაც გუნდთან კონტრაქტის ვადა ამოწურული არ ჰქონდათ. ისინიც ზურაბ ხიზანიშვილის დროიდან შემოგვრჩნენ. სხვები კი ვეღარ მოგვყავდა.

უცხოეთში წასული მწვრთნელი სწავლობს, მოკლე პერიოდში შედეგი როგორ უნდა აჩვენოს. მე კი შედეგი ურთულეს პირობებში უნდა მეჩვენებინა

- თქვენით უკმაყოფილება პირველად ევროპის ლიგიდან გამოვარდნის შემდეგ დაიწყო, როდესაც ლუქსემბურგის "ფოლასთან" წააგეთ. აზერბაიჯანული კლუბის მოღონიერების ფონზე ეს შედეგი წარმოუდგენელი ჩანდა.
- ეს ჩვენთვისაც მოულოდნელი იყო, რადგან პირველ ეტაპზე სერბული "მლადოსტი" გამოვაგდეთ, რომელიც, სხვათა შორის, მართლა კარგი გუნდი იყო. ლუქსემბურგელებთან შეხვედრამდე გამართულ ვარჯიშზე, ვერ დაიჯერებთ და, სულ 10 ფეხბურთელი გვყავდა. ასე გრძელდებოდა ლამის ორი კვირა და ცხადია, გუნდი ნორმალურად ვერ მოვამზადეთ. ამის მიუხედავად, პირველი მატჩი 1:0 მოვიგეთ. მაგრამ ვხედავდი, რომ ეს ის გუნდი აღარ იყო, რაც წინა სეზონში.

მოთამაშეებზე ფინანსურმა პრობლემებმა გავლენა მოახდინა - შეხვედრამდე იყო დაპირებები და რომ არ შეასრულეს, ჩვეული მონდომებითა და ჟინით ვეღარ თამაშობდნენ. მეორე შეხვედრა 1:4 წავაგეთ. არადა, ძალიან კარგად დავიწყეთ და არაერთი საგოლე მომენტი შევქმენით, მაგრამ ვერ გამოვიყენეთ, საკუთარ კარში კი გოლები ბავშვური შეცდომების გამო გავუშვით და გავვარდით. მაგრამ იმის თქმა, რომ "ფოლა" არაფრად ვარგოდა, სასაცილოა - ამ გუნდში რომ ხელფასებია, ჩვენი ჩემპიონატის ნებისმიერი კლუბი ინატრებდა: ფეხბურთელები 5-დან 10 ათასამდე დოლარს იღებენ. თუმცა, თავის მართლებას არ ვაპირებ - ეს ბარიერი უნდა გაგვევლო.

- "ინტერის" სახელის "კეშლიათი" შეცვლა რამ გამოიწვია?
- სულ მეორე ტური იყო, რაც ამ სახელით ვთამაშობდით. ჩვენი კლუბის ბულგარელი პრეზიდენტი დააკავეს და პრობლემები მერე დაიწყო. საერთაშორისო ბანკმა "ინტერის" დაფინანსებაზე უარი თქვა და სახელიც ამიტომ შეგვიცვალეს.

- აბა, კლუბს ვინ აფინანსებს?
- აზერბაიჯანის ფეხბურთის ასოციაცია.

- ასოციაცია? ასეთი რამ კიდევ სადმე ხდება?
- სხვაგან არ ვიცი და აზერბაიჯანში ბევრი ისეთი კლუბია, რომელსაც ასოციაცია აფინანსებს. თუმცა, ევროპის ლიგაზე გამოსვლით, "ინტერის" ბიუჯეტი 1,1 მილიონი ევროთი შევავსეთ. 2015 წელს ევროპის ლიგიდან 750 ათას ევრომდე მივიღეთ, ხოლო წლეულს 400 ათასამდე. ხომ გითხარით, გუნდს ფინანსურად უჭირდა და ალბათ, ბოლოს ხელფასებს ამ ფულიდან გვიხდიდნენ.

ჯერ დასვენება მინდა. მეუღლის გარდაცვალებიდან 40-იც არ გასულა. ეს ჩემთვის დიდი დარტყმა იყო...

- აზერბაიჯანში გატარებული წლები დიდ გამოცდილებას შეგძენდათ...
- ამაზე ორი აზრი არაა. უცხოეთში წასული მწვრთნელი სწავლობს, მოკლე პერიოდში შედეგი როგორ უნდა აჩვენოს. მე კი შედეგი ურთულეს პირობებში უნდა მეჩვენებინა.

- რომელიმე ქართული კლუბისგან მიწვევა ხომ არ გქონიათ?
- ჯერ დასვენება მინდა. მეუღლის გარდაცვალებიდან 40-იც არ გასულა. ეს ჩემთვის დიდი დარტყმა იყო...

- ბოლო წლებში ევროთასებზე აზერბაიჯანელები ქართულ გუნდებთან უპრობლემოდ იგებენ. მათი წერილებიდან და ტონიდან ჩანს, რომ ქართულ გუნდებს ლამის მეტოქეებადაც აღარ თვლიან...
- მათ ძლიერი გუნდები ჰყავთ, მაგრამ ვერ ვიტყვი, რომ აზერბაიჯანული ფეხბურთი შესაძლებლობებით ჩვენზე მაღლა დგას. ისინი ფინანსებით გვჯობიან და ხომ ხედავთ, ჩემპიონთა ლიგაში გუნდი ჰყავთ. მაგრამ რეალურად, ევროგათამაშებაში ვის ხარჯზე იგებენ? ლეგიონერების. ისინი მართლაც მაღალი კლასის ფეხბურთელები არიან. ასე მოღონიერდნენ "ყარაბაღი" და "გაბალა". მაგრამ აზერბაიჯანელებს ჩვენნაირი ნიჭიერი ბავშვები არ ჰყავთ და არც ჩვენზე მეტი რესურსი აქვთ. სხვათა შორის, რეალურად, ფინანსურად და კლასით ძლიერი მხოლოდ ეს ორი გუნდია, მაგრამ ფეხბურთი რომ განავითარეს, ამაზე ორი აზრი არ არის.

- ჩვენ აზერბაიჯანელებს ფინანსურად ვერ შევეჯიბრებით...
- ...მაგრამ დარწმუნებული ვარ, აზერბაიჯანული კლუბების ბიუჯეტების ნახევრით, მესამედითაც კი, ბევრად უკეთესი ჩემპიონატი და გუნდები გვეყოლება. იმიტომ, რომ საქართველოში ბევრად ნიჭიერი თაობები იზრდებიან. ეგაა, რომ მათი აღზრდა და სწორ გზაზე დაყენება გვიჭირს.

ყოველდღიური სპორტული გაზეთი "ლელო"
1431
მკითხველის კომენტარები / 0 /
მსგავსი ამბები
რუბრიკის სხვა სიახლეები
;