ზაფხულის სატრანსფერო ფანჯარა გახსნილია - ვინ საით?

ზაფხულის სატრანსფერო ფანჯარა გახსნილია. საქართველოს ნაკრების რამდენიმე ფეხბურთელმა უკვე იპოვა ახალი კლუბი, ზოგიც მოლოდინშია.

დღევანდელი ჩვენი წერილი სწორედ ამ საინტერესო თემას ეხება.

მაშ ასე, ვინ დაბინავდა და ვინ უნდა დაბინავდეს - ერთად ვცადოთ სატრანსფერო ორომტრიალში გარკვევა. ვფიქრობთ, ჩვენი ნაკრების წევრებისა და კანდიდატების ახალი კლუბებისთვის თვალის შევლება საინტერესო უნდა იყოს...

გიორგი მაკარიძე

საქართველოს ნაკრების მეკარე "რიუ ავეში" დარჩა. გიორგი მაკარიძე მზად იყო ახალ კლუბში გადასასვლელად, მაგრამ ზუსტად ამ დროს გუნდი ვეტერანმა ბრაზილიელმა მეკარემ დატოვა და კარიერის გაგრძელება საუდის არაბეთში გადაწყვიტა. მაკარიძეს თამაში უნდა და სჭირდება. თითქმის ასპროცენტიანი ალბათობით შეიძლება ითქვას, რომ მომავალ სეზონში ის ამ სათამაშო პრაქტიკას აუცილებლად მიიღებს.

ზაურ მახარაძე

"ოლიმპიკიდან" უფრო ძლიერ ლუგანსკის "ზორიაში" გადავიდა, სადაც პირველი მეკარე უნდა იყოს, მით უმეტეს, მას შემდეგ, რაც "ზორიამ" მართლაც რომ სუპერტრანსფერი განახორციელა და "რეალში" გაყიდა მეკარე ანტონ ლუნინი. ისღა დაგვრჩენია, ზაურ მახარაძესაც მისი გზის გავლა ვუსურვოთ.

გურამ კაშია

"სან ხოსეში" გადასვლა გურამ კაშიას კარიერისთვის უკან გადადგმულ ნაბიჯად არ შეიძლება შეფასდეს. ვერავინ იტყვის ხელაღებით, რომ მთავარი ამერიკული ლიგა (MLშ) ჰოლანდიის ერედივიზიონს რაიმეთი ჩამორჩება. გარდა ამისა, გურამმა უკვე ამოწურა საკუთარი თავი "ვიტესში" და მისთვის საინტერესო უნდა იყოს ახალ გამოწვევასთან შეჭიდება. არის ის მომენტიც, რომ ამერიკაში გაცილებით კარგად იხდიან, ვიდრე ჰოლანდიაში.

გიორგი ნავალოვსკი

საქართველოს ნაკრების მარხენა მცველი ახალი კლუბის ძიებაშია, რაკი მისი ყოფილი გუნდი, "სკა ხაბაროვსკი", რუსული პრემიერლიგიდან გავარდა. რა თქმა უნდა, გიორგი ნავალოვსკი საზღვარგარეთ იმედოვნებს კარიერის გაგრძელებას, მაგრამ, მეორე მხრივ, მისი დამატება პირდაპირ მისწრება უნდა იყოს ნებისმიერი ქართული კლუბისთვის. ნავალოვსკი ერთხელ უკვე დაბრუნდა საქართველოში და მაშინ ის ერთ-ერთი საუკეთესო იყო გორის "დილას" შემადგენლობაში.

საბა კვირკველია

საქმეს ისეთი პირი უჩანს, რომ საბა კვირკველია მომავალ სეზონს მოსკოვის "ლოკომოტივში" გაატარებს და ჩემპიონთა ლიგაში ითამაშებს. ბოლო დროს მის გარშემო შექმნილი სატრანსფერო ორომტრიალიდან მხოლოდ ის გავიგეთ, რომ "ლოკომოტივის" მწვრთნელ იური სიომინსა და კლუბის ხელმძღვანელობას ძალიან არ უნდათ მისი გაყიდვა. იმედია, რუსეთი მაინც არ იქნება პირველი და ბოლო გაჩერება ამ მართლაც ნიჭიერი ფეხბურთელის კარიერაში.

გიორგი აბურჯანია

ფაქტია, გიორგი აბურჯანია, დიდი ალბათობით, დატოვებს "სევილიას" მეორე გუნდს. გაკვრით დაიწერა - შესაძლოა, აბურჯანია "ჟიმნასტიკში" დაბრუნდესო და ვნახოთ, რა და როგორ იქნება. "სევილიაში" ჩვენებურს არ ეძლევა მთავარ გუნდში დამკვიდრების შანსი და რადგან ასეა, გაცლა უკეთესი იქნება.

ოთარ კიტეიშვილი

ისე ჩანს, საქართველოს ერთ-ერთი ყველაზე იმედისმომცემი ფეხბურთელი გადამწყვეტი ნახტომისთვის ემზადება. ოთარ კიტეიშვილი "დინამოსთან" ერთად ითამაშებს ევროთასებზე და ამის შემდეგ, ალბათ, წავა. მას ვერ გავამტყუნებთ: უკვე დროა, უფრო მაღალ დონეზე მოსინჯოს ძალა. რაც მთავარია, კიტეიშვილი არსად გაქცეულა დროზე ადრე და "დინამოდან" ვალმოხდილიც წავა.

ლადო დვალიშვილი

ებრაული "აშქელონი" დატოვა. ჯერ ერთი, ლადო დვალიშვილი ცოტას თამაშობდა იქ და მეორეც - გუნდი ისრაელის ჩემპიონატის უმაღლესი ლიგიდან გავარდა. დვალიშვილი ნებისმიერი ქართული კლუბისთვის სასარგებლო შენაძენი უნდა იყოს, მით უმეტეს ისეთისთვის, ევროთასებზე ასპარეზობა რომ უწევს.

ნიკა კაჭარავა
ახალი სეზონიდან, ბექა მიქელთაძესთან ერთად, კვიპროსულ "ანორთოსისში" ითამაშებს. ცოდვა გამხელილი სჯობსო და, ამ სტრიქონების ავტორი ელოდა, რომ ნიკა კაჭარავა უფრო უკეთეს კლუბში გააგრძელებდა კარიერას, მაგრამ ჩვენი დასაწუნი არც კვიპროსის ჩემპიონატს სჭირს რამე.

ბაჩანა არაბული
დიდი ალბათობით, ისევ უნგრეთში გააგრძელებს კარიერას, ოღონდ, იმაზე უკეთეს გუნდში, ვიდრე მისი აწ უკვე ყოფილი კლუბი "ბალმაზივაროშია". ბაჩანა არაბულმა იპოვა თავისი ნიშა უნგრულ საკლუბო ფეხბურთში და, ალბათ, მართალიც არის, ზედმეტ ექსპერიმენტებს რომ ერიდება.

გიორგი არაბიძე
წესით, მალე უნდა გაცხადდეს, სად გააგრძელებს კარიერას გიორგი არაბიძე. ფაქტია, გიორგისთვის სასარგებლო აღარ არის "შახტარის" დუბლებში თამაში, სადაც მან დასამტკიცებელი უკვე დაამტკიცა. იმედია, ის ისეთ გუნდს მოძებნის, სადაც პროგრესისა და საკუთარი შესაძლებლობების დამტკიცების შანსი ექნება.

ყოველდღიური სპორტული გაზეთი "ლელო"
756
მკითხველის კომენტარები / 0 /
მსგავსი ამბები
რუბრიკის სხვა სიახლეები