ზელანდიელებიც 'ბორჯღალოსნების' მხარეს! - მსოფლიო რაგბიმ ოკეანეთსაც შუათითი უჩვენაო

რაგბის საერთაშორისო ორგანიზაციამ ახალი ტურნირის შექმნა დააანონსა. ეს იქნება 12-გუნდიანი შეჯიბრება, რომელშიც ჩაებმებიან ექვსი ერის ქვეყნები: ავსტრალია, ზელანდია, არგენტინა, იაპონია, ფიჯი და სამხრეთი აფრიკა.

საქართველო? სამოა? ზელანდიურ გამოცემა „ნიუსჰაბში“ გამოქვეყნდა პუბლიკაცია, რომელშიც საქართველოს რაგბის კავშირის პრეზიდენტის გოჩა სვანიძის კომენტარია მოხმობილი:

„რაგბის ყველა მოყვარული არა მარტო საქართველოში, არამედ მსოფლიოს მასშტაბით შესძრა გასულ კვირაში გავრცელებულმა ინფორმაციამ. ეს პროექტი შეუძლებელია ვინმესთვის მისაღები იყოს, გარდა ცხვირაპრეხილი რეტროგრადი ჩინოვნიკებისა, რომლებიც საკუთარი ცხვირის იქით ვერაფერს ხედავენ. მსოფლიო რაგბის გარკვეული ჩინოვნიკების თავებში მომწიფებული ეს აზრი აბსოლუტურად მიუღებელია ყველასთვის.

ეს ყოვლად მიუღებელია. მინდა დაგამშვიდოთ. ამის შესახებ ჩვენ თავიდანვე ვიცოდით, ოფიციალური და არაოფიციალური წყაროებიდან, კულისებიდან. ჩვენ ცვლილებებს მივესალმებით, მაგრამ არა ასეთს, რომელმაც განვითარება შეიძლება ჩაკეტოს და სიბნელეში წავიდეს. პირველივე წუთიდან, რაც ეს გაცხადდა, ჩვენ გვაქვს მუდმივი კავშირი ჩვენს კოლეგებთან, სხვა ქვეყნების რაგბის კავშირების ხელმძღვანელებთან, მსოფლიოსა და ევროპის რაგბის წამყვან სპეციალისტებთან. დაახლოებით 7-10 დღის განმავლობაში ერთობლივ განცხადებას გავაკეთებთ. ამას, ვიმედოვნებ, შემოუერთდებიან რაგბის წამყვანი ქვეყნების პროგრესულად მოაზროვნე წარმომადგენლები“.

ეს სრულიად ადეკვატური რეაქციაა მსოფლიო რაგბის გადაწყვეტილებაზე. ზელანდიურ გამოცემაში ყურადღებაა გამახვილებული ოკეანეთის გუნდებზეც. პირდაპირ წერია - ამ ნაკრებებს შუათითი უჩვენესო.

იქვე ვკითხულობთ ახლზელანდიელთა მოსაზრებას ახალ შეჯიბრებასთან დაკავშირებით: იმ ტურნირში არ ვითამაშებთ, სადაც ტონგა და სამოა უგულებელყოფილნი არიანო.

როგორც ხედავთ, ახალი პროექტი თვითონ მონაწილეებისთვისაც არ არის მისაღები. მოვუსმინოთ ახალი ზელანდიის ნაკრების ყოფილ მწვრთნელ გრემ ჰენრის:
- ახალი ტურნირით სურთ დიდი ფულის შოვნა, მაგრამ აუცილებელია იმ ადამიანების აზრის გათვალისწინებაც, რომლებმაც უნდა ითამაშონ. ეს პროექტი მოკლავს მსოფლიოს თასს და დამარხავს მსოფლიო რაგბის.

ბოლოს ისევ საქართველოს რაგბის კავშირის პრეზიდენტის გოჩა სვანიძის კომენტარს გავეცნოთ:

„ჯერ კიდევ 2016 წელს მსოფლიო რაგბიმ იმსჯელა რაგბის განვითარების ერთ-ერთ ვერსიაზე და გარანტია მოგვცა, რომ 2020 წლიდან გვექნებოდა საშუალება პირველი ეშელონი გუნდებთან ყოველწლიურად 2 მატჩის ჩავატაროთ და ერთ-ერთი აუცილებლად საქართველოში გაიმართებოდა. ეს იმ მომენტისთვის ჩვენ კარგად არ მოგვეჩვენა, მეტს ვითხოვთ, მიგვაჩნია, რომ ინტეგრაციისთვის უფრო სწრაფი ტემპია საჭირო, მაგრამ რაც ეხლა გაცხადდა, იმასთან შედარებით საერთოდ სამოთხეა. ვიცით, რომ ძალიან ნერვიულობთ, ამაზე ვმუშაობთ, ჩვენ არა ვართ მსოფლიოს რაგბის რიგითი წევრი, ჩვენ გვაქვს ჩვენი ადგილი. ყველა აქედან გამომდინარე, გამოვიყენებთ ოფიციალურ და არაოფიციალურ კავშირს, ყველა საშუალებას, რათა რაგბი განვითარდეს და არა გაჩერდეს და სტაგნაცია განიცადოს. რაგბის ფასეულობების ხელყოფის უფლებას არავის არ მივცემთ“.

ყოველდღიური სპორტული გაზეთი "ლელო"
1107
მკითხველის კომენტარები / 0 /
მსგავსი ამბები
რუბრიკის სხვა სიახლეები
;