ზესტაფონის ბაზა ინტერის კემპისთვის ემზადება

ბოლო დროს რამდენიმე ინფრასტრუქტურული პროექტი მიმდინარეობს, რომელმაც ჩვენი ინტერესი მიიქცია.

რამდენიმე სტადიონზე მოედნის საფარს ფეხბურთის ფედერაცია აგებს. შესაძლოა, 6 ქალაქიდან პროექტის ინფრასტრუქტურული ნაწილი ყველგან არ განხორციელდეს - რუსთავში ჯერაც გაურკვევლობაა, ხოლო სამტრედიაში ფინანსები იყო მოსაძიებელი.

მოედნების გაუმჯობესებაზე არა სახელმწიფო, არამედ კერძო კლუბი ზრუნავს. ამ ყველაფერზე ჩვენი წერილიდან შეიტყობთ...

ზესტაფონის ბაზა განახლდა

ხარისხიანი სავარჯიშო საფარის დეფიციტის პირობებში, თბილისის ზღვაზე მდებარე "ზესტაფონის" ბაზაზე მოედნები გუნდებს შვებად მოევლინა.

რამდენიმე წელია, რაც ეს მოედნები ძალიან დაიტვირთა: საქართველოს ფეხბურთის ფედერაციასა და კლუბს შორის არსებობს ხელშეკრულება, რომლის საფუძველზეც, ეროვნული ნაკრები ოფიციალური და ამხანაგური მატჩებისთვის სწორედ "ზესტაფონის" ბაზაზე ემზადება.

გარდა ამისა, ბოლო წლებში ბაზაზე საწვრთნელი შეკრება არაერთმა ქართულმა, ირანულმა და აზერბაიჯანულმა გუნდმა გაიარა, ასევე ემზადებოდნენ საქართველოს U21, U19 და U17 ნაკრებები, ხოლო 2017 წლის ივნისში საქართველოში გამართული რაგბის ახალგაზრდული მსოფლიო თასის დროს - ირლანდია და ახალი ზელანდია.

ზესტაფონელთა საფეხბურთო კომპლექსში მომზადების სურვილს სხვადასხვა ქვეყნის მრავალი საკლუბო თუ სანაკრებო გუნდი ახლაც გამოთქვამს.

ცხადია, მოედანს მოვლა და განახლება სჭირდება და "ზესტაფონის" ცნობით, ახლა კლუბის თბილისურ ბაზაზე საფარის განახლება მიმდინარეობს. ეს გეგმური სამუშაოებია, რომელსაც კომპანია Lაწნს ოფ Gეორგია აწარმოებს. საინტერესოა, რომ ივნისში ამ მოედნებზე საზაფხულო "კემპს" ცნობილი იტალიური გრანდი, მილანის "ინტერი" გამართავს.

მოედნის განახლება-მოწესრიგება ზესტაფონურ ბაზასა და დავით აბაშიძის სახელობის სტადიონზეც მიმდინარეობს. არენის მწვანე საფარსა და კლუბის ბაზაზე არსებულ სამივე ბუნებრივსაფარიან მინდორზე ამ პერიოდისათვის აუცილებელი სამუშაოები ჩატარდა.

ბალახის საფარს ფოთშიც აგებენ

ფოთის "კოლხეთი 1913" "ფაზისის" სტადიონის რეაბილიტაციას 2010 წლიდან ელოდება. სავარაუდოდ, მშენებლობა აგვისტოში ეროვნული ლიგის თამაშების სამასპინძლოდ მზად იქნება.

ეს "ლელოსთან" ვახტანგ თოფურიამ განაცხადა, რომელიც "კოლხეთი 1913"-ის გულშემატკივართა მეკავშირეა, მაგრამ რეალურად კლუბში მეტი ფუნქცია გააჩნია - მათ შორის, სტადიონის მშენებლობას კურირებს.

"ბალახის საფარის დაგება გუშინ დაიწყო. როგორც ცნობილია, ეს და სანიაღვრე სისტემის მოწესრიგება ფეხბურთის ფედერაციის დაფინანსებით ხორციელდება. საფარის რულონები ფოთთან ახლოს მდებარე მეურნეობიდანაა.

შესაძლოა, ეს ბევრმა არ იცოდეს, მაგრამ აქ უმაღლესი ხარისხისაა. თუ არ მეშლება, მას ის კომპანია ამზადებს, რომელი საფარიც თბილისის ზღვაზე მდებარე ზესტაფონის ბაზასა და ზესტაფონის სტადიონზე დააგეს.

ისეთი მაღალი ტემპით მუშაობენ, სავარაუდოდ, ერთ კვირაში მოედნის დაგება დასრულდება. სარწყავი და სადრენაჟო სისტემა კი 6 წლის წინ გააკეთეს და კარგ მდგომარეობაში იყო", - ამბობს თოფურია.

მისი თქმით, არის იმედი, რომ "კოლხეთი" "ფაზისზე" მეორე წრეში დაბრუნდება: "პარალელურად, ტრიბუნის მშენებლობა მიმდინარეობს. მთავარია, მშენებლებმა ეს დროულად დაასრულონ.

თავიდან ყველაფერი კარგი ტემპით მიმდინარეობდა, მაგრამ ტექნიკური საკითხის მოგვარების გამო შეფერხდა. საქმე ეხებოდა გადახურვის კონსტრუქციის საძირკველს - ხარვეზი გამოსწორდა და დრო ამიტომ გაიწელა. რაც მთავარია, ტრიბუნები ამოყვანილია.

შემდეგი ეტაპია გადახურვა, ტრიბუნების საიზოლაციო ფენის დაგება და ინდივიდუალური სკამები დამონტაჟება. დასავლეთ ტრიბუნაზე 1700-მდე ადგილი იქნება. როცა ეს დასრულდება, ბალახის საფარი "შეხორცდება" და დიდი იმედი გვაქვს, რომ "კოლხეთი" ფოთში დაბრუნდება და მეორე წრის თამაშებს "ფაზისის" სტადიონზე აგვისტოში გამართავს".

თოფურია სტადიონის პროქტის პირველი ეტაპის პროექტის სხვა დეტალებზეც გველაპარაკა: "წესით, დასავლეთ ტრიბუნის მშენებლობა აგვისტოში უნდა დასრულდეს.

პროექტის მიხედვით, ტრიბუნები ოთხივე მხარეს უნდა აშენდეს და მთლიანად გადაიხუროს. ამჯერად, მხოლოდ დასავლეთ ტრიბუნის მშენებლობა სრულდება, მოეწყობა თანამედროვე გასახდელები და საშხაპეები, დელეგატების, მსაჯების, სამედიცინო და დოპინგკონტროლის ოთახები, VIP და მედიალოჟები, კომენტატორების ჯიხურები, საპრესკონფერენციო დარბაზი, ავტოსადგომი, სველი წერტილები".

"კოლხეთის" წარმომადგენლის თქმით, თუკი მშენებლობა დროულად არ დასრულდება, სხვა ვარიანტზე წინასწარ ფიქრობენ: "ნაკლებად სავარაუდო მგონია, რომ აგვისტოში ფოთში ვერ დავბრუნდეთ და "ფაზისის" გახსნა ოდნავ გადავადდეს.

თუმცა, თავის დასაზღვევად მაინც ვფიქრობთ, რომელ არენაზე ვითამაშებთ. შესაძლოა, ეს ფოთის სარაგბო სტადიონი, "პარკი-არენაზე" იყოს, სადაც ასევე მოედნის განახლება მიმდინარეობს".

დაბოლოს, თოფურიას თქმით, შესაძლოა, ხიზნობით გამწარებულ საფეხბურთო გუნდს სხვა პრობლემაც მოუგვარონ: "ფოთში ბევრი ცნობილი მოთამაშეა გაზრდილი - გვალია, ძარია, სამურკასოვი, ჩიტეიშვილი, ცინცაძე. მაგრამ არც ერთ მათგანს ჩამოსვლა არ სურს, რადგან გუნდს სავარჯიშო პირობები და ბაზა არ გააჩნია.

სავარჯიშო პირობები რომ არაა, ამის გამო ნიჭიერი ბავშვებიც აღარ ჩერდებიან და ზოგი ზუგდიდში გადადის და ზოგიც ახლახან მარტვილში გახსნილ "დინამოს" აკადემიაში მიიწვიეს.

არადა, აქ დიდი პოტენციალია. ფოთის მერად გოჩა კურდღელია აირჩიეს, რომელმაც "კოლხეთის" პრობლემები კარგად იცის და ბოლო წლებში პირველი მერია, რომელმაც თქვა, რომ გუნდს საწვრთნელი ბაზის აშენება სჭირდება, სადაც საფეხბურთო სკოლაც იქნება და ამ პროექტის განხორციელებით დაინტერესებულია.

დიდი იმედი მაქვს, რომ ეს ჩანაფიქრი განხორციელდება და ხანგრძლივი მოგზაურობის შემდეგ "კოლხეთს" საკუთარი სახლი ექნება".

ყოველდღიური სპორტული გაზეთი "ლელო"
1594
მკითხველის კომენტარები / 0 /
მსგავსი ამბები
რუბრიკის სხვა სიახლეები
;