ზვიად პატარიძეს ისევ ვერ ვიხილავთ

9 იანვარს, დიღომში, ოლიმპიური პარკის ტერიტორიაზე მდებარე ფრენბურთის დარბაზი საქართველოს მორიგ ჩემპიონატს უმასპინძლებს ჭიდაობაში. ამჯერად - ბერძნულ-რომაულში, რომელიც ახალი წესების და ორდღიანი საშეჯიბრო ფორმატის გამო, ასევე სამ დღეს გაგრძელდება. შეგახსენებთ, რომ პირველ დღეს იმართება წინასწარი შეხვედრები, მეორე დღეს კი - დამამშვიდებელი ეტაპის პაექრობები და ფინალური ბლოკი.

წინასწარი მონაცემებით, მწვრთნელები ჩემპიონატისგან არც ერთ ლიდერს არ ათავისუფლებენ, რადგან ეს შეჯიბრება მთავარი შესარჩევი ტურნირია ევროპის ჩემპიონატისთვის. ოღონდ აქ გამარჯვებაც ავტომატურად არ ნიშნავს საევროპო ნაკრებში ადგილის დაბევებას - საამისოდ ჩემპიონებმა შესარჩევ შეჯიბრებებში ისევ უნდა გამოიჩინონ თავი.

ეროვნული ნაკრების ლიდერთაგან ერთადერთი გამონაკლისი მინდია წულუკიძე (77), თუმცა კიდევ უფრო დიდი დანაკლისია ახალგაზრდებში ყველაფრის მომგები ზვიად პატარიძის არყოფნა მძიმე წონაში. წულუკიძეს ორიოდ კვირის წინ ნეკნი უტკენია, ხოლო პატარიძესაც თურმე ასევე ტრავმა აწუხებს. არადა, მწვრთნელთა დიდი სურვილი იყო, რომ მასაც ეჭიდავა და მართლაც ძალიან საინტერესო იქნებოდა მისი ჩართვა ამ წონის კონკურენციაში, რასაც ამდენი წელიწადია, ველოდებით ყველანი, მაგრამ ამაოდ.

მწვრთნელთა მიდგომა ძალიან მკაცრია და ხისტი - შიდა პირველობა უნდა იჭიდაოს ყველამ, ვისაც ნაკრებში მოხვედრაზე რაიმე პრეტენზია გააჩნია, დაუმსახურებლად შეღავათს არავის გაუწევენ. ცხადია, სხვა საქმეა ტრავმა, თუმცა ამ შემთხვევაშიც ექიმის ცნობა იქნება საჭირო.

ამ ორი დანაკლისის გარდა, სხვა ლიდერები ნამდვილად იჭიდავებენ: ევროპის ორგზის ჩემპიონი ზურაბ დათუნაშვილი და მსოფლიოს მესამე პრიზიორი ლაშა გობაძე (ორივე - 82), ოლიმპიადისა და ევროპის ბრინჯაოს მედალოსანი შმაგი ბოლქვაძე და ევროპის პრიზიორი გოგა გოგიბერაშვილი (67), ევროპისა და მსოფლიოს მესამე პრიზიორი რობერტ კობლიაშვილი (87), მსოფლიოს მესამეადგილოსანი რევაზ ნადარეიშვილი (97), ევროპის პრიზიორი ლევან არაბული, ახალგაზრდებში ძალიან რეკლემირებული იაკობ ქაჯაია (ორივე - 130) და კიდევ არაერთი ანგარიშგასაწევი ათლეტი.

ამ ტიტულოვან ფალავნებს ახალგაზრდული თუ 23-წლიანთა ნაკრების წევრებიც დაემატებიან, სადაც ძალიან ბევრი ძლიერი და საყურადღებო ფალავანია. მაგალითად, ახალგაზრდებში მსოფლიოს ჩემპიონები რამაზ ზოიძე (72), გელა ბოლქვაძე და სხვები. თუმცა ახალ წონით კატეგორიებში ვინ როგორ გადანაწილდება და ვინ სად დადგება, ამას კი მოგვიანებით შევიტყობთ. რამდენიმე გადაადგილებას ჭიდაობის მოყვარული ზემოჩამოთვლილ სიაშიც შეამჩნევდა.

მწვრთნელებმა წონების მიხედვით 2-2 ყველაზე გამორჩეული ფალავანი განთესეს ანუ ისინი ფინალამდე არ შეხვდებიან ერთმანეთს.
ხვალ გაიმართება წინასწარი პაექრობები 5 წონაში.

ესენია 55, 63, 72, 82 და 97 კილოგრამები. როგორც გითხარით, ამ წონებში შეხვედრები გაიმართება ნახევარფინალის ჩათვლით, დანარჩენი კი ზეგ გაგრძელდება. თუმცა ზეგეს ყველაფერი საღამოს მოხდება, მანამდე კი - დილით დარჩენილი ხუთი წონის ანუ 60, 67, 77, 87 და 130 კილოგრამის ფალავნები ჩაატარებენ წინასწარ შეხვედრებს.

ასპარეზობები სამივე დღეს - 9, 10 და 11 იანვარს დილით 11 საათზე დაიწყება, ფინალური ბლოკი კი საღამოს 17 საათიდან განახლდება.

773
მკითხველის კომენტარები / 0 /
მსგავსი ამბები
რუბრიკის სხვა სიახლეები