ზვიად პატარიძის მეექვსე ტრიუმფი! [VIDEO]

მძიმეწონოსანი ზვიად პატარიძეც მსოფლიოს ჩემპიონი გახდა 23-წლამდელ ბერძენ-რომაელთა შორის. ქუთაისელმა ათლეტმა დაძაბულ ფინალურ პაექრობაში ბოლოსკენ გატეხა თურქი ოსმან ილდირიმი, 0:5 ამოუქაჩა და 6:5 მოუგო. ჩვენებურს ფიზიკურად ძალიან გაუჭირდა, თუმცა მეორე ნახევარში თუქრი საერთოდ გასავათდა, ხოლო შეხვედრაში ორჯერ გააფრთხილეს კიდეც პასიურობისთვის.

თურქმა ხუთივე ქულა პირველივე წუთზე მიიღო, ოღონდ ცოტა საჩოთირო ვითარებაში: პატარიძე წრიდან მის გაყვანას ცდილობდა, მაგრამ ილდირიმმა დაუხურა, აქეთ მოაწვა გადმოაგდო. მსაჯმა ეს ეპიზოდი 2 ქულად შეაფასა, ოღონდ კომისარი ორ ქულას პატარიძისთვისაც მოითხოვდა. ვიდეოეპიზოდის გარჩევის შემდეგ კომისრებმა ცოტა უცნაური გადაწყვეტილება მიიღეს და თურქს ერთბაშად 5 ქულა დაუწერეს, პატარიძეს კი არაფერი მისცეს.

დაღლილმა ჩვენებურმა ვითარება მეორე პერიოდში გამოასწორა - სწორედ მაშინ დასაჯეს თურქი ორჯერ ქულა-გაფრთხილებით, დანარჩენი ქულები კი ილდირიმის წრიდან გაყვანით მოიპოვა. საბოლოოდ პატარიძე მეექვსედ გახდა ასაკობრივ ნაკრებებში მსოფლიოს ჩემპიონი.

ამდენად, პირველი ფინალური დღის შემდეგ ჩვენი ნაკრების მონაგარი 2 ოქროა - შეგახსენებთ, რომ დღესვე მსოფლიოს ჩემპიონი ხობელი ნუგზარ წურწუმიაც (55) გახდა. ჩემპიონატი ბუქარესტში კვლავაც გრძელდება და ხვალ ფინალში კვლავაც ორი ჩვენებური იჭიდავებს, ხოლო ერთიც ბრინჯაოს მედლისთვის იასპარეზებს.

1480
მკითხველის კომენტარები / 0 /
მსგავსი ამბები
რუბრიკის სხვა სიახლეები
;