ზივზივაძის შესანიშნავი დებიუტი: დუბლი პლუს საგოლე პასი - 'ტორპედომ' 'დინამო' გაანდადგურა [მიმოხილვა]

ტორპედო-დინამო (ბთ) 5:1
1:0 კაპანაძე (33), 2:0 ქავთარაძე (36), 3:0 ზივზივაძე (53), 4:0 დოლიძე (60), 4:1 საბანაძე (69), 5:1 ზივზივაძე (90)
ტორპედო: კვასხვაძე (46. ქვილითაია), გეგეჭკორი (78. ტაბატაძე), კობახიძე (78. ბურჯანაძე), ხურცილავა (75. ჭიჭინაძე), სტიეპოვიჩი, გიგაური (77. ჩაჩუა), ჩაჩუა (46. ცინცაძე), ნ. ქავთარაძე (46. დოლიძე), წიქარიძე (46. ქიმაძე), რიჩარდ ლუკა (75. შარვაშიძე), კაპანაძე (46. ზივზივაძე).
დინამო: შოვნაძე, ჩალაძე, გოგიტიძე, ფაცაცია, მელიავა, მამუჩაშვილი, ცაცკრიალაშვილი, თევდორაძე, რამოსი, აბუსელიძე, საბანაძე; შეცვლაზე: ალავიძე, მანჯგალაძე, ვარშანიძე, ილურიძე, კვირკვია, გაფრინდაშვილი, გაგოშიძე, მსხილაძე.

ბუდუს დაბრუნება

ქუთაისის „ტორპედომ“ რამაზ შენგელიას სახელობის სტადიონზე ბათუმის „დინამოს“ უმასპინძლა და დიდი ანგარიშით დაამარცხა. „ტორპედოს“ შემადგენლობაში დებიუტი ჰქონდათ ბუდუ ზივზივაძეს და ასაკობრივი გუნდის ფეხბურთელ თამაზ შარვაშიძეს, ვაჟა ტაბატაძემ კი ხანგრძლივი ტრავმის შემდეგ პირველად ითამაშა.

კლუბის ცნობით, 24 წლის ფორვარდმა ბუდუ ზივზივაძემ „ტორპედოსთან“ 1,5-წლიანი კონტრაქტი გააფორმა. ბუდუ „ტორპედოს“ ღირსებას 2014/15 წლების სეზონში იცავდა. 2015 წელს „სამტრედიაში“ გადავიდა, 2017 წელს კი ეროვნული ლიგის საუკეთესო ბომბარდირი გახდა და წლის საუკეთესო ფეხბურთელადაც დასახელდა. 2018 წლის სეზონში ზივზივაძე კვლავ ეროვნული ლიგის ბომბარდირი (გიორგი გაბედავასთან ერთად) იყო 22 გოლით.

მას საქართველოს ყველა ასაკობრივ ნაკრებში უთამაშია. ოთხჯერ იყო გამოძახებული ქვეყნის ეროვნულ გუნდში. ბათუმის „დინამოსთან“ ამხანაგურ მატჩში მისი არაოფიციალური დებიუტი შესანიშნავი იყო - დუბლი და საგოლე პასი შეასრულა.

„ქუთაისში დაბრუნება და მშობლიური ქალაქის კლუბში თამაში ჩემთვის ძალიან მნიშვნელოვანია. მინდა, ჩემი სახელი „ტორპედოს“ ისტორიაში ჩაიწეროს და საამისოდ ყველაფერს გავაკეთებ“, - ამბობს ბუდუ ზივზივაძე.

დიდი ანგარიშით

ტრავმებისა და სხვადასხვა მიზეზით „დინამოში“ არ უთამაშიათ გურამ ადამაძეს, ჯოვინო ფლამარიონს, გიორგი ჯანელიძეს, ლევან შარიქაძეს, გიორგი გადრანსა და გუნდში ახალმისულ რომან ჭანტურიას.

მატჩი „ტორპედოს“ აქტიურობით დაიწყო. მასპინძლებს დაწინაურება მე-3 წუთზევე შეეძლოთ, მაგრამ თენგიზ წიქარიძის მიერ დარტყმული ბურთი სტუმართა გუნდის მეკარემ ეფექტური ნახტომით მოიგერია.

ექვს წუთში მომენტი ნოდარ ქავთარაძეს შეექმნა, რომელსაც მარცხენა ფლანგიდან შესანიშნავი გადაცემა გუნდის ბრაზილიელმა ახალწვეულმა რიჩარდ ლუკამ გაუკეთა, მაგრამ ქავთარაძის დარტყმული კარს მცირე მანძილით ასცდა. ერთ წუთში მომენტი თავად ლუკას შეექმნა, მაგრამ მისი შორეული დარტყმა არაზუსტი გამოდგა.

ბათუმელებმა პირველი მომენტი მე-15 წუთზე შექმნეს. როინ კვასხვაძის კარში ნიკა საბანაძე ურტყამდა, მაგრამ ტორპედოელთა კაპიტანს პრობლემა ვერ შეუქმნა. ოთხ წუთში საბანაძემ კიდევ ერთხელ დაარტყა და ბურთი მიზანს ასცდა.

„ტორპედომ“ ანგარიში 33-ე წუთზე გახსნა, ლევან გეგეჭკორის ფლანგური გადაცემის შემდეგ დასწრებაზე კარგად ითამაშა თორნიკე კაპანაძემ - 1:0. სამ წუთში მეტოქის კარი ქავთარაძემაც აიღო, რომელმაც წიქარიძისგან მიიღო პასი - 2:0.

მეორე ტაიმიც „ტორპედოს“ შეტევების ფონზე წარიმართა. ბუდუ ზივზივაძე ქუთაისელთა ფორმით სწორედ მეორე ნახევრის სტარტზე გამოჩნდა მოედანზე. პირველი გოლი მან გეგეჭკორის შთამბეჭდავი დრიბლინგის შემდეგ გაიტანა და „ტორპედოს“ უპირატესობა სამამდე გაზარდა.

8 წუთში ზივზივაძის საგოლე გადაცემით თავი გრიგოლ დოლიძემ გამოიჩინა - 4:0. მერე ერთწუთიანი ინტერვალით გეგეჭკორი და რიჩარდ ლუკა ურტყამდნენ ბათუმელთა კარის მიმართულებით, მაგრამ ორივეს მიზანმა უმტყუნა.

ბათუმელთაგან პრესტიჟის გოლი ცვლილებაზე შესულმა ექსტორპედოელმა ნიკა საბანაძემ შეაგდო. აქტიურმა ზივზივაძემ კი 90-ე წუთზე დუბლი მიითვალა.

აზაცკი ბრუნდება

Azacki: ოლექსანდრ აზაცკიმ ქუთაისის ტორპედოსთან ერთად საქართველოს თასი მოიგო

ქუთაისის „ტორპედოს“ თურქულ შეკრებაზე ოლექსანდრ აზაცკი შეუერთდება. ეს ინფორმაცია ქუთაისურ კლუბში დაგვიდასტურეს.

„ბათუმის „დინამოსთან“ მოვიგეთ (5:1 ქუთაისურ სპარინგში - რედ) და ეს ყოველთვის კარგია მოტივაციისთვის. მოსამზადებელ პერიოდს თურქეთში გავაგრძელებთ. სამწუხაროდ, რამდენიმე ლეგიონერთან დამშვიდობებამ მოგვიწია, მაგრამ ახალი ფეხბურთელებიც გვყავს და მათი თამაშით ამ ეტაპზე კმაყოფილები ვართ. ორ დღეში ოლექსანდრ აზაცკის საკითხიც გადაწყდება და ის უკვე თურქეთში შემოგვიერთდება“, - ამბობს „ტორპედოს“ მთავარი მწვრთნელის ასისტენტი მიხეილ აშვეთია.

შეგახსენებთ, რომ აზაცკის სატრანსფერო უფლებები ჩეხურ კლუბ ოსტრავის „ბანიკს“ ეკუთვნის, იჯარა კი დეკემბერში დაუსრულდა. უკრაინელი მცველი „ბანიკში“ დაბრუნდა და სეზონისთვის მზადება სწორედ ამ კლუბთან ერთად დაიწყო. თუმცა ქუთაისელებისთვის მისი დაბრუნება მნიშვნელოვანი იყო და როგორც ჩანს, საწადელსაც მიაღწიეს.

ამავე დროს შევიტყვეთ, რომ გუნდი არა მხოლოდ ირანში წასულ არფანგ დაფეს, არამედ, გლეოფილო ვლიტერ-ჰასელბანკსაც შეელია. ეს ინფორმაციაც „ტორპედოში“ დაგვიდასტურეს.

ამავე დროს, ცნობილი გახდა, რომ გუნდთან კონტრაქტი დავით ხურცილავამ გაახანგრძლივა - გამოცდილი მცველი „ტორპედოს“ ღირსებას 2020 წლის ბოლომდე დაიცავს.

თურქეთისკენ

„ტორპედო“ გუშინ თურქეთში გაემგზავრა, სადაც მზადების პროცესს გააგრძელებს. კახა ჩხეტიანის გაწვრთნილები შეკრებაზე 5 ამხანაგურ მატჩს გამართავენ: 6 თებერვალს - „აკადემია პანდევთან“ (მაკედონია); 7 თებერვალს - მინსკის „დინამოსთან“ (ბელარუსი); 9 თებერვალს - „რადთან“ (სერბეთი); 13 თებერვალს - „კარპატისთან“ (უკრაინა); 16 თებერვალს - კიევის „არსენალთან“(უკრაინა).

„ტორპედო“ შეკრებაზე შემდეგი შემადგენლობით გაემგზავრა: მეკარეები - როინ კვასხვაძე, მაქსიმე ქვილითაია, ლუკა მიქაია; მცველები - ლევან გეგეჭკორი, ვაჟა ტაბატაძე, მამუკა კობახიძე, ნიკოლა სტიეპოვიჩი, დავით ხურცილავა, ანრი ჭიჭინაძე, შალვა ბურჯანაძე, ვახტანგ ბოჭორიშვილი, ვახტანგ ნებიერიძე; ნახევარმცველები - მათე ცინცაძე, მერაბ გიგაური, გიორგი ქიმაძე, გრიგოლ დოლიძე, თენგიზ წიქარიძე, ამბროსი ჩაჩუა, ნოდარ ქავთარაძე, რიჩარდ ლუკა, თამაზ შარვაშიძე; თავდამსხმელები - თორნიკე კაპანაძე, ბუდუ ზივზივაძე.

ყოველდღიური სპორტული გაზეთი "ლელო"
777
მკითხველის კომენტარები / 0 /
მსგავსი ამბები
რუბრიკის სხვა სიახლეები
;