ზოიძის ვერცხლი გრან პრიზე, ზაგრებში

ზაგრებში ჩატარდა გრან პრი ბერძნულ-რომაულ ჭიდაობაში, რომელშიც საქართველოდან ექვსი სპორტსმენი მონაწილეობდა, მათი მონაგარი კი ერთი ვერცხლის მედალია. ის რამაზ ზოიძემ მოიპოვა 72 კილოგრამში, თუმცა ჩვენებურმა ტრავმის გამო ფინალში არ იჭიდავა უნგრელ რობერტ ატილა ფრიჩთან.

დამამშვიდებლის ფინალში საჭიდაოდ ასევე ტრავმის გამო არ გასულა აივენგო რიკაძე (82), ვინც მეხუთე ადგილზე დარჩა. მეხუთე ადგილით დაკმაყოფილდა ირაკლი ძიმისტარაშვილიც (63) - მან კი იჭიდავა, მაგრამ წააგო, ხოლო დანარჩენებს არც ჰქონიათ მედლისთვის ბრძოლის გაგრძელების რეალური შანსი, ისინი სანუგეშომდეც ვერ მივიდნენ.

ტრავმა რომ არა, ზოიძემ ძალიან ძლიერად ჩაატარა წინასწარი ეტაპის ორთაბრძოლები და დიდი შანსი იყო, სამშობლოში ოქროთი დაბრუნებულიყო. მან ყველა შეხვედრა სოლიდური უპირატესობით მოიგო, პირველ პაექრობაში კი ნორვეგიელი ვეგარ იორგენსენი დაამარცხა: 13:6. ამის შემდეგ მეოთხედფინალში საკმაოდ მძიმე ბრძოლა მოიგო სერბ მატე ნემესთან - 10:4. თანაც, მეტოქესთან ერთად მსაჯთა დიდი მიკერძოების დაძლევაც მოუხდა.

ამ შეხვედრაში მთავარი ამბები ბოლო 2 წუთში მოხდა, როცა ზოიძე ისედაც აგებდა - 0:1. ჭიდაობაში მსაჯთა არაობიექტურობა აღარ გვიკვირს, თუმცა ისინიც, თითქოსდა, ჩვენს ჯინაზე, ყველა ტურნირზე ახალ-ახალ სიურპრიზებს გვიმზადებენ. თანაც, იმდენად მოულოდნელს, ეს სახეობა მართლა ღირსია, ასეთი უნამუსობების გამო ოლიმპიადის პროგრამიდან ამოიღონ... იმ ეპიზოდშიც, როცა 2 წუთი რჩებოდა დასრულებამდე, ზოიძე უტევდა, თუმცა მაინც მას ჩაუთვალეს პასიურობა და ქულით დასაჯეს, ხოლო როცა ქართველმა ეს გააპროტესტა და არ დგებოდა ჩოქბჯენში, მსაჯმა კიდევ ორი ქულა დაუმატა და ანგარიში 0:4 გახადა.

საბოლოოდ მაინც ჩადგა ჩოქბჯენში, თუმცა სერბის უბედურებაც აქედან დაიწყო - ზოიძე ხალიჩიდან აქაჩვის პროცესში გადავიდა კონტრშეტევაზე, იქით ჩააგდო დაბლა და ორჯერაც დაატრიალა, რითაც დაწინაურდა კიდეც: 6:4. დარჩენილ დროში ორჯერ კარგად შეეკრა „ჯვარზე“ (პირველად ეს მეტოქეს დაასწრო) და დგომიდანაც გადააგდო, თუმცა შუალედში ერთხელაც ეკუთვნოდა 2 ქულა, როცა ასევე დგომიდან ჩააგდო, მაგრამ მანამდე მსაჯმა გაუმართლებლად გააჩერა შეხვედრა.

ნახევარფინალში ზოიძემ პოლონელი მათეუშ ლუკან ბერნატეკი დაამარცხა - 11:2, პირველი ქულები კი მშვენიერი კისრულით აართვა. არადა, მანამდე მასთანაც აგებდა - 0:2, იმ გდებით კი ანგარიში გაათანაბრა. პოლონელი მალე დგომიდან მშვენიერ 4-ქულიანზეც გადააგდო, ბოლოს კი კიდევ ერთხელ გაუკეთა მსგავსი გდება.

ზაგრებში ყველაზე მეტი მონაწილე ამ წონაში გვყავდა - 6-დან 3 აქ ჭიდაობდა. ოლიმპიური პრიზიორი შმაგი ბოლქვაძე (თუმცა ის 67-ში გამოდის) საკვალიფიკაციო წრეშივე დამარცხდა სომეხ გევორგ საჰაკიანთან - 1:2, გიორგი კურტანიძემ კი მერვედფინალში ზემოხსენებულ ნემესთან 3:8 წააგო.

ძიმისტარაშვილიც საკვალიფიკაციო წრეში დამარცხდა ამერიკელთა მომავალ ფინალისტ ხავიერ ტრამაინ იონსონთან - 0:9, მოგვიანებით კი სანუგეშოში გადაერთო. იქ ჯერ ხორვატი ლუკა პრიჰისტალი არ გამოუცხადდა, ბრინჯაოსთვის პაექრობა კი პოლონელ დავიდ ერსეტიჩთან დათმო წმინდად: 0:12.

რიკაძემ ტრავმის გამო ვერც ნახევარფინალური პაექრობა ჩაატარა ბულგარელ დანიელ ტიხომიროვ ალექსანდროვთან და მეორე დღეს ვერც ბრინჯაოსთვის დაეჭიდა ხორვატ კარლო კოდრიჩს. ბულგარელამდე მას მხოლოდ ერთმა ორთაბრძოლამ მოუწია კიდევ ერთ მასპინძელ ფილიპ საჩიჩთან, რადგან საკვალიფიკაციოში ისვენებდა, და ისიც 5:3 „გაჩეჩა“.

ჩვენი გუნდის მეექვსე მონაწილე გურამ ხეცურიანი (87) იყო, ვინც შესარჩევშივე დამარცხდა ირანელ ჰასან ჯაჰანბაკშ ფოროუზანდენ გოჯენბაიგლოუსთან: 1:3.

ყოველდღიური სპორტული გაზეთი "ლელო"
179
მკითხველის კომენტარები / 0 /
მსგავსი ამბები
რუბრიკის სხვა სიახლეები