ზორან ზეკიჩი მატჩის შემდეგ: ასე რომ ფეხბურთის  თამაში არ შეიძლება 

“შერიფის” მწვრთნელ ზორან ზეკიჩს ვრცელი ინტერვიუ ჩამოართვა ადგილობრივმა გამოცემა “მოლდფუტბოლმა”. ხორვატმა სპეციალისტმა სცადა, აეხსნა “საბურთალოსთან” ჩემპიონთა ლიგის პირველი საკვალიფიკაციო ეტაპის პირველ მატჩში განცდილი მარცხის (0:3) მიზეზები...

- ასეთ წაგებაზე ვერაფერს იტყვი, “საბურთალოს” გამარჯვებას ვულოცავთ! მათ ეს დაიმსახურეს. დღეს ჩვენ არაფერი გამოგვივიდა. ვერც ბურთი გავაკონტროლეთ და უბურთოდაც ვერაფერს გავხდით...

- ჩვენ არ გვჯერა, რომ თქვენთვის საპასუხო მატჩი ფორმალობა იქნება. გუნდს როგორ მოამზადებთ?

- მეც ამაზე ვფიქრობ. დღევანდელი თამაშისთვის ძალიან კარგად ვიყავით მომზადებულები, “საბურთალოს” თამაში კარგად გავაანალიზეთ და გავარჩიეთ. ვიცოდით, რომ ეს ძალიან კარგი გუნდი იყო. დღეს ჩვენ ძლიერ კონკურენტს შევხვდით.

- მატჩის წინ გვითხარით, რომ გქონდათ სათამაშო გეგმა და გუნდი მზად იყო მის შესასრულებლად. რა დაემართა ამ გეგმას?

- საერთოდ არაფერი გამოგვივიდა, დაცვაში - მით უფრო. მათი სამი მოთამაშე ჩვენი საყრდენი ნახევარმცველების ზონაში მუდმივად გვაპრესინგებდა. ჩვენ ეს ყველაფერი თამაშამდე ფეხბურთელებს ვუთხარით და ვაჩვენეთ, მაგრამ ყველა ბურთზე ვაგვიანებდით. შეტევაშიც ასე იყო. თითქმის არ ვუტევდით, პრესინგი არ იყო. რაც დაგეგმილი გვქონდა, ფაქტობრივად, იქიდან არაფერი გამოვიდა.

- “საბურთალოსთან” შეხვედრაში მთავარი შეცდომა რა იყო? გუნდს ყველა მოთამაშე შეეწყო?

- ნათელია, რომ ყველა ერთი და იმავე კონდიციაში არ არის. სხვა საკითხია, რომ საყრდენ ზონაში ბევრი შეცდომა დავუშვით. “საბურთალო” ჩვენზე ზეწოლას ახდენდა და ბურთი წინ სწრაფად მიჰქონდა. ფლანგებზეც ხშირად იქმნებოდა ვითარება, როცა ქართველების ორი მოთამაშე ჩვენი ერთის წინაააღმდეგ რჩებოდა. ჩვენ ერთმანეთს არ ვეხმარებოდით. ასე ფეხბურთის თამაში არ შეიძლება! ანგარიშიც შესაბამისია...

ყოველდღიური სპორტული გაზეთი "ლელო"
1788
მკითხველის კომენტარები / 0 /
მსგავსი ამბები
რუბრიკის სხვა სიახლეები
;