ზუკა დავითაშვილი თბილისის 'ლოკომოტივს' უბრუნდება

თბილისის "ლოკომოტივს" ნელ-ნელა ლამის ყველა ტრავმირებული დაუბრუნდა: რატი არდაზიშვილი ერთწლიანი პაუზის შემდეგ ისევ ათამაშდა და გამოჩნდა, თუ როგორ აკლდა გუნდს. ლევან ყენიას დაბრუნება ბოლო კვირის მთავარი მოვლენა იყო - ამაზე ბევრი დაიწერა და ახლა აღარაფერს ვიტყვით.

კიდევ ერთი ტრავმირებული მოთამაშე, რომლის იმედიც "ლოკომოტივს" უნდა ჰქონდეს, ზუკა დავითაშვილია. 17 წლის შემტევი ნახევარმცველი 17-წლამდელთა შესარჩევ ციკლში გატანილი 6 გოლით ელიტრაუნდის ყველა ჯგუფში საუკეთესო ბომბარდირი გახდა.

მაგრამ აპრილის შემდეგ "ლოკომოტივის" შეხვედრებში აღარ ჩანდა. დავითაშვილი ტრავმირებული იყო და სამკურნალოდ დრო სჭირდებოდა. ამის გამო ეროვნული ლიგის თამაშებიც გამოტოვა და სანაკრებო მატჩებიც.

როგორც 17 წლის ფეხბურთელმა გვითხრა, ის მოედანს მალე დაუბრუნდება: "ზუსტად ორი თვე და 10 დღე გავიდა მას შემდეგ, რაც აღარ მითამაშია. ყველაფერი 17-წლამდელთა ელიტრაუნდის დროს დაიწყო, რომელიც პოლონეთში გაიმართა. პოლონეთთან შეხვედრამდე, გახურებისას საზარდული ამტკივდა.

მაგრამ მოედანზე როგორც კი გავედი, ტკივილმა გამიარა და ჩავთვალე, რომ საშიში არაფერი იყო. თუმცა ტკივილებმა ღამით, ძილის დროს შემაწუხა და მთელი ელიტრაუნდი ასე გაგრძელდა - თამაშების დროს არაფერი მაწუხებდა, მაგრამ დასვენებულზე უსიამოვნო შეგრძნება არ მტოვებდა.

არადა, ამ ტკივილებით 6 გოლი გავიტანე. საქართველოში დაბრუნების შემდეგ მხოლოდ ერთი შეხვედრა ჩავატარე, "საბურთალოს" 2:1 რომ მოვუგეთ. ამის მერე მკურნალობა დამჭირდა", - ამბობს დავითაშვილი, რომელიც "ლოკომოტივში" თბილისის "დინამოდან" ზამთარში გადავიდა. ის იმედიანადაა:

"საბედნიეროდ, მკურნალობა დავასრულე, ტკივილები აღარ მაწუხებს, ბოლო ეტაპს ვამთავრებ და დიდი ალბათობით, გუნდთან ერთად ვარჯიშს და თამაშს უახლოეს პერიოდში შევძლებ".

ყოველდღიური სპორტული გაზეთი "ლელო"
1143
მკითხველის კომენტარები / 0 /
მსგავსი ამბები
რუბრიკის სხვა სიახლეები
;