ზურაბ არზიანი სკანდალის შემდეგ: სადაც ფულის შოვნა შემეძლო, იქ არ მიკადრებია ასეთი რამ...

ფოთის "კოლხეთში" დატრიალებული ამბები ყველასთვის ცნობილია: სფფ-ის სადისციპლინო და საფეხბურთო დავების განმხილველი კომიტეტის 2018 წლის 3 ივლისის სხდომაზე, "უეფას თაღლითური ფსონების ამოცნობის სისტემის ანგარიშების საფუძველზე, "კოლხეთის" ხუთ მოთამაშეს (გუნდის კაპიტანი ლაშა გოგონაია, გიორგი კილასონია, თორნიკე ჯიმშელეიშვილი, ბექა მახარაძე და ზურაბ არზიანი) 6-თვიანი დისკვალიფიკაცია მისცეს, ხოლო კლუბს 6 ქულა დააკლეს.

16 აგვისტოს საფეხბურთო ტრიბუნალმა სამი მათგანის - ჯიმშელეიშვილის, მახარაძისა და არზიანის სარჩელი განიხილა და სასჯელი შეუმსუბუქა. არზიანმა "ლელოს" ბევრი საინტერესო და საყურადღებო ამბავი უთხრა.

შეგახსენებთ, რომ ის ცნობილი ვეტერანი ფეხბურთელის, თბილისის "დინამოს" ყოფილი მცველის, მალხაზ არზიანის ვაჟია...

თავად დავიწყე გარკვევა, რა ხდებოდა

- საფეხბურთო ტრიბუნალმა სასჯელი შეგიმცირათ, მაგრამ თქვენ არც ერთ კლუბში არ ჩანხართ...

- "კოლხეთში" დაბრუნება არ მსურს, სხვები კი არ დამკავშირებიან და რა დასამალია, ამას ძალიან განვიცდი. საერთოდ, რაც მოხდა კოშმარია, რომლიდან გამოსვლაც ძალიან მიჭირს. ახლაც სახლში ვზივარ, არც ერთი გუნდის ინტერესში არ ვარ და დავრჩი უფეხბურთოდ. თუმცა, იმედია, დროებით.

- საერთოდ, დასამალი არ არის, რომ ამ "ბომბის" აფეთქება მოულოდნელი არ ყოფილა...

- და მე რა შუაში ვიყავი?! თანახმა არც ამ სასჯელის შემსუბუქებაზე ვიყავი, რადგან სანამ სასჯელს გამოცხადებდნენ, მანამდე გავიგე, რომ უეფას რაპორტში ჩემი გვარი მოხვდა. თავად დავინტერესდი და ფეხბურთის ფედერაციაში ვიკითხე, რა ხდებოდა. მითხრეს, რომ უეფას რაპორტში დავფიქსირდი. მაგრამ ეს ამბავი მანამდე კლუბის წარმომადგენლებს უთხრეს და მე ამის შესახებ უნდა გავეფრთხილებინეთ. მაგრამ ასე არ მოხდა და თავად დავიწყე გარკვევა, რა და რატომ ხდებოდა.

- როდის გაიგეთ, რომ თქვენი გვარი "შავ სიაში" მოხვდა?

- გადაწყვეტილების გამოცხადებამდე სამი თვით ადრე. ვისგან, ამას ნუ მკითხავთ. მთავარი ისაა, რომ ეს სიმართლე აღმოჩნდა. ვიმეორებ, ეს გადაწყვეტილების გამოცხადებამდე სამი თვით ადრე გავიგე და თავად დავიწყე გარკვევა, რა ხდებოდა ჩემს თავს. მერე გავიგე, რომ "კოლხეთის" ხელმძღვანელობა ფეხბურთის ფედერაციაში დაიბარეს, მაგრამ რეაგირება არ მოახდინესო.

ეს იყო დილასთან მატჩი...

- "კოლხეთს" რა რეაგირება უნდა მოეხდინა?

- ან უნდა დავეჯარიმებინე, ან ჩემთან კონტრაქტი გაეწყვიტათ. მაგრამ არც ერთი არ მომხდარა.

- შევეცადოთ გავიხსენოთ, რეალურად რა მოხდა?

- ...ეს 4 ივლისს, ქუთაისის "ტორპედოსთან" თამაშამდე ხდება. დილით ზარი მაღვიძებს და ჟურნალისტი მეკითხება - გარიგებულ თამაშში თქვენს მონაწილეობაზე რას იტყვითო? ანუ მანამდე რისი გარკვევაც ვცადე და თავად მადარდებდა, რომ ჩემი გვარი უსაფუძვლოდ მოხვდა შავ სიაში, უკვე გასაჯაროებული აღმოჩნდა. ეს ჩემთვის იყო ძალიან დიდი დარტყმა.
კითხვაზე კი გეტყვით - რეალურად, რის საფუძველზე დამაჯარიმეს, ვიცი, მაგრამ კატეგორიულად არ ვეთანხმები.

- რომელიმე კონკრეტულ თამაში იყო დასახელებული?

- დიახ, იყო ასეთი შეხვედრა. ლაპარაკია, გორის "დილასთან" შეხვედრაზე, რომელიც პირველ წრეში, 5 აპრილს გაიმართა. ჩვენ ზესტაფონში ვთამაშობდით და 0:3 წავაგეთ.

- თქვენ რა გბრალდებოდათ?

- მესამე გოლის გატანისას კვახაძეს ხელი რატომ არ შევუშალე. იმ ეპიზოდში, ანუ დარტყმის მომენტში, კვახაძესთან ახლოს კი ვიდექი, მაგრამ მისკენ მცველი წავიდა.

მე "დილას" მოთამაშისგან ზურგით ვიდექი და ხელს ვერ შევუშლიდი. თანაც, ეს 71-ე წუთზე მოხდა და რა დასამალია, დაღლილიც ვიყავი და ამანაც იმოქმედა. არადა, ეპიზოდის განხილვისას ეჭვი გაუჩნდათ, რომ შეგნებულად არ წავედი, მაგრამ ტრიბუნალმა იმიტომ გამამართლა, რომ გადაწყვეტილების მიღებამდე ჩემი პოზიციის დაცვის საშუალება არ მომცეს.

სასჯელი ამიტომ შემიმსუბუქეს. ვიმეორებ - დასასჯელი არაფერი გამიკეთებია და სასჯელის შემსუბუქებაზე ლაპარაკი ამიტომაცაა ჩემთვის მიუღებელი. რადგან რაპორტი შეადგინეს, ეს სულაც არ ნიშნავს, რომ ზურაბ არზიანი დამნაშავეა.

რატომ გადავედი კოლხეთში...

- მსგავსი რაპორტები ჰაერზე არ დგება და მასში უეფამ სერიოზული ძალები ჩართო, მათ შორის, ინტერპოლიც.

- მესმის თქვენი კითხვის ქვეტექსტი და ესაა ყველაზე გულდასაწყვეტი. მე მომხდართან არაფერ კავშირში არ ვარ, მაგრამ ამ გადაწყვეტილების შემდეგ ეჭვები რჩება და ამან ჩემს კარიერას დიდი შავი ლაქა მოსცხო.

- დასამალი არაა, რომ "კოლხეთის" თამაშებზე ხმები ბოლო წლებში ისმოდა. ძნელი სათქმელია, ამ ჭორ-მართალში საზღვარი სად გადის.

- სხვათა შორის, ფეხბურთის ფედერაციაში რომ მივედი და ჩემი ამბით დავინტერესდი, სწორედ ეს მკითხეს.

- ანუ?

- რა მოტივით გადავედი "კოლხეთში". მე იქ თამაშს არ ვაპირებდი, რუსეთში მიმიწვიეს და ბოლო მომენტამდე იმედი მქონდა, რომ გუნდში ჩავირიცხებოდი.

მე რუსეთის მოქალაქე ვარ და ამით გზა გახსნილი მაქვს - ლეგიონერად არ ვითვლები და იმედი მქონდა, რომ გუნდში მოწყობაც გამიადვილდებოდა. მაგრამ ასე არ მოხდა და უგუნდოდ და უფეხბურთოდ რომ არ დავრჩენილიყავი, "კოლხეთში" მივედი. იქ რა ხდებოდა ჩემამდე და თუნდაც ჩემს დროს, ამაში ნაკლებად ვერკვევი, მაგრამ ის კი ვიცი, რომ მე გუნდს და ფეხბურთს კეთილსინდისიერად ვემსახურებოდი.

ერთი გუნდიც არ დამკავშირებია

- ახლა გუნდები თქვენს მიწვევას ერიდებიან?

- ფაქტია, რომ მომხდარის შემდეგ ჩემთან ურთიერთობაზე თავს ყველა იკავებს, ერთიც არ დამკავშირებია. იმედია, ხვალ ვითარება შეიცვლება და მიხვდებიან, რომ არზიანი ამ შავი ლაქით დამღის დასმას არ იმსახურებს.

მე ისიც არ მომწონს, რომ შემიწყალეს - შესაწყალებელი არაფერი მაქვს. ვიცი, რომ საფეხბურთო ტრიბუნალი "კოლხეთის" სარჩელს განიხილავს, სადაც გუნდი 6 ქულის აღდგენას ითხოვს. ამ სარჩელის განხილვის შემდეგ გადაწყდება, ჩემი სრული რეაბილიტაცია მოხდება თუ არა. მაგრამ რაც მოხდა, იმაზე უარესს ფეხბურთელს ვერ გაუკეთებდნენ.

- ახლა თუ ვარჯიშობთ?

- ინდივიდუალურად, ფორმიდან რომ არ ამოვვარდე. რუსეთში მინდა წავიდე და ეს კოშმარი დავივიწყო. ღა დასამალია, გარიგებულ თამაშში მონაწილეობის და დიდი ფულის შოვნის შანსი სადაც მქონდა, ეს იქ არ მიკადრებია და გული ამიტომ მწყდება, ეს საქართველოში რომ დამაბრალეს. დრო გავა და ყველა გაიგებს, რომ თავს კი არ ვიმართლებ, მართალს ვლაპარაკობ და ასეთ შერცხვენას არ ვიმსახურებ, არც მე და არც ჩემი ოჯახი. ამიტომ ჩემი და ჩემი ოჯახის სახელის სრული რეაბილიტაცია მსურს.

1147
მკითხველის კომენტარები / 0 /
მსგავსი ამბები
რუბრიკის სხვა სიახლეები
;