ზურაბ ბოქოლიშვილი: გოლფ-ტურიზმი ყველაზე მიმზიდველი სეგმენტია ტურიზმის ინდუსტრიაში

17-19 სექტემბერს თბილისი გოლფის საერთაშორისო სამოყვარულო ტურნირს, “Taste & Play-ს" უმასპინძლებს. მზადება ამ მასშტაბური ღონისძიებისთვის დასკვნით ფაზაშია შესული. გვესაუბრება ტურნირის საორგანიზაციო კომიტეტის თავმჯდომარე ზურაბ ბოქოლიშვილი.

- ბატონო ზურაბ, რას გვეტყვით საორგანიზაციო პროცესზე და ეტაპებზე?

- საორგანიზაციო პროცესი მიდის ზუსტად იმ გეგმის მიხედვით, რომელიც ჩვენ ჯერ კიდევ აპრილში დავსახეთ. თითქმის დასრულებულია რეგისტრაცია. მინდა აღვნიშნო, რომ ძალიან მაღალი კვალიფიკაციის მოყვარული სპორტსმენები მიიღებენ თბილისის ტურნირში მონაწილეობას. რაც შეეხება სხვა ასპექტებს, რომელიც ამ დონის ღონისძიებისთვის უმნიშვნელოვანესია - ტრანსპორტი, სასტუმროები, სარესტორნე მომსახურება, გასართობი პროგრამა, გახსნა-დახურვის ცერემონიები, პრიზები და საჩუქრები... ასევე უმაღლეს დონეზეა და პირობას გაძლევთ რომ ტურნირის მონაწილეები და სტუმრები დაუვიწყარი ემოციებით გაემგზავრებიან საქართველოდან.

- რამდენად იმოქმედა რუსეთის სანქციებმა, ფრენების აკრძალვამ და ზოგადად გარკვეულად დაძაბულმა ფონმა, რომელიც ზაფხულში იყო?

- რაღაც ფორმით, რა თქმა იმოქმედა, მაგრამ არა დრამატულად, ჩვენ ძალიან ოპერატიულად შევძელით გადაწყობა და დღეისათვის დარეგისტრირებულ სპორტსმენთა აბსოლუტური უმრავლესობა არ არის რუსეთიდან. თბილისს ესტუმრებიან მონაწილეები უკრაინიდან, ბელორუსიდან, ყაზახეთიდან, უზბეკეთიდან, ბულგარეთიდან, ავსტრიიდან, ლატვიიდან, თურქეთიდან და სხვა ქვეყნებიდან.

უნდა ითქვას რომ გოლფ-ტურისტები ინდუსტრიის ყველაზე საინტერესო სეგმენტია მაღალი გადახდისუნარიანობის გამო და საკმაოდ დიდი კონკურენციაა მსოფლიოში ამ კუთხით. ჩვენ სწორედ ასეთი, გამორჩეული მოვლენების ორგანიზების გზით უნდა დავიმკვიდროთ მსოფლიოს გოლფ და ზოგადად აქტიური ტურიზმის ბაზარზე

- თუ შეიძლება გვითხარით მომავალი გეგმების შესახებ...

ძალიან დატვირთული იქნება 2020 წელი. 7-8 მარტი March Madness, ქალთა საერთაშორისო ტურნირი, 1-3 მაისი Tbilisi Investors Challenge, ძალიან საინტერესო ტურნირი, რომელიც გოლფს და საინვესტიციო ფორუმს გააერთიანებს, ჩამოსულ სტუმრებს ექნებათ საშუალება გაეცნონ საქართველოს საინვესტიციო პოტენციალს და განიხილონ კონკრეტული საინვესტიციო პროექტები, რომლებსაც პარტნიორი სტრუქტურები CBA Solutions და PKF Georgia ამზადებენ. 17-19 ოქტომბერი კი ტრადიციული “Taste & Play”, რომელიც კვლავ შეეცდება საუკეთესო მხრით წარმოაჩინოს ჩვენი ქვეყანა. ასევე მის ფარგლებში გაიმართება ტრადიციული კონფერენცია, რომელიც მომავალ წელს გოლფ ტურიზმის თემატიკაზე იქნება ორიენტირებული Sportsway Golf Travel.

იყავით აქტიური, კრეატიული, ითამაშეთ გოლფი, კალათბურთი, ფეხბურთი... გიყვარდეთ ზოგადად სპორტი და ჯანსაღი ცხოვრება და ჩვენ ერთად შევძლებთ გავხადოთ საქართველო ყველაზე ჯანსაღ და მიმზიდველ ქვეყნად.

186
მკითხველის კომენტარები / 0 /
მსგავსი ამბები
რუბრიკის სხვა სიახლეები
;