ზურაბ ბოქოლიშვილი: კატასტროფული მდგომარეობა გვაქვს ფიზიკურად აქტიური მოსახლეობის პროცენტის მიხედვით

კორონავირუსის პანდემიამ კიდევ ერთხელ დაგვანახა, რა მნიშვნელობა აქვს ფიზიკურ აქტივობას ადამიანის ჯანმრთელობისთვის. როგორი იქნება პოსტპანდემიური საქართველო? გვესაუბრება მოძრაობა #იყავიაქტიურისაქართველოში გამგეობის თავმჯდომარე ზურაბ ბოქოლიშვილი.


- ბატონო ზურაბ, გლობალურმა პანდემიამ მნიშვნელოვნად შეცვალა და ფაქტობრივად გააჩერა სპორტული ინდუსტრია, როგორია თქვენი მოსაზრება, რა გზით წავა პროფესიული და მასობრივი სპორტის განვითარება.

- მოგესალმებით, რა თქმა უნდა, ერთ-ერთი ყველაზე დიდი დარტყმა პანდემიისგან სპორტმა მიიღო, გადაიდო და გაუქმდა უმნიშვნელოვანესი ღონისძიებები, სრულიად შეიცვალა და ალბათ, კიდევ უფრო მეტად შეიცვლება ტურნირების ჩატარების ფორმატები, არ ვიქნები ორიგინალური და ვიტყვი რომ ბევრი რამ გადავა ონლაინ სივრცეში. შედარებით უკეთ კრიზისს თავს ე.წ. დიდი ლიგები (NBA, Premier League, Champions League და სხვები) გადაიტანენ, რადგან მათი შემოსავლები ბევრად უკეთ არის სტრუქტურირებული და Match Day-ს შემოსავლის გარეშეც შეუძლიათ მნიშვნელოვანი თანხების გენერირება სატელევიზიო, სპონსორული და მარკეტინგული შემოსავლების სახით. ეს მხოლოდ მწვერვალია ზოგადად სპორტული ინდუსტრიის და ქვედა რგოლებს საკმაოდ სერიოზული ფინანსური კრიზისი ელით

რაც შეეხება სამოყვარულო სპორტს, აქ რამდენიმე ტრენდის გამოყოფა არის აუცილებელი.

პირველი: უკვე ყველა მიხვდა რომ საკუთარ, ახლობლების და თანამშრომლების ჯანმრთელობაში ინვესტირებული თანხები უმნიშვნელოვანესი კაპიტალდაბანდებაა.

მეორე: შეიცვლება სამოყვარულო სპორტის სტრუქტურა, McKenzie-ს ანალიტიკის შედეგად გაირკვა რომ, ფიტნეს ცენტრების აბონენტების მფლობელთა 50% აღარ აპირებს აღნიშნული მომსახურებით სარგებლობას. ასეთ დროს ძალიან დიდი მნიშვნელობა ენიჭება ღია სივრცეებში ფიზიკური აქტივობის პროგრამების დანერგვა-განხორციელებას. ასევე გაჩნდება ე.წ. "ინდივიდუალური მასობრივი სპორტის" ტრენდი, როდესაც მოყვარული სპორტსმენები მობილური აპლიკაციების საშუალებით ინდივიდუალურად ივარჯიშებენ. თუმცა სპორტის, როგორც პროფესიული, ასევე მასობრივის მთავარი ხიბლი ზუსტად იმ კოლექტიურ ემოციურ ფონშია, რომელსაც საბედნიეროდ ვერანაირი ონლაინ ინოვაცია ვერ ცვლის და დროთა განმავლობაში ჩვენც ჩვეულ რიტმს დავუბრუნდებით.

- რას გვეტყვით სპორტული ტურიზმის სექტორის შესახებ, რომელსაც ასევე სერიოზულად შეეხო კრიზისი?

- ეს სფეროც ასევე რამდენიმე ნაწილად უნდა დავყოთ. უდიდესი დარტყმა მიიღეს მეგა სპორტულმა ღონისძიებებმა, ოლიმპიურმა თამაშებმა, სადაც შემოსავალი პირდაპირ კავშირში იყო ჩამოსულ გულშემატკივართა რაოდენობასთან. ჩვენ კარგად უნდა გვესმოდეს, რომ ტურ-ინდუსტრიას რამდენიმე წელი დასჭირდება დაუბრუნდეს ძველ მაჩვენებლებს, უპირველეს ყოვლისა, ფსიქოლოგიური ფაქტორის გამო.

სამაგიეროდ კიდევ უფრო დიდი შანსი გაგვიჩნდა, რაზეც ადრეც ხშირად მისაუბრია, რომ გავხდეთ აქტიური და ველნეს-ტურიზმის ერთ-ერთი ყველაზე მიმზიდველი მიმართულება. არ გვჭირდება მეგა ღონისძიებები, უნდა შევქმნათ ლოკალური, აქტიური ტურიზმის და ველნეს ინდუსტრიაზე ორიენტირებული პროდუქტები და გარწმუნებთ, საქართველო ბევრად უფრო მოგებული გამოვა კრიზისიდან. უნდა შემუშავდეს ქვეყნის ტერიტორიული ბრენდინგის ახალი, ჯანმრთელობაზე ორიენტირებული კონცეფცია. ჩვენი ქვეყნის უნიკალური კლიმატური პირობები, პანდემიასთან ბრძოლის სანიმუშო მაგალითი შესანიშნავ საფუძველს იძლევა ხარისხობრივი ზრდისთვის.

- დღევანდელი სპორტი წარმოუდგენელია სპონსორების გარეშე, ბუნებრივია რომ ბევრ მათგანს ობიექტურად შეეხო კრიზისი. როგორ ხედავთ სპორტის სპონსორების პერსპექტივას?

- ახალს ისევ არაფერს ვიტყვი - უპირველეს ყოვლისა, სპორტ ორგანიზაციებმა უნდა შექმნან მიმზიდველი პროდუქტი. რომელიც ბიზნესისთვის გასაგებად იქნება დამუშავებული: მიზნობრივი აუდიტორიის აღწერით, კლიენტთა ბაზით, თუ რა შესაძლებლობები ექნებათ ბრენდებს ივენთებში ინტეგრაციის, უმნიშვნელოვანესია, რომ სწორად მოხდეს სასპონსორო წინადადებების შეფასების კრიტერიუმების განსაზღვრა, პოტენციურ სპონსორს კარგად უნდა განესაზღვროს, თუ რატომ არის მნიშვნელოვანი მისი კომპანიისთვის ამა თუ იმ პროექტში ჩართვა.

დღეს როგორც არასოდეს პირველ პლანზე წამოიწია ღირებულების განსაზღვრა: სოციალური, ეკონომიკური ფაქტორების. სპონსორებს მუდმივად უნდა შეეძლოთ ანალიტიკურ ბაზებზე წვდომა, უფრო მეტი დეტალიზაცია შეთავაზებების. ჩვენ ერთ-ერთ უდიდეს აუდიტორულ კომპანია PKF KAIZEN თან ერთად შევქმენით Kaizen Sports and Entertainment დეპარტამენტი, სადაც შეგვიძლია კვალიფიციური კონსულტაცია და ანალიტიკური მომსახურება გავუწიოთ ორივე მხარეს - ღონისძიებების ორგანიზატორებს და პოტენციურ სპონსორებს.

- თქვენი აზრით, როგორი უნდა იყოს სახელმწიფოს როლი ზოგადად სპორტის განვითარების კუთხით?

- რაც შეეხება პროფესიულ სპორტს, სახელმწიფო მართლაც თავისი შესაძლებლობების მაქსიმუმს აკეთებს. მაგრამ სამწუხაროდ კატასტროფული მდგომარეობა გვაქვს მასობრივი სპორტის და ზოგადად ფიზიკურად აქტიური მოსახლეობის პროცენტის მიხედვით. ეს ძალიან ბევრ პრობლემას წარმოშობს: ეკონომიკურს, სოციალურს, მენტალურს...

მე ვისურვებდი რომ სახელმწიფომ მოსახლეობის გაჯანსაღება პრიორიტეტად გამოაცხადოს, როგორც ეს განვითარებული ქვეყნების აბსოლუტურ უმრავლესობაშია. ამით ჩვენ გაგვიჩნდება წვდომა საერთაშორისო ფონდებთან და დონორ ორგანიზაციებთან. ბევრად უფრო მეტი პროგრამის განხორციელების შესაძლებლობა მოგვეცემა. აქტიურად ვმუშაობთ საქართველოს პარლამენტის სპორტის და ახალგაზრდობის საქმეთა კომიტეტთან, საქართველოს განათლების, მეცნიერების, კულტურისა და სპორტის სამინისტროსთან, ჯანდაცვის სამინისტროსთან და უახლოეს დღეებში მასობრივი სპორტის და მოსახლეობის გაჯანსაღების გეგმის პრეზენტაციას შემოგთავაზებთ.

- და ბოლოს, როგორია თქვენი ორგანიზაციების გეგმა? იძულებითი პაუზის შემდეგ განაახლებთ თუ არა ღონისძიებებს?

- განვაახლებთ და უფრო მეტიც, ჩვენ რამდენიმე უმნიშვნელოვანესი კომპონენტი დავამატეთ #BeActiveInGeorgia პროგრამას. გავხდით Global Wellness Day-ს კონტრიბუტორი საქართველოში, European Sponsorship Association წევრი, რომლის ეგიდით ძალიან საინტერესო სასწავლო კურსებს ვგეგმავთ. რა თქმა უნდა გაგრძელდება ჩვენი ყველაზე წარმატებული პროექტები Run Georgia, საკალათბურთო "თბილისის ზაფხულის ლიგა", გოლფის საერთაშორისო ტურნირები, ასევე წელს პირველად შემოგთავაზებთ ე.წ. ექსტრემალურ გარბენს Dynamic Race. 25 ივლისიდან 27 დეკემბრის ჩათვლით 20-ზე მეტი ღონისძიების მომსწრე და მონაწილე გავხდებით.

ისევ მინდა ჩემი ტრადიციული სიტყვით, გნებავთ მოწოდებით დავასრულო, მოსახლეობის გაჯანსაღება ვერ იქნება ერთი რომელიმე კონკრეტული ორგანიზაციის მოვალეობა, ეს ჩვენი, ყველას საქმეა, სახელმწიფო და კერძო სტრუქტურების, სპორტული და საგანმანათლებლო ორგანიზაციების, მედიის! ჩვენ ერთად უნდა შევძლოთ და ვაქციოთ საქართველო ჯანსაღი ცხოვრების ეტალონად! ჩვენ ეს შეგვიძლია!


975
მკითხველის კომენტარები / 0 /
მსგავსი ამბები
რუბრიკის სხვა სიახლეები
;