ზურაბ გელაშვილი: ვგრძნობ, უმაღლეს ლიგაში თამაში შემიძლია!..

  • ბურთით ზურაბ გელაშვილი

საქართველოს ჩემპიონატის გუნდები ჯერ ბოლომდე არ დაკომპლექტებულან, სელექციის პროცესი გრძელდება და ამ პროცესში, შესაძლოა, რანდენიმე საინტერესო მოთამაშე გავიხსენოთ, რომლებზეც ახლო წარსულში დიდ იმედებს ამყარებდნენ...

ერთი მათგანი ზურაბ გელაშვილია - 23 წლის მარჯვენა მცველი, რომელიც ახლო წარსულში საქართველოს 16, 17 და 19-წლამდელთა ნაკრებებში თამაშობდა. ის ახალ გუნდს ეძებს. სამწუხაროდ, დაბალ ლიგაში თამაშმა მის კარიერას კვალი დაატყო - ტრავმის შემდეგ უმაღლეს ლიგაში აღარ უთამაშია, რასაც ძალიან განიცდის.

"თავიდან, კარიერა ისე ამეწყო, უკეთესს ვერც წარმოვიდგენდი. 16 წლისა ასაკში ქუთაისის "ტორპედოს" დუბლებში ვთამაშობდი, ხოლო 2014 წელს სადებიუტო მატჩი უკვე უმაღლეს ლიგაშიც ჩავატარე. ამ პერიოდში იყო გიორგი დევდარიანის 19-წლამდელთა ნაკრები, სადაც ძირითადში ვთამაშობდი. იყო ლაპარაკი უცხოეთზეც, მქონდა კიდეც ვარიანტები, მაგრამ დავრჩი და 2015 წელს "რუსთავში" გადავედი, რომლის ფორმითაც უმაღლეს ლიგაში ერთი სეზონი ჩავატარე. 2016 წლიდან ლანჩხუთის "გურიაში" მიმიწვიეს და 2017 წელიც იქ გავატარე", - ამბობს გელაშვილი.

მის თქმით, ყველაფერი "გურიას" შემდეგ იარია: "გუნდი ეროვნული ლიგიდან გავარდა და თემურ მახარაძეს თერჯოლის "საპოვნელაში" გავყევი, მაგრამ ის მალე გაათავლისუფლეს, მე კი პირველივე შეხვედრაში კუნთი დამიზიანდა... საბოლოოდ 8 თვე გამიცდა და ამან კარიერა სულ ამირია. ვფიქრობდი, ფორმის აღსადგენად დაბალი ლიგის გუნდში ცოტა ხნით ვითამაშებდი, მაგრამ... ეს იყო ჩემი ყველაზე დიდი შეცდომა.

ნახევარი სეზონი "ზუგდიდში" გავატარე, რომელიც ლიგა 2-დან გავარდა, ასეთი გუნდის მოთამაშეებს კი ყურადღებას არავინ აქცევს. მერე ისევ "გურიაში" დავბრუნდი, ბოლოს კი ტყიბულის "მეშახტეში" ჩავირიცხე... ჯერ იმ ასაკში არ ვარ, ხელები რომ ჩამოვუშვა, ვგრძნობ და მჯერა, თამაში შემიძლია. მაგრამ ეროვნულ ლიგას რამდენი ლიგითაც შორდები, იმდენით გივიწყებენ".

882
მკითხველის კომენტარები / 0 /
მსგავსი ამბები
რუბრიკის სხვა სიახლეები
;