ზურაბ დავითაშვილი: ვიცი, რომ დაინტერესება გაიზარდა...

საქართველოს 17-წლამდელთა ნაკრები ევროპის ჩემპიონატის ფინალურ ეტაპზე ვერ გავიდა. არადა, გიორგი ნემსაძის გუნდი ძალიან ახლოს იყო მიზანთან...

თუმცა ნუგეშად ის დაგვრჩა, რომ გუნდის კაპიტანი ზურაბ დავითაშვილი 6 გოლით (დუბლი და პოკერი) ელიტრაუნდის საუკეთესო ბომბარდირი გახდა და თან პირველი ქართველიც, ვინც ამ ეტაპზე ასეთი შედეგიანი თამაში აჩვენა.

"ლელო" დავითაშვილს ელიტრაუნდზე, საქართველოს ნაკრებსა და მის სამომავლო გეგმებზე ელაპარაკა...

- ელიტრაუნდის ჯგუფში მეორე ადგილი დაიკავეთ და იყო იმედი, რომ ევროპის ჩემპიონატზე მოხვდებოდით... მაგრამ, ასე არ მოხდა და ამან ყველას გული დაგვწყვიტა. გუნდში რა განწყობა იყო?

- ჩემი აზრით, მაქსიმუმი გავაკეთეთ საიმისოდ, რომ ევროპაზე გვეთამაშა. ელიტრაუნდი ისეთი ეტაპია, სადაც სუსტი მეტოქეები არ არიან. პოლონეთი რა სიძლიერის საფეხბურთო ქვეყანაა, ყველამ იცის.

ირლანდია კი მუდამ საშუალო-ევროპულ დონეზეა... ასე რომ, ძალიან რთული მეტოქეები გვყავდა. ამის მიუხედავად, მოვახერხეთ და ჯგუფში მეორე ადგილზე გავედით.

მიმაჩნია, რომ პოლონეთთან და, განსაკუთრებით ბოლო შეხვედრაში, მაკედონიასთან, კარგად ვითამაშეთ. მასპინძლებთან მეორე ნახევარში ათნი დავრჩით და ამის მიუხედავად, ქულა მოვიპოვეთ. თუმცა ევროპაზე სათამაშოდ ესეც არ აღმოჩნდა საკმარისი და ყველას გული დაგვწყდა.

- ირლანდიასთან ქულის მოპოვება შეუძლებელი იყო?

- პირველი და ბოლო შეხვედრა ძალიან კარგად ჩავატარეთ, მაგრამ რა დასამალია და, ირლანდიასთან თამაში არ წაგვივიდა. ძლიერი გუნდი იყო. მეორე ფაქტორი ის გახლდათ, რომ პოლონეთის შემდეგ ძალები ბოლომდე ვერ აღვიდგინეთ.

- არადა, ირლანდიასთან ერთი გოლიც რომ გაგეტანათ, ბელგიას გავუსწრებდით...

- ასეთი გულდასაწყვეტი ფაქტი არაერთი იყო. ირლანდიასთან ბევრი მომენტიც ვერ შევქმენით. ერთი მე მქონდა შანსი, მაგრამ სამწუხაროდ, ვერ გამოვიყენე.

- თუმცა, ელიტრაუნდის ბომბარდირი გახდით...

- რა თქმა უნდა, გოლები ყოველთვის სასიამოვნოა, მით უმეტეს, როცა გუნდს შედეგის მიღწევაში ეხმარები. ტურნირამდე ასეთ შედეგს ვერც წარმოვიდგენდი, მაგრამ ყოველთვის და ყველა მეტოქესთან მაქსიმალურ შედეგზე ვფიქრობ და ეს მეხმარება.

მოედანზე სწორედ იმიტომ გავდივარ, რომ გუნდურადაც ვითამაშო და თავიც გამოვიჩინო. ყველა ფეხბურთელი გულის სიღრმეში ამაზე ფიქრობს.

- კიდევ რამ შეგიშალათ ხელი?

- ოპტიმალური შემადგენლობით რომ გვეთამაშა, დარწმუნებული ვარ, უკეთეს შედეგს ვაჩვენებდით. ტრავმის გამო შალიკაშვილი და კაპანაძე პოლონეთში ვერ წამოვიდნენ.

გელაშვილი პირველივე ტურში გააძევეს და ირლანდიასთან ვერ დაგვეხმარა. ამავე შეხვედრაში აზაროვი მე-5 წუთზე დაგვემტვრა, ნონიკაშვილი კი ირლანდიასთან მე-10 წუთზე დაშავდა და მეორე, გადამწყვეტ შეხვედრაში ისეთი შემადგენლობა გვყავდა, რომლითაც არასოდეს გვითამაშია.

ძნელია იმ აზრთან შეგუება, რომ 8 მეორეადგილოსანში ყველაზე უარესი შედეგი ჩვენ გვქონდა. თუმცა ამ გუნდს ევროპაზე გასვლა შეეძლო.

- ელიტრაუნდამდე იყო ლაპარაკი, რომ "რუბინში" გიწვევდნენ.

- ჯერ არ ვიცი, ეს მოლაპარაკება რა სტადიაშია და საერთოდ, რა ხდება. ახლა "ლოკომოტივში" ვარ და მინდა, ვითამაშო და გუნდს დავეხმარო.

- თუმცა ელიტრაუნდის ბომბარდირობა ისეთი სტატუსია, ბევრ კლუბს დააინტერესებდა...

- ვიცი, რომ დაინტერესება გაიზარდა, მაგრამ კონკრეტული გუნდები ჯერ არ ვიცი.

- ოთხშაბათს "ლოკომოტივი" "საბურთალოს" ხვდება. რთული თამაში გელით...

- ჩვენ ჯერ არ მოგვიგია და დიდი სურვილი გვაქვს, რომ პირველი 3 ქულა მოვიპოვოთ. რა თქმა უნდა, ეს ძნელი იქნება, რადგან "საბურთალო" ძლიერი გუნდია და ლიდერიც შემთხვევით არ არის. მაგრამ მოედანზე მაინც მოსაგებად უნდა გავიდეთ.

ყოველდღიური სპორტული გაზეთი "ლელო"
1755
მკითხველის კომენტარები / 1 /
სოსო
0
არ ვურჩევ ზურას რუბინში წასვლა,რაღაც უცნაურუ დამოკიდებულება აქვთ ფეხბურთელებთან,ჯერ სულში ჩაისვავენ და შედეგ როგორღაც,თითქოს მტრად ეკიდებიან.
მსგავსი ამბები
რუბრიკის სხვა სიახლეები
;