ზურაბ იაკობიშვილი: ჩემპიონობა შემეძლო.. რას ნანობს იანტბელიძე?

მართალია, ზურაბ იაკობიშვილმა (70) მსოფლიოს ჩემპიონის ტიტული ვერ შეინარჩუნა, მაგრამ ბრინჯაოს მედალი მოიპოვა და პლანეტის პირველობაზე ზედიზედ მეორე სეზონია, უმედლოდ არ რჩება.

თან, წლეულს ის მსოფლიოს პირველობას პირველად ჭიდაობდა ახალ წონაში - შარშან 65 კილოგრამში გამოდიოდა და ჯერ ევროპის მესამე პრიზიორი გახდა, ახლა კი ახალ წონაშიც წარმატებით გადაინაცვლა და წლეულს სეზონის უმთავრეს შეჯიბრებაზე ბრინჯაოს მედალი მოიპოვა - ევროპის ჩემპიონატზეც და მსოფლიოზეც.
ბუდაპეშტში თავისი გამოსვლა მან ასე შეაფასა:

- ბუნებრივია, გულდაწყვეტილი ვარ, მსოფლიოს ჩემპიონი რომ ვერ გავხდი, რადგან აქ საჩემპიონოდ ჩამოვედი. თუმცა კარგია, რომ მედალი მაინც მოვიპოვე და ხელცარიელი არ დავრჩი. არადა, ნამდვილად შეიძლებოდა გამარჯვება.

ოდიკაძის პირველი

ელიზბარ ოდიკაძე (97) თავისი წონის ერთ-ერთი ლიოდერია, თუმცა მსოფლიოს ჩემპიონატზე პირველი მედალი ახლა მოიპოვა. არადა, ამისი გაკეთება შარშანაც შეეძლო - მაშინაც იჭიდავა ბრინჯაოსთვის, მაგრამ დამარცხდა. ბუნებრივია, ის კმაყოფილია თავისი ახლანდელი გამოსვლით:

- აქამდე ევროპის ჩემპიონატებზე სტაბილურად მქონდა მედლები, მსოფლიოზე კი პირველად გავხდი პრიზიორი. ამიტომ ჩემი გამოსვლით კმაყოფილი ვარ, თუმცა მეტიც შემეძლო, კარგად ვიყავი მომზადებული. ვეცდები, მომავალში უკეთესი შედეგი მოვიპოვო.

იანტბელიძე იაკობიშვილზე ნანობს

ბუდაპეშტში თავისუფალი სტილით მოჭიდავეთა ნაკრების გამოსვლას გუნდის მთავარი მწვრთნელი გიორგი იანტბელიძე აფასებს:

- მთლიანობაში, გუნდის გამოსვლით კმაყოფილი ვარ. 10 სპორტსმენიდან შვიდმა მედლისთვის იჭიდავა, საბოლოოდ კი მოვიპოვეთ ოთხი ჯილდო. გვაქვს ოქროს მედალი, გუნდურში გავედით მესამეზე - მგონი, ეს ცოტა არაა. გვყავს მსოფლიოს ორგზის ჩემპიონი გენო პეტრიაშვილი, ვერცხლის მედალოსანი ავთანდილ კენჭაძე, რომელიც დებიუტანტი იყო და ძალიან კარგად იჭიდავა. კარგად გამოვიდნენ ბრინჯაოს პრიზიორები - ზურაბ იაკობიშვილი და ელიზბარ ოდიკაძე. გუ ნდი კარგად იყო მომზადებული, ბიჭებმა კარგად იშრომეს და ყველაფერი გააკეთეს იმისათვის, რომ დაეფასებინათ მოსამზადებელ პერიოდში გაწეული შრომა და მოეპოვებინათ წარმატება.

თუმცა უკეთესად გამოსვლაც შეიძლებოდა. ძალიან მწყდება გული, ზურაბ იაკობიშვილი ჩემპიონი რომ ვერ გახდა, რაც მას ნამდვილად შეეძლო. სამომავლოდ გამოვასწორებთ ახლა დაშვებულ შეცდომებს და ის კიდევ უფრო უკეთესად იჭიდავებს. ძალიან დიდი მადლობა ქომაგებს, რომელთა მხარდაჭერსაც აქ ვგრძნობთ. დიდი მადლობა მთელ ქვეყანას და ჩვენს ფედერაციას.

750
მკითხველის კომენტარები / 1 /
არჩილ სოხუმელი
0
სამი ოქრო შეგვეძლო აგვეძღო - პეტრიაშვილი, იაკობაშვილი და კენჭაძე.
მსგავსი ამბები
რუბრიკის სხვა სიახლეები
;