ზურაბ კაკაბაძე: დღეს აუცილებლად მოგება გვჭირდება 

სხვადასხვა ქვეყნის 12 გუნდი მონაწილეობს ხელბურთელ ვაჟთა IHF-ის ერთა მსოფლიოს ჩემპიონატში, რომელსაც თბილისის სპორტის სასახლე მასპინძლობს.

პაექრობებს თვალყურს ადევნებენ მსოფლიოს ხელბურთის ფედერაციის მაღალჩინოსნები - საშეჯიბრო კომისიის თავმჯდომარე პერ ბერტელსენი (დანია), მსაჯთა და დელეგატთა კომისიის თავკაცი რომან გალეგო (ესპანეთი), მსოფლიოს ფედერაციის აღმასკომის წევრი ფრანტიშეკ ტაბორსკი (ჩეხეთი). ისინი ასპარეზობის ორგანიზაციის მაღალი დონით აღფრთოვანებას ვერ მალავენ.

„ბოლო რამდენიმე წელიწადია, საქართველოს ხელბურთის ფედერაცია ტოპორგანიზატორ ორგანიზაციად ვაღიარეთ და არც შევმცდარვართ, - ამბობს ფრანტიშეკ ტაბორსკი. - სხვა ტურნირებზე რომ არაფერი ვთქვათ, დასტურად ეს შეჯიბრებაც გამოდგება. ყველაფერი შესანიშნავადაა მოწყობილი:

სასიამოვნო სათამაშო გარემო, გუნდებისთვის დასასვენებლად და სავარჯიშოდ სათანადო პირობები. ყველა სტუმარი კმაყოფილია. ჩვენი ფედერაციისთვის ამ ჩემპიონატის მაღალ დონეზე გამართვას უდიდესი მნიშვნელობა ჰქონდა ხელბურთის შემდგომი პოპულარიზაციისთვის და ამიტომაც ვანდეთ მისი მასპინძლობა საქართველოს, რომელმაც, მართალია, ტურნირი ჯერ არ დამთავრებულა, მაგრამ თამამად შეგვიძლია ვთქვათ, რომ იმედები გაგვიმართლა.

საქართველოს ხელბურთის ფედერაციის მიმართ მადლობის მეტი რა გვეთქმის. უეჭველია, რომ მომავალში თქვენთან უფრო მაღალი რანგის ჩემპიონატებიც ჩატარდება“.

ბულგარეთის ნაკრების მთავარი მწვრთნელი ნიკოლა კარასტოიანოვი: „ჩვენი გუნდი ამ შეჯიბრებისთვის დიდი ხანი ემზადებოდა და თბილისში ტურნირის მოსაგებად ჩამოვედით. საამისოდ აქ შექმნილი გარემოც ხელს გვიწყობს. სტარტზე იოლად ვძლიეთ მალტას. ამერიკელებთანაც მატჩი შესანიშნავად დავიწყეთ, მაგრამ რა მოუვიდათ ბიჭებს 15 წუთის შემდეგ, წარმოდგენა არ მაქვს - ძალიან უსახურად ითამაშეს და თავადაც ნახეთ, რომ ამისთვის დავისაჯეთ.

შესვენების შემდეგ დაცვის სისტემა შევცვალეთ და, ვფიქრობ, მეტოქეს ამის წყალობით მოვუგეთ. მიმაჩნია, რომ ფიზიკურ და ფსიქოლოგიურ სტაბილურობაზე მეტი ყურადღება უნდა გავამახვილოთ. ჯგუფის ფავორიტად ჩვენთან ერთად საქართველო მიმაჩნია, ამიტომ პირველი ადგილის ბედი, ალბათ, ჩვენი და მასპინძლების პაექრობაში გადაწყდება, თუმცა საქართველოს მანამდე ამერიკული ბარიერი აქვს გადასალახავი. როგორც აღვნიშნე, ჩვენი მიზანია ტურნირზე გამარჯვება და ევროპის 2022 წლის ჩემპიონატის მეორე საკვალიფიკაციო რაუნდის საგზურის მოპოვება“.

ზურაბ კაკაბაძე, საქართველოს ხელბურთის ფედრაციის პრეზიდენტი: „სასიამოვნოა, რომ ჩემპიონატის ორგანიზაციით სტუმრები კმაყოფლი არიან. ეს ჩვენთვისაც არანაკლებ მნიშვნელოვანია, რადგან ამგვარი ტურნირები ხელს შეუწყობს ჩვენს ქვეყანაში სპორტის ამ სახეობის პოპულარიზაციასა და უწინდელი ტრადიციების აღორძინებას.

ბოლო სამი წელიწადია, წარმატებით ვართმევთ თავს საერთაშორისო შეჯიბრებების გამართვას, თან ჩვენი გუნდების ოსტატობის დონეც მაღლდება და შედეგებსაც ვაუმჯობესებთ. ამ ჩემპიონატში თითქმის ახალგაზრდული შემადგენლობით ჩავებით, რადგან ნაკრებში თაობათა ცვლა მიმდინარეობს. უფროსებიდან მხოლოდ სამი ხელბურთელი შემოგვრჩა - შოთა თევზაძე, ირაკლი ჩიქოვანი და რეზო ჭანტურია.

დანარჩენები 16-23 წლისანი არიან. თან ახალი მთავარი მწვრთნელი გვყავს - სერბი ნიკოლა მაქსიმოვიჩი, რომელიც ნაკრებს 2 ივნისიდან უდგას სათავეში, მაგრამ უკვე მოასწრო გუნდის ავკარგის გაანალიზება და საკუთარი ხედვის ჩამოყალიბება. კარგია, რომ ჩემპიონატზე ჩვენებმა ზედიზედ სამი შეხვედრა მოიგეს. ასაკის მიუხედავად, ყველა ხელბურთელს მიეცა თავის გამოჩენის საშუალება. მთავრი ის არის, რომ საქართველოს ნაკრები დღითი დღე აუმჯობესებს თამაშის ხარისხს. ჩვენი მიზანია, ტურნირის მოგება, რითაც ჩემპიონატში მონაწილე ბებერი კონტინენტის ექვს გუნდს შორის საუკეთესო შედეგი გვექნება და ევროპის 2022 წლის ჩემპიონატის მეორე საკვალიფიკაციო რაუნდში ასპარეზობის უფლებას მოვიპოვებთ. 

A ჯგუფში ფავორიტია კუბა, რომელიც გათამაშების ცხრილს 6 ქულით უდგას სათავეში. 4-4 ქულით მეორე-მესამე ადგილებს ჩინეთი და დიდი ბრიტანეთი იყოფენ. 12 ივნისს მათი ურთიერთდაპირისპირება ბევრ კითხვაზე გასცემს პასუხს. ისე, სატურნირო მდგომარეობას თვალს თუ გადავავლებთ, ვნახავთ, რომ ტიტულის მაძიებელთა რაოდენობა, ფაქტობრივად, ექვსამდე შემცირდა. 

B ჯგუფში ორი უმნიშვნელოვანესი მატჩი დაგვრჩა ჩასატარებელი. ერთდღიანი შესვენების შემდეგ 12 ივნისს ამერიკის ნაკრებს დავუპირისპირდებით. ოკეანისგაღმელებმა პირველი ორი მატჩი 11 კაცით ჩაატარეს. მესამე ტურისთვის მათ დაემატა თბილისში მოგვიანებით ჩამოფრენილი, გერმანიის მეორე ბუნდესლიგის სამი მოთამაშე: ძმები - უეტერები და პოლ სკუპურა, რამაც ამერიკელთა გუნდი ძალიან გააძლიერა.

ამის მიუხედავად, 12 ივნისს აუცილებლად გვჭირდება მოგება, რომ ნახევარფინალში დავიბევოთ ადგილი. ჯგუფური ეტაპის ბოლო მატჩს ჩემპიონატის ერთ-ერთ ფავორიტ ბულგარეთთან გავმართავთ, რომელსაც, ასევე, ექვსი ქულა აქვს. ქომაგების აქტიური მხარდაჭერით, იმედია, ორივე ბარიერს წარმატებით დავძლევთ. მართალია, წინა შეხვედრებში მაყურებელი არ გვაკლდა, მაგრამ მომავალ დღეებში მათი რაოდენობა, ალბათ, საგრძნობლად გაიზრდება. საქართველოს ნაკრები, ვფიქრობ, ამას იმსახურებს“... 

ჩემპიონატის მონაწილენი გუშინ ისვენებდნენ. დღეს, 12 ივნისს, ერთმანეთს დაუპირისპირდებიან: 10:00. აზერბაიჯანი-კუბა, 12:00. ბრიტანეთი-ჩინეთი, 14:00. კოლუმბია-ინდოეთი, 16:00. ირლანდია-ბულგარეთი, 18:00. საქართველო-აშშ, 20:00. მალტა-ნიგერია.

ყოველდღიური სპორტული გაზეთი "ლელო"
558
მკითხველის კომენტარები / 0 /
მსგავსი ამბები
რუბრიკის სხვა სიახლეები
;