ზურაბ ჩაკვეტაძე ესპანეთში არსებულ ვითარებაზე: მთავრობამ ბიზნესს დაეხმარა და კლუბები იმედიანად არიან

ზურაბ ჩაკვეტაძე - ქუთაისის "ტორპედოს" ყოფილი დირექტორი, იურისტი, რომელიც ესპანეთში ცხოვრობს და საქმიანობს. 2019 წელს ბარსელონას "ესპანიოლის" ხელმძღვანელობის დაკვეთით გუნდის მართვის სისტემატიზაციისა და სტრუქტურული სრულყოფის პროექტის მენეჯერი იყო.
რა ხდება ესპანეთში, როგორია ცხოვრება კორონავირუსის გაზრდილი საფრთხის პირობებში, რა მდგომარეობაა ქვეყანასა და ლა ლიგაში - ეს ის თემებია, რომლებზე საუბარი მოვლენებისა და კორონავირუსის ეპიდემიის ერთ-ერთიო მძიმე წერტილიდან აუცილებლად დაგაინტერესებთ.

სხვა გზა აღარ არის!.. მზადება კრიზისისთვის, რეალი ვარსკვლავების გაყიდვას იწყებს...

- ყველამ იცის, რომ ახლა ესპანეთში მძიმე მდგომარეობაა. ადგილიდან მონათხრობი მაინც ყველაზე საინტერესოა.

- მე ბარსელონაში ვცხოვრობ, ეპიდემიის გავრცელების ცენტრი კი ესპანეთში მადრიდია. ასე რომ, კატალონიაში ისეთი პრობლემები არაა, როგორც დედაქალაქში. მაგრამ ახლა პრობლემები მაინც ყველას ეხება და ცხადია, ჩვენც არ ვართ გამონაკლისები.

- რა სახის შეზღუდვებია დაწესებული?

- ხალხი გარეთ კი დადის, მაგრამ მაქსიმუმ, სახლთან ახლოს მდებარე აფთიაქებსა და მაღაზიებში გასვლის უფლება გაგვაჩნია. ასე ვთქვათ, გონივრულ მანძილზე, რომლის იქით გასვლაც ყველას ეკრძალება.

- და ვინც ამ გონივრულ მანძილს არ დაიცავს, რა სახის ჯარიმა ელის?

- ფეხით მოსიარულეს ჯარიმები 200 ევროდან იწყება, ხოლო მანქანით მოძრაობისთვის, შესაძლოა, 3000 ევრო და მეტიც გამოწერონ. ხელისუფლება იძლებულები გახდა, ასეთი მკაცრი შეზღუდვები და ჯარიმები დაეწესებინა, რადგან ესპანეთში ძალიან რთული მდგომარეობაა.

- პანიკა ხომ არ იგრძნობა?

- პანიკა არაა, მაგრამ აფთიაქებში პირბადეებსა და რეზინის ხელთათმანებს ვერ იშოვო. ასეთი მდგომარეობისთვსი წინასწარ ხომ ვერავინ მოემზადებოდა.

- მკაფიოდ ჩამოყალიბდა მოსაზრება, რომ ფეხბურთი ისეთივე აღარ იქნება, როგორც პანდემიამდე იყო - კრიზისი ესპანურ კლუბებზე როგორ აისახა?

- ხალხის ნაწილს ფეხბურთისა და ფეხბურთელების მიმართ აგრესიული დამოკიდებულება გაუჩნდა, რადგან მათ ექიმებზე შეუდარებლად დიდი ხელფასები აქვთ და ახლანდელ ვითარებაში ეს ბევრს აღიზიანებს. თუცა, ფეხბურთელები ხელფასების შემცირებაზე ბევრ კლუბში დათანხმდნენ და ბევრმაც პანდემიასთან საბრძოლველად თანხები გადარიცხა.

მაგალითად, ლიონელ მესიმ მოთამაშეთა წერილი გამაოქვეყნა, რომ ხელფასებს 70 პროცენტით იმცირებენ. ამას გარდა, მოთამაშეები მზად არიან, შეიტანონ თანხა, რათა კლუბის პერსონალმა ხელფასები სრულად მიიღონ. ასეთივე გადაწყვეტილება მიიღეს "ესპანიოლში", "ბეტისსა" და ბილბაოს "ატლეტიკში" და ხელფასები ასევე 70 პროცენტით შეიმცირეს. ასევე საგრძნობი შემცირება მოხდა "ალავეს-ბასკონიას" ჯგუფში, სადაც ლა ლიგის საფეხბურთო კლუბი "ალავესი" და საკალათბურთო "ბასაკონია" შედიან - ორივე გუნდის მოთამაშეებსა და პერსონალს ანაზღაურება შუემცირეს.

- ესპანურ მედიას თუ დავუჯერებთ, ამ კუთხით, გამონაკლისი "რეალია", სადაც ხელფასები, ფაქტობრივად, არც შემცირებულა.

- ჯერ მადრიდში ხელფასების 10 პროცენტით შემცირებაზეა ლაპარაკი. საქმე ისაა, რომ "ბარსელონაში" სახელფასო ფონდი ლამის 100 მილიონით მეტი იყო, ვიდრე "რეალში". ამან მადრიდელებს მეტი ლავირების საშუალება მისცა. იურიდიულად, კლუბს აქვს უფლება, რომ ხელფასები შემაციროს, რადგან ყველა წამყვან კლუბს მოთამაშეებთან გაფორმებულ კონტრაქტებში ჰქონდა პუნქტი - ფინანსური მდგომარეობის გაუარესების შემთხვევაში, კლუბი იტოვებს უფლებას, რომ ხელფასები შემაციროს. თუმცა, ამ პუნქტის გარეშეც ყველა ხვდება, რომ სხვა გამოსავალი არაა. მაგრამ ამბობენ, რომ აპრილ-მაისის მერე ყველაფერი ჩვეულ კალაპოტში ჩადგება.

- პანდემიამ ცნობილი სლოვაკური კლუბი "ჟილინა" შეიწირა - ესპანეთში გაკოტრების საფრთხე ბევრ კლუბს შეექმნა?

- ესპანეთის მთავრობამ ბიზნესის დასახმარებლად 20 მილიარდი ევრო გამოყო. ეს იმასაც ნიშნავს, რომ საფეხბურთო კლუბებშიც უფრო იმედიანად შეუძლიათ იყვნენ, რადგან მათი პრეზიდენტები ბიზნესმენია. მათი ბიზნესები თუ შენარჩუნდება, ცახდია, კლუბების გადარჩებიან.

- პანდემიის დასრულებას და ჩემპიონატის განახლებას როდისთვის იმედოვნებენ?

- ბარსელონაში ცხოვრობს ჩემი ქართველი მეგობარი, რომელიც "ბარსელონასა" და "ესპანიოლის" თამაშებზე სტიუარდების ჯგუფს ხელმძღვანელობს. მას უთხრეს, რომ დიდი ალბათობით, თამაშები მაისის ბოლოს განახლდება - დიდი ალბათობით, უმაყურებლოდ. თუმცა, პანდემიის პირობებში ამას 100 პროცენტით მაინც ვერავინ იტყვის.

1711
მკითხველის კომენტარები / 0 /
მსგავსი ამბები
რუბრიკის სხვა სიახლეები
;