ზურა დავითაშვილი ლოკომოტივის ფეხბურთელია

ჯერ კიდევ ახალ წლამდე გადაწყდა, რომ ზურა დავითაშვილი თბილისის "დინამოს" დატოვებდა და კარიერას დედაქალაქურ "ლოკომოტივში" გააგრძელებდა.

"დინამოს" აკადემიის აღზრდილმა 2017 წელს ეროვნულ ლიგაში 6 მატჩი ჩაატარა. მაგრამ სეზონის დასრულებისთანავე კლუბის შეცვლა გადაწყვიტა.

16 წლის ნახევარმცველმა და "ლოკომოტივმა" მიაღწიეს შეთანხმებას, რომლის მიხედვითაც მხარეებს შორის ერთწლიანი ხელშეკრულება გაფორმდა. მაგრამ არ არის გამორიცხული, გარკვეული დროის შემდეგ დავითაშვილი ყაზანის "რუბინში" გადავიდეს.

შეგახსენებთ, რომ "ლოკომოტივის" ახალწვეული საქართველოს 17-წლამდელთა ნაკრების კაპიტანია და პარალელურად, 19-წლამდელებშიც თამაშობს.

თბილისის "ლოკომოტივმა" ასევე ოფიციალურად დაადასტურა, რომ 2018 წელს აღარ ეყოლება 6 ფეხბურთელი, რომელთაგან 4 - გასულ სეზონში ძირითადი შემადგენლობის მოთამაშე იყო.

კლუბის პრესსამსახურის ცნობით, კონტრაქტები დაუმთავრდათ გიორგი რეხვიაშვილს, მამუკა კობახიძეს, ზურაბ მენთეშაშვილს, გეგა დიასამიძესა და ნოდარ ქავთარაძეს. მათ გარდა, "საბურთალოდან" მიწვეულ მეკარე ბექა ქურდაძეს იჯარის ვადა ამოეწურა და თავის კლუბში დაბრუნდა.

ბოლო ცნობებით, რეხვიაშვილი, რომელიც ეროვნული საფეხბურთო ლიგის წლის სიმბოლურ ნაკრებში დაასახელეს, დიდი ალბათობით, "რუსთავში" ითამაშებს.

ცნობილია, რომ დიასამიძე "საბურთალოში" გადავიდა, ქავთარაძე - გორის "დილაში", მენთეშაშვილის ამბავი კი გაურკვეველია. ჯერ უცნობია კობახიძის ახალი გუნდიც, მაგრამ შესაძლოა, ისიც "რუსთავში" წავიდეს.

ყოველდღიური სპორტული გაზეთი "ლელო"
1196
მკითხველის კომენტარები / 0 /
მსგავსი ამბები
რუბრიკის სხვა სიახლეები
;