ზუროსის გეგმა - ვის რა დაევალება საქართველოს ნაკრებში?

საქართველოს ნაკრების მთავარმა მწვრთნელმა ილიას ზუროსმა ავსტრიაში გამგზავრების წინ სპორტის სასახლეში ღია ვარჯიში გამართა, რომლის დასრულების შემდეგ 12-კაციანი შემადგენლობა დაასახელა.

როგორც ბერძენმა მწვრთნელმა განაცხადა, გერმანიასთან მატჩის წინ შემადგენლობაში შესაძლოა, ცვლილებები განხორციელდეს:

- დღევანდელი გადაწყვეტილება 12-კაციანი შემადგენლობის შესახებ, შესაძლოა, გადაიხედოს გერმანიასთან თამაშის წინ და შევიდეს გარკვეული ცვლილებები. ავსტრია ძალიან ძლიერი გუნდია, რთული თამაში გველის.

ავსტრიაში გასამგზავრებელი კალათბურთელების სიას ქვემოთ გაეცნობით, აქ კი მოგახსენებთ, რომ ნოემბრის მატჩების შემდეგ ძირითადი ბირთვი ორი კალათბურთელით შეიცვალა - მანუჩარ მარკოიშვილი ტრავმის გამო გუნდს ვერ დაეხმარება, ხოლო გიორგი ცინცაძემ ტრავმა მოიშუშა და გუნდთან ერთად სათამაშოდ ემზადება.

გიორგი ცინცაძე, მაიკლ დიქსონი და ლევან ფაცაცია - ეს გახლავთ კალათბურთელები, რომლებსაც გამთამაშებლის ფუნქციები უნდა დაეკისროთ. თუმცა, რადგან გუნდში "ბუ" დაბრუნდა, ფაცაციას პლეიმეიქერობა ალბათ, აღარ მოუწევს - იგი მსროლელად და ფორვარდად ითამაშებს.

- მოხარული ვარ, რომ ტრავმის შემდეგ ვუბრუნდები კალათბურთს და ავსტრიასთან თამაშზე გუნდთან ერთად ვიქნები. ბიჭები ძალიან მონდომებულები არიან და იმედი მაქვს, წარმატებით დავასრულებთ მსოფლიოს ჩემპიონატის შესარჩევ ციკლს, - აღნიშნა გიორგი ცინცაძემ.

თუ გერმანიასა და სერბეთთან მაიკლ დიქსონი ბურთის გადმომტანიც იყო, გამანაწილებელიცა და მტყორცნელიც, ამჯერად მას ორ პოზიციაზე ვიხილავთ - როგორც გამთამაშებლად, ასევე მსროლელად.

მსროლელის პოზიციაზე თავი კარგად დაგვამახსოვრა მერაბ ბოქოლიშვილმა, რომელიც სხვადასხვა დროს გამთამაშებლადაც ირჯებოდა, მაგრამ ავსტრიაში მას, როგორც მსროლელს ველით.

იმედი გვაქვს, ნოემბრის ტრადიციას არ უღალატებს და სამქულიანებით ჩვეულად დაგვეხმარება. მან ხომ სერბეთთან და გერმანიასთან საწყისი 2-2 სამიანი გამოიყენა.

- მადლიერი ვარ სამწვრთნელო შტაბის, რომ მომცა შანსი, მეთამაშა საქართველოს ნაკრებში. ჩვენი მიზანი ორივე თამაშის მოგებაა. როგორც ავსტრიასთან, ისე გერმანიასთან, მხოლოდ გამარჯვებისთვის ვიბრძოლეთ, - იმედიანადაა მერაბი.

2004 წლიდან აგროვებს სანაკრებო გამოცდილებას ანატოლი ბოისა. ცხადია, ევროლიგის ვარსკვლავებით შედგენილ ნაკრებში ანატოლის ცოტა სათამაშო დრო ჰქონდა, თუმცა ენერგიული თამაშით მოედანზე ემოციის შეტანა შეუძლია.

ნოემბერში საქართველოს ნაკრებმა აქცენტი სამქულიანებზე გააკეთა. აქედან გამომდინარე, ილიას ზუროსმა გუნდში გამოიძახა სუპერლიგაში გამორჩეული პერიმეტრიდან მტყორცნელები რეზო ჩაჩანიძე და აკაკი ლომოური. ავსტრიაში რეზო მიემგზავრება.

როდესაც სამიანებზე ვლაპარაკობთ, მიხეილ ბერიშვილი უნდა ვახსენოთ. მას საქართველოს ნაკრების ისტორიაში ერთ-ერთ ყველაზე ეფექტურ მატჩში სამიანით წერტილი აქვს დასმული.

2008 წელს საქართველომ სლოვაკეთში 101:78 რომ გაიმარჯვა, ბერიშვილმა ბოლო წუთზე ჩაგდებული სამიანით საფინალო ანგარიში დააფიქსირა.

მსუბუქ ფორვარდად მიხეილ ბერიშვილი და უნივერსალი ლევან ფაცაცია ითამაშებენ, რომლებსაც ახალგაზრდა ნიკა დარბაიძე დაეხმარება. ნიკაც უნივერსალური მოთამაშეა, რომელიც გამოცდილებას მსოფლიოს ჩემპიონატის შესარჩევ მატჩებში აგროვებს... მასში მწვრთნელი საქართველოს ნაკრების სტაბილურ კალათბურთელს ხედავს.

ნიკა ცქიტიშვილი და ილია ლონდარიძე ის კალათბურთელები არიან, კლუბებში ცენტრადაც რომ თამაშობენ და მძიმე ფორვარდადაც. თუმცა გაცილებით სასარგებლოები არიან, მწვრთნელი ფორვარდობას რომ ავალებს.

დიდი გამოცდილების მქონე ნიკა ცქიტიშვილს ყველა დისტანციიდან ტყორცნების ზუსტად შეარულებით თამაშის მოგება შეუძლია. სწორედ ამის იმედი გვაქვს ავსტრიაში.

- ვენაში რთული მატჩი გველის. მიუხედავად იმისა, რომ მეტოქეს არ ჰყავს სახელიანი მოთამაშეები, მაინც რთული იქნება სტუმრად გამარჯვება. ყველაზე სახიფათო მაჰალბაშიჩია, რომელსაც მაღალ დონეზე თამაშის გამოცდილება აქვს.

გაცილებით ძლიერი მეტოქე გველის მეორე მატჩში. მოვუწოდებ გულშემატკივარს, თადარიგი დაიჭიროს და ბილეთები შეიძინოს. სპორტის სასახლე უნდა გავავსოთ, რადგან საშინაო კედლების მხარდაჭერა ისე გვჭირდება, როგორც არასდროს, - მოგვიწოდებს ნიკა ცქიტიშვილი.

ცქიტიშვილი და ლონდარიძე, წესითა და რიგით ცენტრად არ უნდა დაგვჭირდეს, რადგან გვყავს ევროპაში ერთ-ერთი ყველაზე პერსპექტიული ცენტრი გოგა ბითაძე და საქართველოს ჩემპიონატის ერთ-ერთი საუკეთესო ცენტრი აკაკი დვალიშვილი.

ორივე მოძრავი ცენტრია და შეუძლიათ ავსტრიაში ფარქვეშ უპირატესობა დაგვიბევონ.

საქართველოს ნაკრები ავსტრიაში 21 თებერვალს მიემგზავრება, დაბინავდება ვენის "ქორთიარდ მერიოტში" და მზადებას ავსტრიაში განაგრძობს. მსოფლიოს ჩემპიონატის შესარჩევი მატჩი 23 თებერვალს თბილისის დროით 21 საათზე დაიწყება.

ავსტრიაში გუნდი დუდა სანაძემ გააცილა, რომელიც ოპერაციის შემდეგ რეაბილიტაციას გადის.

საქართველოს ნაკრები
გიორგი ცინცაძე (პოლიტექნიკა, რუმინეთი)
გოგა ბითაძე (მეგა ბიმაქსი, სერბეთი)
ნიკა ცქიტიშვილი (ბიბლოსი, ლიბანი)
მაიკლ დიქსონი (ბაჰჩეშეჰირი, თურქეთი)
ანატოლი ბოისა (კაკტუსი)
ილია ლონდარიძე (დინამო)
მიხეილ ბერიშვილი (დინამო)
ლევან ფაცაცია (მარნეული)
რევაზ ჩაჩანიძე (რუსთავი)
აკაკი დვალიშვილი (ქუთაისი)
მერაბ ბოქოლიშვილი (ოლიმპი)
ნიკა დარბაიძე (ოლიმპი)

ყოველდღიური სპორტული გაზეთი "ლელო"
1806
მკითხველის კომენტარები / 1 /
bebeto
0
სურათზე რომ ნაკრებია ის შემადგენლობა რომ გვყავდეს ავსტრიას 30 ქულით მოვუგებდით მინიმუმ და გერმანიასაც მივაყუდებდით. ეეეხ :)
მსგავსი ამბები
რუბრიკის სხვა სიახლეები
;