"ზუროსმა სახარბიელო კონტრაქტებს საქართველოს ნაკრები ამჯობინა"

მსოფლიოს ჩემპიონატის საკვალიფიკაციო ეტაპი 24 ნოემბერს იწყება. პირველ მატჩს გერმანიაში გავმართავთ, მაგრამ ჯერაც უცნობია, ითამაშებს თუ არა ჩვენს ნაკრებში ორი ევროლიგელი თორნიკე შენგელია და გიორგი შერმადინი.

ამ და სხვა საინტერესო საკითხებზე სასაუბროდ კალათბურთის ფედერაციის პრეზიდენტ მიხეილ გაბრიჩიძეს ვესტუმრეთ.

- სამწუხაროდ, ევროლიგის კლუბებიდან კალათბურთელების გამოშვება ჩვენზე არ არის დამოკიდებული. ფედერაციებს კლუბებზე ზეგავლენის მოხდენა არ შეუძლიათ. ბევრ კალათბურთელს სურს ნაკრებში თამაში, მაგრამ საკლუბო ვალდებულება აყოვნებს. შესაბამისად ზარალდება სანაკრებო კალათბურთი, ქვეყნების პრესტიჟი.

- ფედერაციებს არა აქვთ უფლება, კლუბებს კატეგორიულად მოსთხოვონ?
- არის ერთი შანსი - დისკვალიფიკაცია მისცეს კალათბურთელს, მაგრამ ამით ხომ თვითონ მოთამაშე ზარალდება. არადა, შესაძლოა, თავად მოთამაშესაც ძალიან სურდეს ნაკრების დახმარება.

- რადგან სანაკრებო მატჩებს ევროლიგის ტური ემთხვევა, გამოდის, რომ თორნიკე შენგელიაც და გიორგი შერმადინიც ვერ ჩამოვლენ.
- სადღეისო მდგომარეობით მათი ჩამოსვლა გამორიცხულია. 24 ნოემბრამდე ცოტა დრო რჩება და მეეჭვება, ამასობაში ფიბამ და ევროლიგამ საერთო ენა გამონახონ. არადა, ფიბამ სანაკრებო მატჩები წელიწადის რამდენიმე თვეზე იმიტომ გაანაწილა, რომ გულშემატკივრებს მაღალი დონის კალათბურთის ყურების საშუალება მთელი წლის განმავლობაში ჰქონოდათ. დღეს კი ფორმატის შეცვლის იდეა გაუმართლებლად მოჩანს, გუნდები მეორე შემადგენლობებით გამოვლენ საკვალიფიკაციო ეტაპზე, რაც თამაშების ხარისხზეც აისახება.

- ევროლიგელების გარდა კიდევ ორი ლეგიონერი თამაშობს ევროტურნირებზე - მანუჩარ მარკოიშვილი და მაიკლ დიქსონი.
- მანუჩარი ევროთასზე ასპარეზობს. ამ შეჯიბრების მონაწილე კლუბები კალათბურთელებს სანაკრებოდ არ შეაფერხებენ. მხოლოდ ევროლიგაა პრობლემა. რაც შეეხება მაიკლ დიქსონს, იგი "სტრასბურთან" ერთად ჩემპიონთა ლიგაზე გამოდის. არც მას შეექმნება პრობლემა კლუბიდან. მთავარი კი ის არის, რომ თავად მაიკლი აფიქსირებს საქართველოს ნაკრებში თამაშის სურვილს.

- გიორგი ცინცაძემ სანაკრებო კარიერის დასრულების შესახებ სექტემბერში განაცხადა, თუმცა აშკარაა - გუნდს იგი სჭირდება.
- გიორგის იმედი ჩვენც გვაქვს და მთავარ მწვრთნელ ილიას ზუროსსაც.

- ბერძენი სპეციალისტი საქართველოში როდის ჩამოვა?

- მალე ჩამოვა, ადგილობრივ კალათბურთელებს შეკრებს და ტაქტიკა-სტრატეგიაზე იმუშავებს. ევროპის ჩემპიონატის შემდეგ ნაკრებში ცვლილებები განხორციელდება და სამუშაო ნამდვილად ბევრია.

კალათბურთის ფედერაციის საპრეზიდენტო არჩევნებში მონაწილეობაზე გადაწყვეტილება ჯერ არ მიმიღია

- გასულ თვეში ილიას ზუროსთან კონტრაქტი გაახანგრძლივეთ. როგორც ჩანს, კმაყოფილი დარჩით მისი მუშაობით.
- რა თქმა უნდა. მან საქართველოს ნაკრებში ნაყოფიერი ორი წელი გაატარა. ამასთან, გავითვალისწინეთ მისი პიროვნული თვისებები და კიდევ ორწლიანი ხელშეკრულება შევთავაზეთ. მას ჰქონდა წინადადებები სხვადასხვა კლუბებიდან, სახარბიელო კონტრაქტებსაც სთავაზობდნენ, მაგრამ საქართველოს ნაკრებში დარჩენა ისურვა და ჩვენთან გააფორმა კონტრაქტი. ისიც აცნობიერებს, რომ სამუშაო ბევრია, ნაკრები თაობათა ცვლის პროცესშია და იმედს დავიტოვებთ, რომ შევძლებთ ამ პროცესის ნაკლებად მტკივნეულად გადატანას.

- ევროპის 2021 წლის ჩემპიონატის ერთ-ერთი ჯგუფის მასპინძლობის სურვილი ოფიციალურად როდის უნდა იქცეს განაცხადად?
- ფიბას ხელმძღვანელებს დავუდასტურეთ ერთ-ერთი ჯგუფის თბილისში მიღების სურვილი. აპრილში გაიმართება ფიბა-ს აღმასკომი, სადაც დადგინდება ევრობასკეტი 2021-ის ფორმატი და გამოცხადდება კონკურსი მასპინძლობაზე. სწორედ ამის შემდეგ შევიტანთ ოფიციალურ განაცხადს.

ვიმედოვნებთ, რომ ფიბა კვლავ ოთხ ქვეყანაში ჩაატარებს ევრობასკეტს. ვფიქრობთ, ამას ბევრი პლუსი აქვს. ერთ-ერთი ჯგუფის მასპინძლობის უფლების მიღება დიდი ნაბიჯი იქნება ქართულ კალათბურთში, მნიშვნელოვნად შეუწყობს ხელს კალათბურთის განვითარებას როგორც საქართველოში, ასევე ზოგადად ჩვენს რეგიონში, სადაც ისედაც ლიდერები ვართ. ჩვენი მეზობლები აქტიურად თანამშრომლობენ და იზიარებენ ჩვენს გამოცდილებას. ამასთან, ასეთი დონის ტურნირის მასპინძლობა დადებითად იმოქმედებს ჩვენი ქვეყნის ტურისტულ პოტენციალზე, დიდი შემოსავლის მოტანა შეუძლია. ცხადია, სახელმწიფოს მხარდაჭერის გარეშე მიზნის მიღწევა ძალიან გაგვიჭირდება.

სხვათა შორის, ევრობასკეტის მასპინძლობის საკითხზე სპორტის მინისტრის მოადგილე რევაზ ჯაველიძე პირადად ესაუბრა ფიბას გენერალურ მდივან კამილ ნოვაკს.

- სპორტის სასახლე აკმაყოფილებს შესაბამის მოთხოვნებს?
- ფიბას სტანდარტებში მოსაყვანად თბილისის სპორტის სასახლეს მცირე მოდერნიზაცია დასჭირდება.

- დიდი ხნის შესვენების შემდეგ ქართული კლუბები ევროსარბიელს დაუბრუნდნენ. რამდენად მნიშვნელოვნად მიგაჩნიათ "დინამოს" ფიბა-ევროპის თასზე გასვლა?
- თუ ძლიერი ნაკრები გვინდა, რაც შეიძლება მეტი კალათბურთელი უნდა გვყავდეს საერთაშორისო გამოცდილებით. მხოლოდ საქართველოს ჩემპიონატი ეროვნულ გუნდს კადრებს ვერ მოუმზადებს. სწორედ ამიტომ, მისასალმებელია "დინამოს" ევროსარბიელზე გასვლა. საორგანიზაციო საკითხებსა და ლოჯისტიკაში გუნდს კალათბურთის ფედერაცია აქტიურად ეხმარება. იმედს ვიტოვებთ, რომ მომავალი სეზონიდან უფრო მეტი ქართული გუნდი ითამაშებს ევროპის საკლუბო შეჯიბრებებში.

- კალათბურთის ფედერაციის საპრეზიდენტო არჩევნები დეკემბერშია. აპირებთ მონაწილეობას?
- გადაწყვეტილება ჯერ არ მიმიღია. მთავარია, არჩევნებმა კონსტრუქციულ გარემოში ჩაიაროს, არ იყოს რყევები და ერთმანეთის შეურაცხყოფა, მოვუფრთხილდეთ ერთმანეთის ღირსებას. იმედი მაქვს, იქნება მხოლოდ იდეებისა და აზრთა ჭიდილი. ამით ქართული კალათბურთი მხოლოდ მოიგებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"
2984
მკითხველის კომენტარები / 0 /
მსგავსი ამბები
რუბრიკის სხვა სიახლეები