თავისუფალი. შეკრება და ტურნირი ვლადიკავკაზში

2 დეკემბერს საქართველოს თავისუფალი სტილით მოჭიდავეთა ნაკრები ვლადიკავკაზში მიდის, სადაც ჯერ შეკრებას გაივლის, მომდევნო უქმეებზე - 7-9 დეკემბერს კი გამოვა საერთაშორისო ტურნირში "ალანები".

ნაკრების მთავარ მწვრთნელ გიორგი იანტბელიძეს იქ 25 მოჭიდავე მიჰყავს - ძირითადად ნაკრების პირველ-მეორე ნომრები, რადგან იქ შეკრებაც იმართება, ხოლო ნაკრები საქართველოს ჩემპიონატისა და საგაისო მნიშვნელოვანი ტურნირისთვის ემზადება. მის განკარგულებაში ნაკრების უკლებლივ ყველა ლიდერია როგორც ეროვნული, ასევე ახალგაზრდული გუნდიდან: ოლიმპიური და მსოფლიოს, ევროპის სამგზის ჩემპიონი ვლადიმერ ხინჩეგაშვილი (65), მსოფლიოს ორგზის და ევროპის ჩემპიონი გენო პეტრიაშვილი (125), მსოფლიოს ჩემპიონი ზურაბ იაკობიშვილი (70), მსოფლიოს ფინალისტი ავთანდილ კენჭაძე (74), 23-წლიანებში მსოფლიოს წლევანდელი გამარჯვებულები - ნიკოლოზ კენჭაძე (79), გივი მაჭარაშვილი (97) და სხვები.

თუმცა დაზუსტებით ჯერ მაინც არ შეიძლება იმის თქმა, ვინ იჭიდავებს ამ ტურნირში - ეს შეკრების დასრულების შემდეგ გადაწყდება. მაგალითად, მაჭარაშვილს ტრავმა აწუხებს და შეხედავენ, რამდენად მოასწრებს გამოჯანმრთელებას და იქნება თუ არა მზად საჭიდაოდ, ხოლო ძმები კენჭაძეები, შეიძლება, უბრალოდ, დაასვენოს, რადგან, მწვრთნელის აზრით, მათ ბოლო პერიოდში ისედაც ბევრი იჭიდავეს და არ გადაიღალონ. გარკვეული საკითხები სხვებთან მიმართებაშიცაა გასარკვევი, ეს ყველაფერი კი ადგილზე გაირკვევა.

შეგახსენებთ, რომ ესაა ახალი ტურნირი, რომელშიც ჩვენი ნაკრები შარშანაც გამოვიდა და უნდა ითქვას, რომ მსაჯების მხრიდან წარმოუდგენელი ზეწოლის ქვეშაც მოექცნენ. მაგალითად, აშკარად წააგებინეს ხინჩეგაშვილს და ბევრ სხვასაც.

დეკემბერში ჩვენი ნაკრების წევრები - არც ძირითადები და არც სარეზერვოები სხვა შეჯიბრებებში აღარ გამოვლენ, რადგან წინ საქართველოს ჩემპიონატი ელოდებათ. თუმცა, სავარაუდოდ, ლიდერთა ნაწილი სხვადასხვა ქვეყნის საკლუბო ჩემპიონატში მაინც გამოვა, ოღონდ მოსალოდნელია, რომ მწვრთნელმა ამ მხრივ რაღაც შეზღუდვები დააწესოს. იანტბელიძე შარშან უკმაყოფილო იყო იმით, რომ უმეტესობას კლუბებში ბევრი ჭიდაობა უწევდა, რის გამოც ვერ ასწრებდნენ დასვენებას და ნაკრების საწვრთნელ გეგმასაც რამდენადმე ჩამორჩებოდნენ.

ყოველდღიური სპორტული გაზეთი "ლელო"
460
მკითხველის კომენტარები / 0 /
მსგავსი ამბები
რუბრიკის სხვა სიახლეები