თავისუფალი ჭიდაობა. სანაკრებო სიას ევროთასებისთვის კიევში გაარკვევენ... გენოს ასვენებენ

საქართველოს თავისუფალი სტილით მოჭიდავეთა ნაკრებმა გუშინ დაასრულა რიგით მეორე საწვრთნელი შეკრება ბორჯომში და სპორტსმენები სახლებს დაუბრუნდნენ, თუმცა მხოლოდ რამდენიმე საათით, რადგან ხვალ გუნდი უკვე კიევში მიფრინავს, სადაც 10-12 მაისს მონაწილეობას მიიღებს „სახელოვან უკრაინელ მოჭიდავეთა და მწვრთნელთა ხსოვნის მემორიალში“.

ეს ტურნირი ბოლო საშეჯიბრო ეტაპია ივნისის ბოლოს მინსკში გასამართავი მეორე ევროპული თამაშებისთვის - გუნდის მთავარი მწვრთნელი გიორგი იანტბელიძე მისი დასრულების შემდეგ დაასახელებს მინსკში წასაყვან შემადგენლობას. 

თუმცა გასარკვევიც ბევრი არაფერია და ლიდერთა ვინაობა თითქმის ყველა წონაში უკვე გარკვეულია. ოღონდ შემადგენლობის გაცნობამდე იმასაც შეგახსენებთ, რომ ევროპული თამაშები დიდი ოლიმპიადის ანალოგიით ტარდება ანუ მის პროგრამაშიც 10-დან მხოლოდ 6 წონითი კატეგორიაა, რომლებიც დიდი ოლიმპიადების პროგრამაშია შეტანილი. თავისუფალ ჭიდაობაში ესენია 57, 65, 74, 86, 97 და 125 კილოგრამები.

იანტბელიძეს კიევში დანარჩენ წონებშიც მიჰყავს მონაწილეები, რადგან სხვებს მსოფლიოსთვის ამზადებს (მაგალითად, მსოფლიოს ჩემპიონ ზურაბ იაკობიშვილს (70) ევროპის პრიზიორ ნიკა კენჭაძეს (79) და სხვებს), მაგრამ მინსკის თამაშების თვალსაზრისით საინტერესო ეს 6 წონაა. 

თუმცა კიევში ჩვენი გუნდი არასრული შემადგენლობით იასპარეზებს: მძიმე წონაში მონაწილე რომ არ გვეყოლება, ეს აქედანვეა გადაწყვეტილი, რადგან მთავარი მწვრთნელი გორელ მსოფლიოს ორგზის და ევროპის ჩემპიონ გენო პეტრიაშვილს ასვენებს. თუმცა, შესაძლოა, 65 კილოგრამშიც მონაწილის გარეშე დავრჩეთ:

იანტბელიძეს წასაყვანად სამტრედიელი ედემი ბოლქვაძე ჰყავდა შეგულებული, მაგრამ მან ბოლო ვარჯიშებზე ნეკნები იტკინა და მისი წასვლა ამ ტრავმის გამო გამოირიცხა. ახლა ჩვენი ფედერაცია ცდილობს, მის ნაცვლად გუნდში მცხეთელი გიორგი რევაზიშვილი ჩართოს, მაგრამ უკვე ცაიტნოტშია და ვნახოთ, მოახერხებს თუ ვერა ამ საქმის მოკვარახჭინებას. თუ ვერ შეძლებს, მაშინ არც 65-ში გვეყოლება მოჭიდავე. 

ამ წონას თუ არ ჩავთვლით, იანტბელიძის განკარგულებაში 17 სპორტსმენია. ამ სიას ქვემოთ გაეცნობით და ნახავთ, რომ პეტრიაშვილის გარდა, მასში არც მეორე გორელი და გუნდის ყველაზე ტიტულოვანი წევრი, ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილია (65) - ეს იმიტომ, რომ პეტრიაშვილის დარად, მასაც განაღდებული აქვს მინსკში, ევროპულ თამაშებში მონაწილეობა. 

არსებითად, ბელარუსში წასაყვან კანდიდატთან დაკავშირებით ყველაზე დიდი კითხვის ნიშანი უმჩატეს, 57 კილოგრამშია, სადაც ამ უფლებისთვის ქუთაისელი ლაშა ლომთაძე და ყვარლელი რობერტ დინგაშვილი იბრძოლებენ, ხონელი ოთარ გოგავა კი, როგორც ჩანს, საბოლოოდ გამოაკლდა ამ კონკურენციას - მწვრთნელი მას კიევში 61-ში აჭიდავებს. თუმცა არ გამოვრიცხავთ, რომ თუ 57-ში ორივემ ჩააგდო უკრაინული შეჯიბრება, გოგავამ კი, პირიქით, წარმატებით იჭიდავა, ისევ დააყენონ 57-ში. 

სხვა წონებში კი ლამის გარკვეულია მინსკში წასაყვანი შემადგენლობა. ხინჩეგაშვილსა და პეტრიაშვილზე უკვე ვთქვით და დიდი ალბათობით, ბელარუსში ავთანდილ კენჭაძეს, ამინაშვილსა და ოდიკაძესაც ვიხილავთ. მით უფრო, რომ კენჭაძე და ოდიკაძე წლეულს ევროპის მესამე პრიზიორებიც გახდნენ. 

სხვა მხრივ კი იანტბელიძის მიერ დასახელებულ შემადგენლობაში დიდი მოულოდნელობები არაა და მწვრთნელი ლიდერებს თუ სტარტისთვის აჭიდავებს, ახალგაზრდებს გამოცდილების მიღების შანსს აძლევს და მათგანაც ბევრი შეიყვანა განაცხადში.

ერთადერთი მეტ-ნაკლებად საინტერესო სიახლე, რამაც, შეიძლება, ყურადღება მიიქციოს, ისაა, რომ გორელი თეიმურაზ ვანიშვილი 57-ის ნაცვლად ამჯერად 61-შია დაყენებული. თუმცა ისიც უნდა ითქვას, რომ ის პირველად აარა ამ წონაში - წლეულს 23-იანთა ევროპის ჩემპიონატიც აქ იჭიდავა, მაგრამ - წარუმატებლად, მე-10 იყო. როგორც ჩანს, ის საბოლოოდ ემზადება ახალ წონაში გადასასვლელად, რაც მისი ახალგაზრდული ასაკიდან გამომდინარე, არათუ გასაკვირი არაა, არამედ მოსალოდნელიც - ასაკთან ერთად წონაც ემატება და სულ უფრო გაუჭირდება 57-ში დაკლება. 

საქართველოს ნაკრები
57 კგ. ლაშა ლომთაძე (ქუთაისი), რობერტ დინგაშვილი (ყვარელი)
61 კგ. თეიმურაზ ვანიშვილი (გორი), ოთარ გოგავა (ხონი), რამაზ თურმანიძე (აჭარა).
70 კგ. ზურაბ იაკობიშვილი, რამაზან მალაკოევი (ორივე - ყვარელი).
74 კგ. ავთანდილ კენჭაძე (ამბროლაური), ზურაბ ერბოწონაშვილი (საგარეჯო). 
79 კგ. ნიკა კენჭაძე (ამბროლაური), ტარიელ გაფრინდაშვილი (თბილისი).
86 კგ. სანდრო ამინაშვილი, დავით ფირუზაშვილი (ორივე - თბილისი), ზაურ ბერაძე (ხარაგაული). 
92 კგ. ირაკლი მწითური (თბილისი)
97 კგ. ელიზბარ ოდიკაძე (თბილისი), ზურაბ ურთაშვილი (მცხეთა). 

ყოველდღიური სპორტული გაზეთი "ლელო"
542
მკითხველის კომენტარები / 0 /
მსგავსი ამბები
რუბრიკის სხვა სიახლეები
;