თავისუფალი ჭიდაობა. ბუჯიაშვილის ოქრო და პეტრიაშვილის ტრავმა სამი მედალი ბულგარეთიდან [ანალიზი+VIDEO]

ბულგარულ რუსეში დასრულდა „დან კოლოვისა და ნიკოლა პეტროვის“ სახელობის „დიდი პრიზი“ თავისუფალ ჭიდაობაში, რომელიც სარეიტინგო ტურნირიც იყო. საქართველოს ნაკრებმა 3 მედალი მოიპოვა - სამივე სინჯის თითო ჯილდო. ჩემპიონი გორელი ბექა ბუჯიაშვილი (57) გახდა, თბილისელი ირაკლი მწითური (92) მეორეზე გავიდა, ხოლო ამბროლაურელი ნიკოლოზ კენჭაძე (79) - მესამეზე.

ბუჯიაშვილმა პირველ შეხვედრაში, მოლოდინისამებრ, დიდი ანგარიშით - 13:2 დაამარცხა ალჟირელი აბდელაკ ხერბაჩე, მერე დაძაბულ ბრძოლაში უკრაინელი არმენ არაქელიანი 13:10 დაჯაბნა, ნახევარფინალში კი ასევე წმინდა გამარჯვებით, 12:2 ფრანგთა ევროპის პრიზიორი ზოჰაირ ელ ოუარაქე ჩამოიცილა საფინალო გზიდან. მან ფინალშიც შემართებით იბრძოლა თურქთა მსოფლიოს მესამე პრიზიორ სულეიმან ატლისთან და 6:4 მოუგო.

ოქროსთან მწითურიც ძალიან ახლოს იყო, რადგან ფინალური შერკინება აქტიურად დაიწყო რუს მაგომედ ყურბანოვთან და ერთი ხანობა ანგარიში 3:1 მიჰყავდა, მაგრამ საბოლოოდ 9:5 დამარცხდა. ჩვენებური აშკარა რიდით ეჭიდავებოდა დაღესტნელს და ერთ ეპიზოდში ქრესტომათიული გდების საშუალებაც მისცა, როცა მეტოქემ ზურგს უკან 4-ქულიანზე გაისროლა.

მწითურმა ფინალამდე თურქი სულეიმან კარადენიზი 6:1 დაამარცხა, ამერიკელ რაილ კენტ ლეფევერს 8:1 მოუგო, ნახევარფინალში კი კიდევ ერთი თურქი, ოღონდ გაცილებით უფრო გამოცდილი იბრაჰიმ ბოლუკბასი დაჯაბნა - მას ისედაც 7:4-ს უგებდა, როცა ბეჭებზე დადო და წმინდა გამარჯვება მიითვალა.

კენჭაძემ ტურნირი საფრანგეთის სახელით მოჭიდავე ზელიმხან ხაჯიევთან წმინდა მოგებით დაიწყო - 8:0. არადა, ხაჯიევი ევროპის შარშანდელი ფინალისტია და სულაც არაა ხელწამოსაკრავი მეტოქე. ამას თურქ აიუბ ბარაისთან მოგება მიაყოლა - 6:1, ნახევარფინალში კი ამერიკელ ალექსანდერ დევიდ დირინგერთან დამარცხდა. ბრინჯაოსთვის პაექრობაში კენჭაძის მეტოქე ისევ თურქი მუჰამედ ნური კოტანოღლუ იყო, ვინც ქართველმა ათლეტმა ყოველმხრივ დაჩაგრა - 5:0 მის სასარგებლოდ.

მეხუთე ადგილზე გავიდა ჩვენი გუნდის ლიდერი, გორელი მძიმეწონოსანი გენო პეტრიაშვილი. ყველაზე მოულოდნელიც მისი უმედლოდ დარჩენაა, თუმცა ამის მიზეზი ტრავმაა - მეოთხედფინალში კორეელ კოუნგჯინ ნამთან 11:2 მოგება ხელის ტრავმად დაუჯდა, რის გამო ვერც ნახევარფინალში იჭიდავა უკრაინელ ალექსანდრ ხოციანოვსკისთან და ვერც დამამშვიდებლის ფინალში - რუს საიდ გამიდოვთან. კორეელამდე პეტრიაშვილმა კიდევ ერთი მეტოქე დაამარცხა საკმაოდ დამაჯერებლად - ეგვიპტელ ხალედ ომრ ზაკი მოჰამედ აბდალას 7:1 მოუგო.

დამამშვიდებელ წრემდე მივიდა და მეშვიდე ადგილზე დარჩა ონელი ზვიად მეტრეველი (97). საკვალიფიკაციო წრეში მან ამერიკელი კევინ სკოტ ბაზლეი 6:0 დაამარცხა, მერე ინდოელ აკაშ ანტილსაც იმავე ანგარიშით სძლია, მეოთხედფინალში კი უკრაინელ ვალერი ანდრეიცევთან 2:3 წააგო, რასაც სანუგეშოში რუს იგორ ოვსიანიკოვთან 0:6 მარცხიც მიაყოლა.

ჩვენი გუნდის სხვა წევრებიდან გიორგი ღონიაშვილი (57) პირველივე შეხვედრაში 2:12 დამარცხდა ბელარუს ძიმჩუკ რინჩინაუსთან და მერე აღარც სანუგეშო წრეში გადასვლის საშუალება მიეცა. ზედა წონაში მოჭიდავე ოთარ გოგავამ (61) კი ერთი შეხვედრა მოიგო რუმინელ ნიკოლაი ოკლოპკოვთან - 4:1, მაგრამ მერე უზბეკ ჯაჰონგირმირზა ტურობოვთან 3:12 დამარცხდა და გამოვარდა. ტურნირზე ანალოგიური გზა გაიარა გიორგი რევაზიშვილმაც (65) - ერთი შეხვედრა მოიგო უკრაინელ გორ ოგანესიანთან, 6:4, მაგრამ შემდეგ ისიც უზბეკ აბოს რახმონოვთან 2:9 დამარცხდა და ასევე ნაადრევად დაემშვიდობა შეჯიბრებას. ლევან ქელეხსაშვილი (70) საკვალიფიკაციო წრიდანვე გამოეთიშა შეჯიბრებას - უკრაინელ ანდრეი კვიატკოვსკისთან 2:6 წააგო. პირველივე პაექრობაში დამარცხდა ევროპისა და მსოფლიოს მესამე პრიზიორი სანდრო ამინაშვილიც (86) - რუს რუსლან აბდულაევთან წმინდად, 0:10 დათმო ორთაბრძოლა.

890
მკითხველის კომენტარები / 0 /
მსგავსი ამბები
რუბრიკის სხვა სიახლეები
;