თავისუფალი ჭიდაობა. გია კვინიკაძე: ახლა თუ არ შეეჩვიე აქტიურ ჭიდაობას, დიდებში არაფერი გამოგივა

მაკედონიაში ჩატარებულ ჭაბუკთა ევროპის ჩემპიონატზე ჩვენი თავისუფალი სტილით მოჭიდავეთა ნაკრების ტრიუმფალური გამოსვლის შესახებ ქომაგმა უკვე იცის - 10-კაციანი გუნდიდან 9-მ მედლისთვის იჭიდავა, საბოლოოდ კი 7 ჯილდო ვირგუნეთ:

თითო ოქრო-ვერცხლი და 5 ბრინჯაო. ევროპის ჩემპიონი ბაგრატ გაგნიძე (71) გახდა, ვიცე-ჩემპიონის ტიტულს კი დავით აბდალაძე (55) დაეპატრონა. მესამე ადგილზე გიორგი გეგელაშვილი (48), გიორგი ჭოლაძე (51), ვლადიმერ გამყრელიძე (60), გიორგი ნებუნიშვილი (80) და სოლომონ მანაშვილი (110) გავიდნენ.

მედლების გარდა, ამ გუნდმა კარგი ჭიდაობითაც მიიქცია ყურადღება: ჭიდაობდნენ ტექნიკურად, აკეთებდნენ ბევრ ილეთს, არც ფსიქოლოგიური პრობლემები ეტყობოდათ.

როგორ და რის საფუძველზე მიაღწია ამას, რა შეცვალა თუ გარდაქმნა ჩვეულებრივ სავარჯიშო გრაფიკში, ამაზე ჭაბუკთა ნაკრების მთავარი მწვრთნელი გია კვინიკაძე გვესაუბრება.

- 10 კაციდან 9-მ მედლისთვის იჭიდავა... სავარჯიშო სისტემაში შეიტანეთ რამე ცვლილებები თუ რისი დამსახურებაა ასეთი კარგი გამოსვლა?

- 9-მ კი იჭიდავა, მაგრამ იმ მეათესაც - ჯონი ცხადაიასაც შეეძლო მედლის მოპოვება, თუმცა პატარა შეცდომა დაუშვა და დაისაჯა, მაგრამ მსოფლიოზე გამოვასწორებთ. 92-ში ნიკა ბერულავასგან არ ველოდი ამდენს, მაგრამ ორი შეხვედრა მოიგო და საბოლოოდ მესამე ადგილისთვის შეხვედრა წააგო.

კარგად ვიყავით მომზადებული, გუნდიც კარგი იყო და კიდეც გაგვიმართლა. ვიცოდით ამ გუნდის შესაძლებლობები, კარგი თაობა მოვიდა და გვინდოდა, მაქსიმუმი გაგვეკეთებინა. რაც შეგვეძლო, მწვრთნელებმა ყველაფერი ჩავდეთ მომზადებაში - გამძლეობა, ტაქტიკური თუ სხვა ელემენტები, ყველაფერზე ვმუშაობდით. თან ხომ ვიცოდით, ვინ რაში იყო ძლიერი, ვის რაში სჭირდებოდა მომატება და ასე ინდივიდუალურად ვითვალისწინებდით ყველაფერს.

ძალიან დაგვეხმარა ოლიმპიური კომიტეტი, რაკი ეს სალიცენზიო შეჯიბრება იყო, ასევე - ჩვენმა ფედერაციამაც მაქსიმალურად შეგვიწყო ხელი. გუნდთან ფსიქოლოგიურადაც ვიმუშავეთ და ბიჭებში ენთუზიაზმი, მონდომება დიდი იყო, თორემ არც ვარჯიშების ინტენსივობა გაგვიზრდია და არც - დატვირთვები.

მაქსიმალისტი კი ვარ, მაგრამ მეც და ჩემი გუნდიც ვცდილობთ, ზედმეტად არ დავტვირთოთ, არ გადავღალოთ და ისე მივიყვანოთ ტურნირზე, რათა ფორმის პიკში შეხვდნენ შეჯიბრებას.

- სასიამოვნო იყო იმის ცქერა, რომ ეს პატარა ბავშვები ასე ტექნიკურად და შემტევ სტილში, პირველ ნომრად ჭიდაობდნენ, რაც ბოლო წლებში, თითქოს, დავკარგეთ.

- გუნდში ნამდვილად ვნერგავ აქტიურ ჭიდაობას და ვცდილობ, კომბინაციურად იჭიდაონ, შეეძლოთ კომბინაციების გადაბმა. საბედნიეროდ, გამოგვდის კიდეც, თუმცა, რაც შეცდომებია, იმათაც გამოვასწორებთ.

უშეცდომო არავინაა და მით უფრო - ამ ასაკში კიდევ უფრო ხშირია. ეს ის ასაკია, როცა რაც შეიძლება მეტი უნდა აკეთო ესა თუ ის ფანდი, რომ მერე უფროსებში არ გაგიჭირდეს აქტიური ჭიდაობა. აქედანვე თუ მიეჩვივნენ პასიურ ჭიდაობას, მერე მისი გამოსწორება კი არა, უფრო მოუმატებენ პასიურობას.

- ამ შედეგიდან გამომდინარე, იქნებ უცნაური კითხვა იყოს, მაგრამ ვინმეზე ხომ არა ხართ გულდაწყვეტილი?

- ზოგზე მართლაც მწყდება გული, რადგან მათ კიდევ უფრო უკეთესი შედეგის ჩვენება შეეძლოთ. მაგალითად, 48 კილოგრამში გიორგი გეგელაშვილი ევროპის შარშანდელი ჩემპიონი და მსოფლიოს პრიზიორი წლეულსაც ძალიან ახლოს იყო გამარჯვებასთან.

მას ძალიან ადვილად შეუძლია ქულების მოპოვება, მაგრამ, სამწუხაროდ, ასევე იოლად კარგავს და ასეთ ჭიდაობაში 14:15 წააგო. საბოლოოდ მესამეზე გავიდა.

ასევე გიორგი ნებუნიშვილსაც 80 კილოგრამში 2 წამით ადრე არ ეგონა, თუ იგებდა. არადა, 2 ქულით წინ იყო და კი ვეძახდით აქედან, მაგრამ ვერ გაიგო თუ რა იყო, გარისკა და დაკარგა 2 ქულა. ის მოძრაობა რომ არ გაეკეთებინა, ფინალში გადიოდა და თან ორივე ოლიმპიური წონაა.

- გუნდიდან ვის გამოარჩევთ?

- ცხადია, ჩემპიონს - ბაგრატ გაგნიძეს 71 კილოგრამში. იქაც ხომ ძალიან დამაჯერებლად იჭიდავა, მთელი შეკრებები ისე გაიარა, ერთი შენიშვნაც არ მიგვიცია. მოსამზადებელ ციკლში ენერგიული, რომ იტყვიან, გემრიელი ვარჯიშებით გამოირჩეოდა ყველასგან.

გუნდის კაპიტნადაც დავნიშნეთ და გაამართლა კიდეც, ლიდერის თვისებები გამოავლინა. თან გამოცდილიცაა - შარშანაც გვყავდა ნაკრებში და ამ ყველაფერმა დადებითად იმოქმედა. შარშანდელმა გამოცდილებამ წლეულს იჩინა თავი და დიდადაც წაადგა.

- დაბოლოს: მსოფლიოს ჩემპიონატისთვის შესარჩევი ტურნირი რომელი გექნებათ და ვინმეს თუ დაუბევებთ ადგილს ნაკრებში?

- მალე ძირითად შემადგენლობას რუმინეთში ვაჭიდავებთ, სადაც ძალიან ძლიერი ტურნირი ტარდება, და რამდენიმე წონაში დავამატებთ კიდეც ახალ ფალავნებს. ეს იქნება შესარჩევი შეჯიბრებაც და სასტარტოც.

ამის შემდეგ გადავხედავთ შექმნილ რეალობას - შეიძლება, მსოფლიოსთვის 1-2 წონაში შევცვალოთ კიდეც მონაწილე. ზოგს წონის შენარჩუნება უჭირს და ვნახოთ, როგორ იქნებიან. თუმცა ევროპის ჩემპიონსა და მედალოსნებს მსოფლიოზე აუცილებლად ვაჭიდავებთ - ამ ეტაპზე ისინი შეუცვლელები არიან. რუმინეთის შემდეგ ორი შეკრება გვექნება საქართველოში - ბორჯომში და დასკვნითი დუშეთში.

ყოველდღიური სპორტული გაზეთი "ლელო"
950
მკითხველის კომენტარები / 0 /
მსგავსი ამბები
რუბრიკის სხვა სიახლეები
;