თავისუფალი ჭიდაობა. გიორგი იანტბელიძე: შეიკრა გუნდი და არა მთავარი ნაკრები

თავისუფალ ჭიდაობაში საქართველოს ნაკრების მთავარი მწვრთნელი გიორგი იანტბელიძე ამბობს, რომ ქვეყნის პირველობით გამოვლინდა გუნდი, რომელიც ევროპის ჩემპიონატისთვის მოემზადება, და არა კონტინენტის პირველობაზე წამსვლელი ფალავნები.

მისი თქმით, ქვეყნის ჩემპიონატში გამარჯვება არ ნიშნავს, რომ ვინმეს განაღდებული აქვს ევროპის პირველობაში მონაწილეობა და იქ იჭიდავებს ის, ვინც უკეთესად იქნება მომზადებული იმ კონკრეტული შეჯიბრების წინ.

- მთავარია, რომ საქართველოს ჩემპიონატმა ნორმალურად ჩაიარა. გამართლდა ჩვენი იმედები და იმათ გაიმარჯვეს, ვისგანაც ამას წინასწარ მოველოდით კიდეც.

ასევე გამოვლინდნენ ახალგაზრდა სპორტსმენები, რომლებიც გვაძლევენ იმედს, რომ მომავალში ბევრჯერ გაახარებენ ჩვენს გულშემატკივრებს. დღეს მხოლოდ ნახევარი ნაკრები დაკომპლექტდა.

ეს ის გუნდი იქნება, რომელიც მომავალში მონაწილეობას მიიღებს სხვადასხვა საერთაშორისო ღონისძიებებში.

თუმცა ეს სულაც არ ნიშნავს, რომ მოგებული აუცილებლად იჭიდავებს ევროპის ჩემპიონატში.

კონტინენტის პირველობაზე ის გამოვა, ვინც უფრო ძლიერად იქნება მომზადებული ევროპის ჩემპიონატის - მთავარი ღონისძიების წინ. დიდ შეჯიბრებებზე გამოვლენ მხოლოდ საუკეთესოები.

რაც შეეხება ჭიდაობის ხარისხს, მგონი, არ იყო ცუდი. გუნდი შეიკრა, კალაპოტში ჩადგა და იანვრიდან ვეცდებით, მივყვეთ მას, რათა ნაკრებმა უფრო და უფრო მეტს მიაღწიოს.

ყოველდღიური სპორტული გაზეთი "ლელო"
942
მკითხველის კომენტარები / 0 /
მსგავსი ამბები
რუბრიკის სხვა სიახლეები
;