[თავისუფალი ჭიდაობა] გიორგი სულავას ბრინჯაო

საქართველოს თავისუფალი სტილით მოჭიდავე 23-წლამდელთა ნაკრებმა ბუდაპეშტში მიმდინარე ამ ასაკობრივი კატეგორიის მსოფლიოს ჩემპიონატში თავის მონაგარს კიდევ ერთი ბრინჯაოს მედალი შემატა: გუშინ 74 კილოგრამში მსოფლიოს მესამე პრიზიორი ქუთაისელი გიორგი სულავა გახდა. ის დამამშვიდებლის ფინალში თურქ ფაზლი ერილმაზს ხვდებოდა და თავიდან 0:2 ჩამორჩა, როცა მეტოქე ორივე ხელით კარგად შევიდა ფეხებში და გადააგდო. საბედნიეროდ, ქუთაისელმა ათლეტმა მას სიხარული დიდხანს არ აცალა - ფეხიდან აყვანით ჩოქბჯენში გადაიყვანა და იქვე დაატრიალა კიდეც, რითაც ანგარიში 4:2 გახადა, მაგრამ ამასაც არ დააჯერა და ბეჭებზეც დააწვინა.

გუშინ ჩვენი ნაკრებიდან ბრინჯაოსთვის კიდევ ორი ფალავანი ჭიდაობდა - სამტრედიელი დემურ მეგენეიშვილი (92) და მცხეთელი მძიმეწონოსანი ზურაბ ურთაშვილი, მაგრამ ორივე დამარცხდა და უმედლოდ დარჩნენ.

მეგენეიშვილი დამამშვიდებელ წრეში პირველივე ეტაპიდან ჩაერთო, სადაც მონღოლ ცოგტგერელ მუნკბაატარს წმინდად, 10:0 მოუგო, მერე უკრაინელ ვასილ სოვასაც იმავე ანგარიშით სძლია და დამამშვიდებლის ფინალში გავიდა. იქ მისი მეტოქე კუბელი იონგერ პაული ბასტიდა რომარესი იყო, ვისთანაც ვერაფერს გახდა და 2:6 წააგო. ურთაშვილი პირდაპირ ბრინჯაოსთვის ჭიდაობდა, მისი მოცილე კი ყაზახი იუსუპ ბატირმურზაევი აღმოჩნდა. ურთაშვილმა მას პირველი პერიოდი 2:0 მოუგო, თუმცა მეორეში ვითარების ბატონ-პატრონად ყაზახი იქცა, ვინც ძირითადად ფეხიდან აყვანით და ჩოქბჯენში დატრიალებებით 13 უპასუხო ქულა აუღო ჩვენებურს და ურთაშვილმა ეს შეხვედრა 2:13 დათმო.

ამდენად, ზურაბ ჭიღლაძის გაწვრთნილმა ნაკრებმა ბუდაპეშტში გამოსვლა სამი მედლით - 2 ოქროთი და 1 ბრინჯაოთი ჩაამთავრა. შეგახსენებთ, რომ გუშინ მსოფლიოს ჩემპიონები ქუთაისელი მირზა სხულუხია (70) და თბილისელი ტარიელ გაფრინდაშვილი (79) გახდნენ. საერთო გუნდურ ჩათვლაში ჩვენი ნაკრები 109 ქულით მეოთხეა რუსეთის, ირანისა და აზერბაიჯანის შემდეგ.

ამით თავისუფალი სტილით მოჭიდავეებმა უკვე დაასრულეს გამოსვლა მსოფლიოს ჩემპიონატზე. ახლა ბუდაპეშტში ქალთა შეჯიბრება მიმდინარეობს, ბერძენ-რომაელები კი ჩემპიონატში ხვალიდან ჩაებმებიან.

270
მკითხველის კომენტარები / 0 /
მსგავსი ამბები
რუბრიკის სხვა სიახლეები
;