თავისუფალი ჭიდაობა. დავით მარსაგიშვილმა მსოფლიოს თასზე, ამერიკაში, ოთხივე შეხვედრა მოიგო

საქართველოს თავისუფალი სტილით მოჭიდავეთა ნაკრებმა მე-5 ადგილზე დაამთავრა გამოსვლა ამერიკულ აიოვა სითიში ჩატარებულ მსოფლიოს თასზე.

ტურნირზე ჩინებულად იასპარეზა ევროპის ორგზის ჩემპიონმა, მსოფლიოსა და ოლიმპიურმა პრიზიორმა დავით მარსაგიშვილმა (92), ვინც ოთხივე შეხვედრა მოიგო.

აღსანიშნავია, რომ ჩვენი გუნდი ამერიკაში სათადარიგო შემადგენლობით გამოდის. შეგახსენებთ, რომ ჩვენები ჯგუფში იაპონიასთან, ინდოეთთან და აშშ-სთან ერთად მოხვდა.

პირველი შეხვედრა იაპონელებთან გამართეს და 3:7 დათმეს. ჩვენებმა მხოლოდ ბოლო სამი პაექრობა მოიგეს: დავით მარსაგიშვილმა (92), გივი მაჭარაშვილმა (97) და ზვიად მეტრეველმა (125).

მომდევნო რაუნდში უკვე ინდოეთის ნაკრებს სძლიეს: 8:2. აქ ისევ მოიგეს წინა შეხვედრაში გამარჯვებულმა ტრიომ: მარსაგიშვილმა, მაჭარაშვილმა და მეტრეველმა, სხვა შეხვედრებში კი გამარჯვებები ლევან ქელეხსაშვილმა (70), ტარზან მაისურაძემ (74) და ტარიელ გაფრინდაშვილმა (79) მოიპოვეს.

მესამე წრის პაექრობა ჩვენმა ნაკრებმა ისევ დათმო. ამჯერად - მასპინძელ აშშ-სთან: 2:8. მარსაგიშვილმა ისევ ისახელა თავი - ოლიმპიური და მსოფლიოს ბრინჯაოს პრიზიორი მიხაელ კოქსი 5:0 დაამარცხა. საქართველოს ნაკრებს მეორე ქულა ლაშა ლომთაძემ (61) მოუტანა, მაგრამ ეს საბოლოო წარმატებისთვის საკმარისი არ აღმოჩნდა.

საბოლოოდ ჩვენმა გუნდმა ჯგუფში მხოლოდ ინდოეთს აჯობა და მეხუთე ადგილისთვის ბრძოლის უფლება მოიპოვა, სადაც მონღოლეთს შეხვდა და 6:4 სძლია. გამარჯვებებით თავიდან 0:2 ჩამოვრჩით, მაგრამ იმარჯვეს მაგომედ საიდოვმა (65), ქელეხსაშვილმა, მაისურაძემ, გაფრინდაშვილმა, მარსაგიშვილმა და მაჭარაშვილმა.

მსოფლიოს თასის მფლობელი ამერიკის გუნდი გახდა, რომელმაც ფინალში აზერბაიჯანს 6:4 მოუგო, მესამე ადგილზე კი იაპონია გავიდა. მათ გადამწყვეტ შეხვედრაში ასევე 6:4 კუბას სძლიეს.

ყოველდღიური სპორტული გაზეთი "ლელო"
764
მკითხველის კომენტარები / 0 /
მსგავსი ამბები
რუბრიკის სხვა სიახლეები